Read Gidar Markus 12 Bible Online

Markus 12 - Gidar bible

Markus 12

¹Yaŋ Zezu apel sit ɗii də wən məkpaŋga. Amna: Ɗəf adiyək guli net wileŋɗe abasək man də mambara, akuhuk katafay nawɗot uwa net wileŋɗe, arkak gəla metiŋgin naw ga gulyo. Appanək guli van avet məɗɗaŋ wəza, ambatək malaka.

²Yaŋ mawala agapə naw ɓu uwa net wileŋɗe, aslənək məgəɗ wəza nan azet məzən seŋ neki vi dəpsənən gən haran nan səzet wileŋɗe.

³Armanənək masləŋ naka, arganənka, apanənək van mekeleŋ.

⁴Yaŋ affən guli aslən məgəɗ wəza nan maɓɓani. Məzən seŋ nek armanənka, arganənək aka kini aranənka.

⁵Affən guli nak aslənək məgəɗ wəza maɓɓan əmpa, amma abaynənka. Vaski aɗɗaŋ sitin ɗii diiɗa, argeninik ɗii meɓɓeti, ɗii meɓɓet bo abeyinke.

⁶Say apəl sənək affən guli wiyən tətaka tabuwa nani. Aza wəgrak nani, aslənək wətən nak azet məzən seŋ neki, aɗumək na wagakdakanən wətuwəŋka.

⁷Amma apeleŋgək awalaŋ ziti. Ndəni dədawzəm gəla nani, say mabay səmə, asna guli net wileŋɗe dəsan gən kanamə.

⁸Armanənka abaynənka, asganənək gəbay nan sə gulyo.

⁹Vas na mbar affən guli net wileŋɗe adaɗɗa di? Wade wabey məzən seŋ neki, wapsit guli net wileŋɗe sit ɗii meɓɓeti.

¹⁰Kəŋɗanən məs məverin ɓa sa? Kunəŋ məs mərkaŋ gəla asgaŋgə naka, awla ndəni dəkpaŋ kuwən na sləma.

¹¹Vaski an məs Ɗəfdaya agəɗə, as sokeneyi amaramə.

¹²Ɗii gugiriɗ net Yahudiyenɗe akayaŋgək tive narmani, asənənka aketi apel wən məkpaŋgaŋka. Amma ageslne'eŋgək viyit ɗiiyi apanənka, ambataŋka.

¹³Yaŋ ɗii gugiriɗ net Yahudiyenɗe aslinin ɗii meɓɓeti Farisiyenɗe* dit ɗii na Herodə aza Zezu vi karman də wəpel na mani.

¹⁴Azoŋguk azani apsənən na: Mərbə zəga, məsənka əstə təstəssə, kaw geslne sən wəpel net ɗii ɓa, kaɗum aka ɗəf məzə gakdakan zən ɓa, istat wərban tive na Maŋgəlva də goŋga. Anah səmə: Ma henziŋ atakək əpsən zomorgol sən məlĩ na Roma sa walla də tak ɓa?

¹⁵Məpsən sa walla məpsən ɓa sa? Amma Zezu asənək matakataka neti, apsit na: Vi mi kəda əzaɗən mazat abaw di? Məkisu suley van nula ɗa.

¹⁶Akisənənka: Assohotike: Aŋ foto na naway də iya na zanəŋ məvernəŋ di? Azlan sənənka na Sazarri.

¹⁷Zezu apsit na: Məmndagan sən an dəslə sən məlĩ na Roma, məpsən Maŋgəlva bo an dəslə səni. Agətaŋgək aka wəzlan nan sawɓa.

¹⁸Ɗii məs adawyaŋ na Sadusiyenɗe azoŋguk aza Zezu. (Net tahəŋ wənahaŋ na wəsilya tay səka əmta ɓa.) Assohonənək Zezu:

¹⁹Mərbə zəga, Moyis aver səmək na: An ɗəf amtəka, apatək guluk nani tuwə ɓa, say məlmən dəzəm gəla zata, vi dəɗisən gən zev məlməni.

²⁰Kirin tahəŋ də məlma zit buhul, an daya akayək gulku, yaŋ amtə məza duwaŋ ɓa.

²¹Mabərkiyən azəmək gəla zata, nan bo amtəka duwə ɓa. Maɓɓan bo azəmək gəla zata, vasaka'a.

²²Ha ndəɗaŋ buhul pak azəmaŋgək gəla zata, amtaŋka duwaŋ ɓa. Dərbeget pak guluk bo təmtəka.

²³Vasna pay wəsilya sətəki əmta na kawsat kana nawa kandi? Vi ndəɗaŋ buhul pak aɗitənka.

²⁴Zezu azlansitik na: Munokum tatə zlaɓaŋ sawɓa. Vi kəsənən məs məverin ɓa, kəsənən gakdak na Maŋgəlva ɓa'a.

²⁵Pay wəsilyo net ɗii mimtiti, akayaŋ na guluk ɓa, wakpaŋgaŋ va maslayɗe na Maŋgəlva a disiŋ.

²⁶Amma wənna silyo net ɗii mimtiti, kəŋɗanən ɗaah adəv ɗerewel na Moyis wənna offo adəv dezeze ɓa sa? Va Maŋgəlva anahsən Moyis: Əntə Maŋgəlva na Abraham, Maŋgəlva na Isak, Maŋgəlva na Zakubu.

²⁷Maŋgəlva net ɗii mimtiti ɓa, amma Maŋgəlva net ɗii medereti. Vini munokum tatə Zaŋ sawɓa.

²⁸Adak na mərbə zəga na ma henziŋ tayi, apprəmək wəbay ma nani, awlak Zezu azlan sitik Sadusiyenɗe lelew sawɓa. Vi vaski azar azan assohoni amna: Ma henziŋ na Maŋgəlva awani day di?

²⁹Zezu azlan sənəka: Aŋki ma henziŋ an dəday pakə: Apprəma Israyel. Maŋgəlva Ɗəfdaya takayi.

³⁰Aŋglu Maŋgəlva Ɗəfdaya nok də makrok pakə, də ma genegenok pakə, də əmpəs nok pak də gurom nok pakə.

³¹Apprəm ma henziŋ an ma sula'ən: Aŋglu megok va kəŋglu zuko. Ma henziŋ na Maŋgəlva tay dəday kiyit es ɓa.

³²Məsəŋ zəga na ma henziŋ apsən Zezu na: Lewi. Mərbə zəga gesiŋgi kənahə. Ndəni Maŋgəlva taka maɓɓan tay ɓa, ndəni Maŋgəlva katər gən kaaka'ə.

³³Say dəŋglu də makrani də maɗulani də gurom nan pakə, də wəpəs nan pakə, dəŋglu meggeni. Va aŋglu ki zəni. Ndən mogon dayki wətaw wəla zəga mamaya atəki nawtawsən zəga də wəɗɗa sən sazlaga də an ɗəf adapsən Maŋgəlva pakə.

³⁴Zezu awlak ɗəf nak azlanək mogoni, anah sənəka: Faraɗɗa kənan də məlĩ na Maŋgəlva ɓa. Dərɓagani ko naway geslne armak də wəssohon wəssoh maɓɓani.

³⁵Pay Zezu adarban wən adəv gəla metiŋ naw zuliya*, assohko: Mbarmbari məsənaŋ zəga na ma henziŋ adawnəhaŋ na Messiya na Wətən Davitti* di?

³⁶Yaŋ Davit sən kiyən anahək də Əmpəs Salala* na: Ɗəfdaya anahsən Ɗəfdaya naw na: Asok aka va dəzəŋ nawa, nəvoŋgitigən məzuzelkun amba tulko.

³⁷Yaŋ Davit dəvan aya na Ɗəfdaya: Ya mbarmbari Messiya adaw san wətən əmpa di? Ɗii məkkelit diiɗa apprəmənək wəpel na Zezu də zit neki.

³⁸Yaŋ anah sit ɗii məs adarbansiti: Məga zukum səzet məsənaŋ zəga na ma henziŋ. Aŋglaŋgək wəbalaŋ dit lukutɗe zezekɗe. Aŋglaŋ ɗii disɗetin gən agilet lumiɗi.

³⁹Tay weleŋ təki naso mogon day pak adəv gəla nawpel wənnet Yahudiyenɗe, atəki nawzəma, tahəŋ wəkayaŋ təki mogon naso.

⁴⁰Tayəɗɗaŋ kuket aket gil net gəbayɗe, taŋ zəmən gəla neti, tayənziyaŋ diiɗa aka wəzuli neti vi ɗii dulenin gən va ɗii na Maŋgəlva. Warəhaŋ kita an tattuwãha.

⁴¹Yaŋ Zezu asan amaŋgava akoti napsən suleyɗe sən Maŋgəlva adəv gəla metiŋ naw zuliya*. Awlek ɗii dawɗiyaŋ suleyɗe adəv akoti. Məs aryeɗ diiɗa aɗiyaŋgək suleyɗe diiɗa.

⁴²Yaŋ guluk məs sahaŋ ga gəbay tədeke təɗiyək koɓeɗ sula, ndəɗaŋgəŋ avat kaaka'ə.

⁴³Zezu ayek gewleɗ nani, apsit na: Əntatə nah sukum, guluk na gəbay məs sahaŋ kəŋkə, təɗiyək suleyɗe adəv akoti daykiyit ɗii pakə.

⁴⁴Vi net aɗiyaŋgək suɗike səza arya metiŋgin neti, amma guluk kəŋkə ko məs sahaŋtə təpsənək Maŋgəlva pak ana zəm gən kita.