Read Gidar Markus 15 Bible Online

Markus 15 - Gidar bible

Markus 15

¹Adan təki adaŋgə, ɗii dayaɗe net məs dəlveŋge na Maŋgəlva, dit ɗii gugiriɗ na dəlva dit məsənaŋ zəga na ma henziŋ, gəm məzaɓaŋ wənna, aslerinik met pakə. Aɓrukunək Zezu, akanənka, apsənənək ava Pilatu.

²Nan bo assohonək Zezu: Əstə məlĩ net Yahudiyenɗe sa? Zezu azlan sənəka va kənahə.

³Dayaɗe net məs dəlveŋge na Maŋgəlva, awəliyinək Zezu də wən temtemi.

⁴Yaŋ Pilatu assohon man əmpa na: Kawzlan ɓa sa? Kapprəmən va adawəlikun də wən temtem məŋ ɓa sa?

⁵Amma Zezu dəŋgəm wəpel ɓa, Pilatu bo asanək gərəŋgə.

⁶Pay wəzləra na Paska* agəɗ pak Pilatu tay əpan sit ɗii ɗəf taka məs aŋglaŋ sə daŋgay.

⁷Dəpasna ɗəf taya daŋgay iya nan na Barabbas. Ndəni dit ɗii meɓɓeti aɗɗaŋgək wənna, abayaŋgək ɗəffa pay adawsil gənən wənna.

⁸Yaŋ, ɗii atəŋgaŋ wəɗi geŋgere, anahsənən Pilatu na aɗɗasəm va laŋka.

⁹Pilatu apsit na: Kəŋglaŋ nəppan sukum gən məlĩ net Yahudiyenɗe sa?

¹⁰Asənka daya net mətawaŋ wəla zəga sən Maŋgəlva akansənən Zezu na vi kotoroki.

¹¹Amma dayaɗe net məs dəlveŋge na Maŋgəlva araketinik ɗiiyi məŋglu dəpan səm gən Barabbas.

¹²Pilatu anah sitik ɗii məkkelit əmpa na: Mi nədaɗɗa də ɗəf məs adawyaŋ na məlĩ net Yahudiyenɗe di?

¹³Aɗiyaŋgək geŋgere: Alaw aka wəlaŋga məzliwrihe!

¹⁴Pilatu assohotike: Mbrayen mi agəɗ di? Amma aɗiyaŋgək geŋgere dayki laŋka: Alaw aka məzliwrihe!

¹⁵Pilatu aŋgələk wəɗɗa an neneken zit ɗiiyi. Vi ni apansit Barabbas. Amma aɗiyək wənnani avərənək Zezu, apsitik Zezu aveti, dəkpa' nəŋgəni aka wəlaŋga məzliwrihe.

¹⁶Yaŋ sozeɗ akanənək Zezu eŋgil ana Pilatu da, ayeninik sozeɗ pakə.

¹⁷Aguloŋ sənənək lukut peppreŋge, atroɗinik gedirgeɗi ka mətər kiya, aɗupsənənək akani.

¹⁸Yaŋ kan asɗanəni: Usɗoko məlĩ net Yahudiyenɗe?

¹⁹Arganənək aza kiyən də zleŋge, atufinik mifɗe akani, akdukoŋguk abani aɓe'eŋ sənənka.

²⁰Adan agrakən wənəh wənna zani, agbukunək lukut peppreŋ naka, agul sənənək lukut nani. Yaŋ akanən ama poho vi kawlawən aka wəlaŋga məzliwrihe.

²¹Adan ambataŋ aka tive na, almaŋ sənənək ɗəf na Siriya iya nan na Simoŋ, affən Aleksandər də Rufus, nan bo tayəzan sə gulyo. Yaŋ sozeɗ aɗɗaŋ sənənək dewle dəslan gən wəlaŋga məzliwrihe səka Zezu.

²²Akanənək Zezu atəki məs adawyaŋ na Golgata (va wənah na bəbər kiya).

²³Aŋglaŋ wəpsənən biya məslahan də an tatraha dəsaa gəni, amma Zezu dəŋgəm wəsan ɓa.

²⁴Yaŋ akpanən aka wəlaŋga məzliwrihe, awɗeketinik lukutɗe nani, askaŋgək saasa aka lukut nan məza wərma taya zan ɓa, kuzuŋ naway dədaw zəmən.

²⁵Dəpasna ler vaytaki, də mompumoyi akpanən aka wəlaŋga məzliwrihe.

²⁶Averinik wənna kita nan aka papalam vaska: Məlĩ net Yahudiyenɗe.

²⁷Akpa'inik ɗii sula məvoŋgoŋ tive aket wəleŋɗe məzliwrihe amaŋgava Zezu, maɓɓan aka van dəzəŋ, maɓɓan aka van zlaɓay.

²⁸[Agəɗ vasna vi an məverin adəv ɗerewel dəgrak gəni amna: Məŋɗani aweleŋgit ɗii mbrayti.]

²⁹Ɗii məzu toŋgoŋ dədak aɓlanənək kiti, aranənka: Aɓɗaŋ na: Is naɓzlu gəla metiŋ naw zuliya*, karkan pay hoku,

³⁰akoh gən zuk kana. An Wətən Maŋgəlva* kənani aprik səka wəlaŋga məzliwriheŋka.

³¹Vaski bo dayaɗe net məs dəlveŋge na Maŋgəlva dit məsənaŋ zəga na ma henziŋ, anahaŋ wənna aza Zezu, awkohgitik ɗii meɓɓeti, aɓapna wəkoh gən zən ɓa sa?

³²Say an mulak Messiya* məlĩ net Israyelɗe tay priken səka wəlaŋga məzliwrihe, asna wamətafa. Ɗəffan məkpa'ən də Zezu aka wəlaŋga məzliwrihe nak pak aranək Zezu.

³³Daga pay ziwi, guzli titir agəɗək aka dəlva pak ha gap ler hoku moskoyo.

³⁴Də təbəs hoku Zezu aɗiyək geŋger diya diya: Eloy, Eloy, lema sabaktani. (Va wənah na: Aw Maŋgəlva nawa, aw Maŋgəlva nawa, vi mi kəpaw di?)

³⁵Ɗii en də ziweŋ adaka, adan apprəməni, aɓɗaŋ na: Məpprəma tay iya məs kleŋ Eliyas!

³⁶Ɗəf maɓɓan anzanək də kakara, aguluk gizlete ara zlərga asləkək ama ngava. Yaŋ atəl sən Zezu dəsaa gəni, amna: Tagay mula səmə kuzuŋ Eliyas wade wəpri gən səka wəlaŋga məzliwrihe sokoh.

³⁷Amma Zezu aŋgəzlək vamvəl metiŋgin ndən man bayə.

³⁸Gabaga məs mətawan gədəv gəla metiŋ na zuli aŋgarək səka dədakan sek sula daga sə disiŋ ha afuŋ.

³⁹Ɗəfdaya net sozeɗ na Roma awlak va Zezu amtə aka wəlaŋga məzliwrihe, amna: Ɗəffəŋka Wətən Maŋgəlvayi* gesiŋ.

⁴⁰Gil meɓɓet tahəŋ adaka tahəŋ ulanən səka faraɗa. Suwaleŋgit bo ndəɗaŋgəŋ Mari daga sə Makdala, dət Mari ma Zak muzliya də Zozes gəm Salome.

⁴¹Asbanənək Zezu daga asan a Galile tahəŋ wəɗɗaŋ sənən wəza. Gil meɓɓet tahəŋ diiɗa məs dəpeŋgeŋ dəndən a Zerusalem.

⁴²Pay nani moskoyi, ndəni nawzaɓan zəga, va wənah na: Dabəŋ ki pay naffete*.

⁴³Zozef nawalaŋ gəla metiŋ na Arimatiya, adeke. Ɗəf metiŋgi də gakdaki aweleŋgit məzaɓaŋ wənna. Nan bo tay ga məlĩ na Maŋgəlva. Armak makrani, aguluk aza Pilatu assohonək gəbay na Zezu.

⁴⁴Pilatu bo agətək sawɓa: Mbari Zezu amtə gu vas di. Ayak ɗəfdaya net sozeɗi, assohonəka: Far amtə sa?

⁴⁵Adan ɗəfdaya net sozeɗ anahsən labara namta nani, Pilatu apsənək tive sən Zozef dəslan gən gəbay na Zezu.

⁴⁶Zozef albahək boɗoko kukuɗo apri gənək gəbay na Zezu səka wəlaŋga məzliwrihe, atərək də boɗoko naka, avoŋgunək adəv ma gamas məs məssoho'ən adəv məlɓe. Yaŋ akəɗəŋgəl gərəm metiŋgin ama vovu.

⁴⁷Mari daga sə Makdala dət Mari ma Zozes aziweŋgək aki məndək Zezu.