Read Gidar Markus 13 Bible Online

Markus 13 - Gidar bible

Markus 13

¹Adan Zezu agil sədəv gəla metiŋ naw zuliya, ɗəf taka səmbet gewleɗ nan anah sənəka: Mərbə zəga awla mbari gəlaŋ arkə mogon vaŋ dit gərmeŋgeŋ di.

²Zezu azlan sənəka: Kulak gəlaŋ mərkan metiŋgi nəŋ ɓa sa? Apəl na kuwən məzleɓin aka kuwən maɓɓan ɓa, məzu zeleŋ waɓzlunən pakə.

³Zezu asanək aka gərəm na hereme aba gəla metiŋ naw zuliya*. Piyer də Zak gəm Zaŋ gəm Andre ndəɗaŋ katirgit asoŋguk də Zezu assohonənka:

⁴Anah səm ɗa dewɗe zigeɗis adaɗɗaŋ di? Mi narban səm pay nagrak net di?

⁵Zezu atəŋgək wərbansiti: Amna: Məzi zukum, vi adaw zokuməni.

⁶Vi ɗii diiɗa wazoŋ də iya nawa, wanəhaŋ na: Əntə Messiya*. Wazetin ɗii diiɗa.

⁷An kəpprəmənək halabara nawgay gu'o ko faraɗa, kədaw geslne'eŋ ɓa. Aslək dəgəɗgən vaska, amma wəgrak dəlvi tagay ɓa.

⁸Ɗii meɓɓet wagayaŋ dit ɗii meɓɓeti. Məlĩ maɓɓan wakayaŋ mama məlĩ maɓɓani, dəlva fuŋ waɓəl atəki temtem may bo wagəɗə. Ndəni va daway nawa adasat ɗakə.

⁹Məsla zukum, vi warmukuməni, wakukumən aba kita wargukuməni adəv gəla nakkal net Yahudiyenɗe. Waziw gukumən abet ɗii gugiriɗ dit məlĩyeŋge vi iya nawa, kəɗɗaŋ gən saydawa abeti.

¹⁰Say ɗii namba dələv dəpprəmən gən wəpel Wən Nenek pak tagay.

¹¹Warmukuməni, wakukumən abet mətawaŋ kita, kədaɗumoŋ an məs kədawpeleŋ ɓa. Amma an pay nan agapka. Məpel wəpel an məs kərəhaŋ, wəpel nan agil na sə mokum ɓa, amma səza Əmpəs na Maŋgəlva adazani.

¹²Ɗii wapsitin milmiŋgiɗit vi kawbayti, affiŋgiɗit kirin bo vas adaɗɗaŋ. Kirin wasilyoŋ aket migilti, vi kawbeyti.

¹³Ɗii namba dələv pak wazelkuməni viwa. Amma ɗəf an dədawgan ha aza wəgraka wakohu.

¹⁴Akulanən an məs adawnahaŋ na mbrayeni daryawi, naw geslne səni, tay ziwe atəki məs dəslə dəziw gən ɓa. (Ɗəf an məs dəŋɗani, say dəpprəman lew lewi.) Asna ɗiiyen naka dələv na Zude say dənzoŋ gən aket gərmeŋge.

¹⁵Ɗəffan naka balakə, adawpriken eŋgil vi kawnda zigeɗ nan ɓa.

¹⁶Ɗəf məs na guliyo adawmilyan eŋgil kaw gəm lukut nan ɓa.

¹⁷Tuwãhi viyit gil dədawayɗe gəm məzuweɗ gitin kirin pay nani.

¹⁸Məkaman Maŋgəlva vi pay nan adawsan pay na səmnya ɓa.

¹⁹Vi pay nani, wagəɗ tuwãh diiɗa, daga Maŋgəlva aɗɗa təki a disiŋ də dəlva fuŋ dəgəɗ ɗaah vas ɓa ha dəpaŋka, agəɗ na ɗaah sə dəbərən ɓa bo.

²⁰Amma Ɗəfdaya waduduɗukon pay nani viyit ɗii nan məwelti, va vi vaski ɓa, ko ɗəf taka akoh na ɓa.

²¹Pay nani, an ɗəf anah sukumək na: Messiya* tayaŋka, walla taya da, kəltafnən ɓa.

²²Vi Messiyeɗ məwaŋ wənna dit məs kleŋɗe məwaŋ wən wazoŋ, waɗɗaŋ sokeneɗ, vi kawzet ɗiiyen na Maŋgəlva aweli, va waɓapəni.

²³Say kəslanən gən zukum vi nənah sukumək dabəŋ.

²⁴Pay nan dərɓaga bonoyi naka, pay wasərətə, təla akasak na ɓa.

²⁵Ngərzleɗ na disiŋ wabətaŋ, sembeɗ na disiŋ pak waɓlaŋ.

²⁶Asna kawlani Wətən Ɗəf dazan aka slay buwən a disiŋ də sembe diiɗa də gakdaka.

²⁷Asna waslən maslayɗe nan amba tapaslay pay poɗo pak vi kakelet ɗii məs awel səmba tapaslay pay poɗo pakə.

²⁸Məpprəman wənna sukoyo adarban sukum: An kiva sukoyo askəka, gaslamba nan bo andəfka, kəsəŋnənək bo mənzi go'oyi.

²⁹Vaski nokum bo, an kulanənək zigeɗis pak tahəŋ wəɗɗaŋ vaska, məsənna, go'oy aza wəzani.

³⁰Gesiŋ nədawnah sukum: Ɗiiyen mederet kakaŋka amtaŋ na zam sa zigeɗis dəɗaŋgən ɓa.

³¹Disiŋ də dəlva fuŋ pak wagrakaŋ amma wəpel naw agrak na ɓa.

³²Ɗef tay dəsən pay adazan ɓa walla wənziya na pay nan ɓa. Ko maslayɗe na disiŋ, ko Wətən Ɗəffa*, say Affən kaaka dəsəna.

³³Məsla zukum, kədawleŋgeŋ ɓa vi kəsənən pay nan adaɗɗa ɓa.

³⁴Wagəɗ va ɗəf adadan malaka, apanək gəla nani, apanək wəza nan avet məɗɗaŋ wəza, ko naway pak apsənək wəza nani, anahsən məzuga memeŋle na aga.

³⁵Vi vaski məga vi kəsənən pay affən gəla adazan ɓa, kuzuŋ moskoyo, kuzuŋ tətaŋ dəfɗa, kuzuŋ aba pumpum, kuzuŋ də mompumi.

³⁶An adek va mamal na adazan wərəhkum məleŋkum ɓa.

³⁷An məs nənah sukumeŋka, wanənah sit ɗii pakə: Məga.