Read Gidar Markus 7 Bible Online

Markus 7 - Gidar bible

Markus 7

¹Farisiyenɗe* dit məsənaŋ zəga na ma henziŋ meɓɓeti, azoŋguk sə Zerusalem aza Zezu.

²Awleninik gewleɗi na Zezu meɓɓet tahəŋ wəzəmaŋ way məzawɗa vet ɓa, va an arbanən sitin ɗii ɓa.

³Farisiyenɗe pak dit Yahudiyenɗe tahəŋ wəsbanən wərba annet dəhiŋgiɗti, an wazəmaŋ way na say vet heɗesa lewlewi.

⁴An azoŋguk sə lumo, azəmaŋ na way tagay ɓa say an aslayaŋgək tagay. Matuya tay temtem diiɗa məs atafaŋ nasbani: Wəɗet hilŋgiɗ dit gəɓet mesteɓeɗi, dit taseɗ na təbəs peppreŋge, gəm ɓərzlimeɗi.

⁵Vini Farisiyenɗe dit məsənaŋ zəga na ma henziŋ, assohonən Zezu: Vi mi gewleɗ nok asbanən zəga narba annet dəhiŋgiɗəm ɓa, adawzəmaŋ məzawɗa vet ɓaŋ di?

⁶Zezu azlansitike: Ezay aɗɗa sukumək kleŋ na gesiŋgi. Munokum mə ɗarɗarɗe, va məverin na: Maŋgəlva amna: Ɗiiyiŋki tahəŋ wəgakdakawən də met ɗarə, amma makret na faraɗay səzawa.

⁷Wəzuliyəŋ məs adawzuliyaŋ suwənnəŋ na ɗari, yaŋ adarbanən ma henziŋ məs ɗii adaɗɗaŋ, va ma henziŋ na Maŋgəlva.

⁸Zezu apsit na: Yaŋ kəpanən ma henziŋ na Maŋgəlva, vi kasban ma henziŋ net ɗiiyi.

⁹Yaŋ Zezu anah sit əmpa na: Mi di, kəsənnənək wəɓon sən ma henziŋ na Maŋgəlva, vi kasban wəɗum nokum.

¹⁰Moyis amna: Agakdakan affuko dət moko, ko naway dəran affəni dət mani, say wəbayin.

¹¹Amma munokum tatərbanən na: An ɗəf anah sənək affəni walla mani: An məs nərah səra zəga naw nabah suko, korban (va wənah na nəpsənək sən Maŋgəlva).

¹²Kəŋgereŋ na wəpəl sən tive sən ɗəf dəbaah sən gən affən walla sət man ɓa.

¹³Də wən nokum vaski kan kədawray gənən əpel na Maŋgəlva dəwəɗum nokum məs kədarbaŋ awalaŋ zukum. Gəm zəga tay diiɗa kədaɗɗaŋ va ndəni.

¹⁴Zezu ayek ɗii əmpa apsit na: Məpprəm su munokum pak ɗa, məpak sləmokum amban lewlewi.

¹⁵Ko mi dəgul adəv ɗəffa sə gisbe aɓapna kawray gən ɗəf ɓa, say zəga məzu gilyan sə makra ɗəffa, ndəni dədawray gəni.

¹⁶[An ɗəf tay də sləman napprəma, say dəpprəm lewlewi.]

¹⁷Yaŋ Zezu awɗak dit ɗiiyi aguluk eŋgili, gewleɗ nan assohonənka, mbarmbari kəŋgəl wənah də wən məkpaŋga nan di?

¹⁸Zezu anahsitike: Nokum bo kəsənən ɓa'a sa? Kəpprəmən ɓa sa? Zəga məs dadawgul adəv ɗəffa daga sə gisbe pakə, aɓapna kawray gən ɗəf ɓa,

¹⁹vi agul na amakra ɗəf ɓa, amma adəvən adawtoŋgo, asna agil na agisbe də tive nan ɓa sa? Zezu anah vas na, vi zəga nawzəm pak dəsan gən mogoni.

²⁰Yaŋ anah əmpa na: Zəga məzu gilyan sə makra ɗəffa ndəni dədawray gən ɗəffa.

²¹Vi daga sə dəvən sə makra ɗəffa wəɗum mbrayen adawgilyani, adawka ɗəf yokyoku, wəhala, wəbay gəbaya.

²²Wəɗɗa mana'a, də wəsim zəga, mambraya, tepelkeɗi, wəŋgla mbrayen, kotoroku, wəra ɗəffa, wəɓay gən ki zuko, də dərwa.

²³Zigeɗis pak sədəv ɗəf adawgilyoŋgu, ndəɗaŋ dədawray gənən ɗəffa.

²⁴Adan Zezu asil sədaka, ambatək aka dələv amaŋgava gəla metiŋ na Tirus. Aguluk eŋgil ana ɗəfda, dəŋgəl ɗii dəsənnən gən ɓa. Amma dəɓap wəɗam ɓa.

²⁵Ɗak məs wətət mitemta, təpprəmək halabara na Zezu: Tədek də kakara azani, təkdukuk abani.

²⁶Guluk vat na Grekəktə daga sə Finikiya dələv na Siriya. Təkamanək Zezu vi dərɓahan gən witem səkat wətəta.

²⁷Amma yaŋ Zezu azlan sət na: Apet kirin dəbaŋ tagay, tay lew wəgəm way net kirin kapsit kirɗe ɓa.

²⁸Guluk nak təpsən na: Vaski mərbə zəga, kirɗe wefekeŋ məs dədaw bəta səmba vet kirni.

²⁹Zezu apsit na: Vi wənna wəzlan məs kəzlani, doko witem wapat wətuko.

³⁰Yaŋ timil eŋgil annat da, tərətək wətət tat ɗuffo aka zəga nafna, witem appatəka.

³¹Yaŋ Zezu agil sə Tirus, atoŋguk klaka dələv na Sidon amilik kla ma pe'e na Galile atoŋguk klawalaŋ gəleɗe klaw.

³²Ɗii akisənənək goryom məza apel kotak ɓa. Akkamanənək də ɗi gən van akani.

³³Zezu agil gənək suweleŋgit ɗiiyi, aziwginik katər gəni, aguluk pərəm van aslmani, atufuk mefɗe arəŋ gənək hərzləməni.

³⁴Yaŋ aɗi haran a disiŋ, anɗəska anahsənək ɗəf naka. (Effata va wənah na akolu.)

³⁵Kakaŋkani sləman akolko, hərzləmən məs dərəm nak apəlka, apelik kotakə.

³⁶Zezu asəɓ sitik pak adawnahaŋ sənən ko naway di ɓa. Amma də asəɓ sit pak zlaŋ na, annəhənək wənnan diiɗa.

³⁷Ɗii agətaŋgək diiɗa aɓɗaŋ na: An məs adaɗɗa pak mogoni. Yaŋ aɗɗa goryomɗe wəpprəmaŋ ɗii məs hərzlimit mərman apeleŋke.