Read Gidar Markus 2 Bible Online

Markus 2 - Gidar bible

Markus 2

¹Dərɓaga wəvoŋ suɗike, Zezu amndanək a Kafarnahum. Ɗii apprəmənək na tay eŋgili.

²Ɗii akkalaŋka azani ko təki dəmbər ɓa, də memeŋle pakə. Yaŋ Zezu arban sit zəga.

³Yaŋ ɗii meɓɓet azoŋ, aki sənən ɗəf məs gbəgba' məɗeŋgreŋ sən Zezu, ɗii poɗo də slanənni.

⁴Dərəhaŋ wəgap gən aza Zezu ɓa vi ɗii tahəŋ diiɗa. Vi vaski abətən ki gəla atəki məs Zezu asani. Yaŋ apriginin məs gbəgba' məɗeŋgreŋ nak məvoŋ gən aka hargaŋgu nan də helege, aɗiyənək aba Zezu.

⁵Adan Zezu awla wətaf neti, apsən məs gbəgba' məɗeŋgreŋ na: Wətuwa, mambray nok avika.

⁶Məsənaŋ zəga na ma henziŋ tahəŋ adak ɗew ɗewi, yaŋ aɗumoŋ a mekret na:

⁷Vi mi ɗəffəŋ adawpel mbrayen vaŋ ka Maŋgəlva di? Naway nawɓap wəviyan mambray di, an Maŋgəlvayi katər gən ɓa di?

⁸Zezu asənək wəɗum na mekreti. Assohetike: Vi mi kədaɗumoŋ a mokrokum vas di?

⁹Awani məza tay tuwãh ɓa di, wənahsən məs gbəgba' məɗeŋgreŋ na: Mambray nok avika sa, walla wənahsən na: Asili, aslan zəga nawvoŋ noko doko?

¹⁰Amma nəŋgəl na kəsənən gən na Wətən Ɗəf* tay də sembe aka dələv na viyan mambraya. Yaŋ apsən məs gbəgba' məɗeŋgreŋ na:

¹¹Əntat ənah suko: Asili, aslan zəga nawvoŋ nok doko.

¹²Kakaŋkani asilke, slanək zəga nawvoŋ nani, ambatək keret pakə, agətaŋgək sawɓa, agakdakanənək Maŋgəlva aɓɗaŋ na: Mul ɗaah zev zəga vaŋ ɓa.

¹³Zezu ambatək əmpa, kəla ma pe'e na Galile. Ɗii diiɗa azoŋguk azani, arban sitik zəga.

¹⁴Adan adasban tive, awlak Lewi wətən Alfe tay ɗewwe adəv gəla na duwan. Apsən na: Asbawa. Lewi asilke, asbanəka.

¹⁵Yaŋ Zezu asan ana Lewi da vi kawzəma. Yaŋ duwenɗe diiɗa dit məs mambrayɗe asuwaŋgək kawzəm də Zezu dit gewleɗ nan pakə.

¹⁶Adan məsənaŋ zəga na ma henziŋ dit Farisiyenɗe* awlanən dawzəm dit duwenɗe gəm məs mambrayɗe, assohetinik gewleɗ na Zezu: Vi mi adaw zəm dit duwenɗe may dit məs mambrayɗe di?

¹⁷Adan Zezu apprəm vaska, apsit na: Ɗiiyen də zam na zit na, wəray net tay naŋgla zloktor ɓa. Say məs gbəgbaɗe. Nəde vi kawye ɗiiyen salala ɓa, say ɗii məs mbreyiti.

¹⁸Yaŋ pay mbərən gewleɗ na Zaŋ məgəɗ baptem dit Farisiyenɗe* tahəŋ wəsee'eŋ meme. Yaŋ ɗii azoŋ, assohonən Zezu: Vi mi gewleɗ na Zaŋ məgəɗ baptem dit Farisiyenɗe adawsee'eŋ meme, amma gewleɗ nok asee'eŋ meme ɓa di?

¹⁹Zezu azlansitike: Ɗii məyet atəki wəɓel wasee'eŋ meme an məzu ɓel tay dənɗaŋ sa? Agəɗ na ɓa sam. Aɓapaŋ na wəsee meme an tay dənɗaŋ ɓa.

²⁰Pay maɓɓan wade məzu ɓel wambat səzeti, asna pay nani wasee'eŋ meme.

²¹Ɗəf aɗisəna lukut məsvan də gabaga meleketen ɓa, vi gabaga an məɗisənəŋ waŋgar lukut məsvani wəŋgar nan bo waday ki an laŋka.

²²Vi vaski bo, ɗəf aɓapna kawzi biya məza dəhəs ɓa adəv konekoneɗ məsvet ɓa, vi biya waŋger konekoneɗ dawhəssa, warayaŋ biya nan bo wambat afuŋ. Amma ɗəɗaah wəzi biya məza dəhəs ɓa adəv konekoneɗ meleketeti.

²³Yaŋ pay naffet na Zezu atoŋguk kla dəv guli na alkamari (zev hay neti) dit gewleɗ nani. Adan adawmbataŋ, gewleɗ nan anzlaŋkiyən taka taka.

²⁴Vi vaski Farisiyenɗe* assohonən Zezu: Vi mi gewleɗ nok adaɗɗaŋ wəza an dəslə naɗɗa pay naffet ɓa di?

²⁵Zezu azlansitike: Kəŋɗanən ɗaah an məs Davit agəɗ gala maay adaa ɓa sa, tay də zəga nawzəm ɓa, ndəni dit ɗii nan pak ɓa sa?

²⁶Atoŋguk adəv gəla na Maŋgəlva, azəmik dupeŋɗe məs məɗiyit vi wəza na Maŋgəlva. Abiyatari daya net məs dəlveŋge na Maŋgəlva pay nani, mətawaŋ wəla zəga sən Maŋgəlva həŋ ma henziŋ apsit tive nawzəm dupeŋɗe net kaaka'ə. Amma Davit azimike, apsitik ɗii nani.

²⁷Yaŋ Zezu anah na: Pay naffet tay vi kawtər wəray sən ɗəffa. Məɗɗani ɗəf vi pay naffet ɓa.

²⁸Vi vaski Wətən Ɗəffi* affən pay naffete.