Read Gidar Markus 5 Bible Online

Markus 5 - Gidar bible

Markus 5

¹Yaŋ Zezu ade dit gewleɗ nan bal sən pe'e na Galile, aka dələv net Geresiyenɗe.

²Adan Zezu agil sədəv bəlay, ɗəf mitemin agilik sədəvət magamasɗe.

³Təki naswa nani adəvit magamasɗe, ɗəf tay nawɓapən wərman kaynan ɓa ko də dit ngiyamɗe ɓa.

⁴Təl ɓəɓɓay ɗii adaynanən dit ngiyamɗe gəm dit salalawɗe aza vani, amma aɓuhuk salalawɗe, anzletik ngiyamɗe sə za təlni. Ko ɗəf taka tay dədawɓap wəziwgən ɓa.

⁵Dəfəɗ də kapay pak taya əbbal a divit magamasɗe, də aket gərmeŋge, tay ɗi giŋgere də wəntar zən dit ɗoroɗi.

⁶Amma adan awla Zezu səka faraɗa, adek də wənzuwa akdukuk aba Zezu,

⁷aŋgəzlək vamvəl dayadaya: Is Zezu Wətən Maŋgəlva* an də gakdaka, məsok də in di? Əntatə komoko, də wiya na Maŋgəlva, kədawzəm gəm saha ɓa.

⁸Anah vas na vi Zezu anahsəna: Witeme agil səka ɗəffəŋka.

⁹Yaŋ Zezu assohon ɗəf naka: Mbarmbari iya nok di? Azlan sən Zezu na iya naw na ɗii məkkelit gboŋgu, vi diiɗa mənani.

¹⁰Akamanək Zezu, vi adarɓəh witemɗe səka dələv nan ɓa.

¹¹Amaŋgavet gərmeŋge vani ngaɓa net vedemɗe ta taɗɗa daka.

¹²Yaŋ witemɗe nek akamanən Zezu: Aslənəm azet vedemɗe vi məgul gən aketi.

¹³Zezu ambər sitik tive. Agulyoŋko, ambataŋgək azet vedemɗe aguloŋguk aketi. Ngaɓa arɓəslka, alotoŋguk sə mabusgum kpukpumo, abətaŋgək aret iŋkile a pe'e, vedemɗe pak azaŋgək aret iŋkile, vedemɗe vet waɗɗaŋ uzinere sula.

¹⁴Məzuteɗeŋɗe net vedemɗe, anzoŋko wəmbataŋ awalaŋ gəla, anahənək halabara nan pak sit ɗii dit ɗii na mapoho nani. Yaŋ ɗii agulyoŋ ambataŋ kawla zəga məs dəgəɗə.

¹⁵Adan agapaŋ aza Zezu, awlanənək ɗəf mitemin nak aguluk lukut azani, tay ɗewwe, maɗulan asəkika. Ageslne'eŋke.

¹⁶Ɗii məs dulanən pak anahsitinik an məs dəgəɗ aza ɗəf mitemin, də an məs dəgəɗ azet vedemɗe pakə.

¹⁷Yaŋ akamanən Zezu dəmbat gən səka dələv neti.

¹⁸Adan Zezu adawpeŋ adəv bəlay, ɗəf məs də witemɗe nak assohonək Zezu kambat dəndən.

¹⁹Zezu dəŋgəm ɓa, amma yaŋ Zezu apsən na: Amndok eŋgil anok da abay halabara nan pak azet ɗii nok pak an məs Ɗəfdaya awəl saha akoko.

²⁰Ɗəffəŋ ambatka atoŋguk aka dələv məs adawyaŋ na walaŋ gəleɗe klaw, anah sitik ɗii pak zəga an məs Zezu agəɗ səni ha ɗii pak agətaŋka.

²¹Zezu ateŋke adəv bəlay, agarək ki pe'e. Ɗii diiɗa akkalaŋka zani. Yaŋ Zezu aziw amet iŋkile.

²²Zayrus daya na gəla nakkal net Yahudiyenɗe. Adan awla Zezu akdukuk abani.

²³Akamanək Zezu diiɗa amna: Wətu tat də gbəgba'a gu'otə də əmta. Kamə ade aɗi vok akata atəmbələ, təsat gən madarata.

²⁴Zezu ambatək dənɗaŋ. Ɗii diiɗa asbanənək Zezu, tahəŋ wəhaslanənni.

²⁵Guluk tat də gbəgba' na zəlaha wəsva klaw kiyən sula.

²⁶Təmbatək azet ɗii məkayaŋ miha təzanək arya nat pakə. Amma ko dəɗaah tay səka gbəgba' nan ɓa, say wənzləra akani.

²⁷Adan təpprəm wənna Zezu: Təguluk aweleŋgit ɗiiyi, təziwik dərɓaga Zezu.

²⁸Vi təɗumək na: An nərahək wərəŋ gən lukut nan kaaka'ə, wənəmbələ.

²⁹Tərəŋ gənək lukut na Zezu, kakaŋkani wəzəlah nat appatəka, təsənək aza gəɓa zət na təmbələk səka gbəgba' nata.

³⁰Amma Zezu asənək ləŋ na sembe agilyoŋko səzani. Akpaŋganək haran aweleŋgit ɗiiyi amna: Naway dərəŋ gən lukut naw di?

³¹Gewleɗ nan azlananka: Istatə ule ɗii tahəŋ wəhaslakuni, vi mi kəda sohon na: Naway dərəŋgu di di?

³²Amma Zezu tayula amaŋgavani vi kawsən ɗəf dərəŋ gəni.

³³Guluk nak tətəŋgək wəkere sən geslne vi təsənək an məs dəgəɗ azata, təsənək na Zezu wasənta, tədeke təkdukuk amba təl Zezu tənahsənək goŋga na mat pakə.

³⁴Zezu apsət na: Wətuwa wətaf nok ambəl gukuko. Dok zamə, ambəl səka gbəgba' noko.

³⁵Daga Zezu dəɓəl wəgrak wəpel nan tagay ɓa, ɗii azoŋguk siŋgil anna Zayrus da. Apsənən na: Wətuk təmtəka, apan mərbə zəga kədayan ɓa.

³⁶Amma Zezu dəɗum aka wəpel məs adawpeleŋ ɓa. Apsən Zayrus na: Kədaw geslne ɓa, nok ataf kaaka'ə.

³⁷Zezu dəpəl ko ɗəf taka wəsban ɓa, say Piyer də Zak gəm Zaŋ, məlmən Zak.

³⁸Adan agapaŋ eŋgil ana daya na gəla nakkal net Yahudiyenɗe da, Zezu tayəpprəm geŋgere, ɗii tahəŋ wəhəmaŋ, də vamvəl daya daya.

³⁹Zezu atoŋguk eŋgili, apsit na: Vi mi kədaskaŋ morkoyo də wəhəm di? Waŋ təmtə ɓa, wəleŋ tədawleŋ ɗarə.

⁴⁰Ndəɗaŋ pak amasaŋgək akani. Vini Zezu agilgiti, yaŋ agəm affəta dət mata gəm gewleɗ nan hoku neki, atoŋgoŋguk atəki waŋ təsata.

⁴¹Armak vata, apsət na: Talita kumi, (va wənah na wakə əntatə nah suko asili).

⁴²Kakaŋkani waŋ təsilke, wəsva nat klaw kiyən sulayi, agətaŋgək sawɓa.

⁴³Zezu abayək meti adawnahaŋ sənən ko nawa ɓa. Yaŋ anahsiti: Məpsət zəga nawzəm suɗike.