Read Gidar Markus 4 Bible Online

Markus 4 - Gidar bible

Markus 4

¹Zezu atəŋkə yeget ɗii əmpa ama pe'e na Galile. Ɗii diiɗa azoŋko azani. Vi ni atoŋ adəv bəlay, asanka daka. Bəlay bo taya ket iŋkile a pe'e, ɗii bo tahəŋ ama busgum.

²Ayagen sitik zəga diiɗa dəwən məkpaŋga. Yaŋkan adəv wən adayagan sit nak kan na anah sit na:

³Məpprəma! Məzənse ambatka gulyo, vi kaw ndol haya.

⁴Adan adaw ndolni, zemve maɓɓan abətək aka tive, ɓiŋgeɗ azoŋko ayaɗ nənka.

⁵Zemve maɓɓan abətək aka soyomo, dələv taya kan ɓa. Go'ləŋgə agilke, vi dələv taya mban ɓa.

⁶Adan pay agili, azlaka, aɓətka, vi dərah təki nampa siwerin ɓa.

⁷Zemve maɓɓan əmpa abətək awalaŋ hogoy, aɓayaŋgək dəndən pakə, azəm gənək saka.

⁸Amma zemve maɓɓan abətək kəmpa aka ba'arə, agilke, aɓayka, aɗiyək aran sawɓa. Maɓɓan kaklaw hoku, maɓɓan kaklaw slire, maɓɓan səkatə.

⁹Yaŋ Zezu anah sit kana: Ɗəffan də sləman napprəma say dəpprəma.

¹⁰Dərɓaga wənnəska Zezu tay katər gəni, ɗii meɓɓeti dit gewleɗ nan klaw kiyit sula, assohonənək Zezu aka wən məkpaŋga naka.

¹¹Zezu azlansitike: Nokum Maŋgəlva arban sukumək wən məɗama na məlĩ nani. Amma ɗii meɓɓeti, say də wən məkpaŋga adapprəmən wənnəs pakə.

¹²Vi vaski, Wawlanən də hereti, amma asənən na ɓa. Wapprəmən də sləmeti, amma apprəmanən na ɓa. Vi adaw milyoŋ aza Maŋgəlva ɓa Maŋgəlva bo adaviyan sit mambray net ɓa.

¹³Yaŋ Zezu apsit na: Kəpprəmənən wən makpaŋga nan ɓa sa? Ya an vaski na mbar kədapprəmən wən məkpaŋga an pak di?

¹⁴Məzəzlga tayəzlga wəpel na Maŋgəlva.

¹⁵Zemve an naka tive, ndəni ɗiiyen dəpprəmən wənna Maŋgəlva, go'ləŋ Satan adeke, agəmək wəpel an məzlgan sə məkreti.

¹⁶Ɗii meɓɓet bo tahəŋ va zemve məs dəbət aka soyomo. Adan apprəmən wəpel na Maŋgəlva, go'ləŋ atafənək də wəneken ziti.

¹⁷Amma wənna Maŋgəlva dəmpa siwerin amekret ɓa, wasoŋ pay suɗike, vi vaski an wən tattuwãh də wərmama asilik vi wənna Maŋgəlva, wapanən wənnan go'ləŋgə.

¹⁸Ɗii meɓɓeti tahəŋ va zemve dəbət awalaŋ hogoy. Net bo tahəŋ wəpprəmən wənna Maŋgəlva.

¹⁹Amma zəga nawsime, də zəga nawzəma, dəwərak na arya də suniɗ temtem watoŋ amekreti waray gən wəpel na Maŋgəlva wəpel na Maŋgəlva arana wənzləra amekret ɓa.

²⁰Ɗii meɓɓet tahəŋ va zemve dəbət aka dələv mogoni, tahəŋ wəpprəmən wəpel na Maŋgəlva, atafənka, wanzlər gənəni, meɓɓet kaklaw hoku, meɓɓet kaklaw slire, meɓɓet səkatə.

²¹Zezu apsit na: Ɗəf waki pitirla vi kawɗəp mosgoy akan sa, walla kawɗiyən amba hargaŋgu? Walla atəki naɗiyən adaɗiyəni?

²²Zəga an məɗama pak wasan appaka, wən məs məseske'ən pak wapprəm appaka.

²³Ɗəf an dəsləmani, say dəpprəma.

²⁴Zezu apsit əmpa na: Məzi zukum aza an məs kədapprəmaŋ. Wəsla an məs kədawslenin ɗiiyiŋki, dəni Maŋgəlva adawslumkum, wəslukum daykiyən neti.

²⁵Ɗəffan də zəga avani warah akan diiɗa, ɗəf məs tay də zəga ɓa kawtafəni ana van suɗike.

²⁶Zezu anah kəmpa: Məlĩ na Maŋgəlva tay va ɗəf məzundol zemve agulyo nanda.

²⁷Yaŋ adawleŋge afɗaahə, dəfəɗ də kapay zemve agilke, aɓayka, amma dəsən va aɓay ɓa.

²⁸Vi dəlva fuŋ waɗi hay aran katər gəni: Dabəŋ wapoku asna bu'um askana hay aɗika.

²⁹Ndəni kana hay aɓəlka, asna ɗəf wagəm slogoy nani kabəla vi mawala agəɗka.

³⁰Zezu amna: Də mi mədasla məlĩ na Maŋgəlva di? Də wən məkpaŋga awan mədaslan di?

³¹Aslək də zemve na sita (sita naka dələv neti) ndətə məzliyək daykiyit zemveɗe namba dələv pakə, an məslgəti.

³²Amma pay məslgəta, watəgili, watəɓay daykiyit zigeɗ məslget pak də gaslamba watəska kivat diiɗa ha biŋgeɗi nawra wazoŋ wəzaɓən gəla net ara zeŋgille na vata.

³³Zezu arbanək wən sit ɗii diiɗa də wən məkpaŋga vaska, arban sitik va adaɓapən wəpprəməni.

³⁴Amma dəpel də wən maɓɓan ɓa, say də wən məkpaŋga. Amma adan tay dit gewleɗ nan katirgiti, agil gən sitik wənnan pakə.

³⁵Moskoy nan dəpaska, Zezu apsit gewleɗ nan na: Mədaməs dəgar ki pe'e.

³⁶Appetinik ɗii məkkelti, gewleɗ nan aguloŋguk adəv bəlay məs Zezu asani. Bəlayɗe meɓɓet tahəŋ amaŋgavani.

³⁷Barkateŋɗe asilyeŋgək də sembe, vovolumɗe aslkərənək bəlay, ha bəlay aknahək dit iŋkile.

³⁸Zezu tay məleŋgin aza gabba bəlay dərɓe, aɗiyək kiyən aka antoŋ. Gewleɗ nan afɗaahanənka, yaŋ apsənən na: Mərbə zəga kaɗumən na wəza mədaza ɓa sa?

³⁹Zezu asilke ahayanək barkataŋ amna: Aɓətə, barkataŋ aɓətka, yaŋ zəga pak sləɓək agəɗə.

⁴⁰Yaŋ Zezu apsit gewleɗ nan na: Vi midəray kədaw geslne'eŋ vaŋ di? Vi mi munokum tat də wətaf ɓa di?

⁴¹Ageslne'eŋgək sawɓa, yaŋ anahaŋ awalaŋ zit na: Aŋ ɗəf miyaŋ di, ko barkataŋ də pe'e pak wəpprəmən manəŋ di?