Read Gidar Markus 8 Bible Online

Markus 8 - Gidar bible

Markus 8

¹Pay nani ɗii diiɗa akkalaŋka, vas bo zəga nawzəm taya vet ɓa, Zezu ayek gewleɗ nani, apsit na:

²Nulak səsahit ɗiiyiŋki, vi tahəŋ də in pay hoku, tahəŋ də zəga nawzəm ɓa.

³An nənah sitik na mədoŋgu, nəpsit wəzəm ɓa, wadakaŋ aka tive, vi ɗii meɓɓet sə faraɗa azoŋgu.

⁴Gewleɗ nan azlan sənənka: Aŋga ɗəf adawrəh zəga nawzəm nawbet ɗii awraŋ di?

⁵Zezu assohotike: Dupeŋɗe mbarwaŋ avokum di? Azlan sənənək na: Buhulləŋ.

⁶Yaŋ Zezu anah sit ɗii na, məsoŋ afuŋ. Yaŋ agəm dupeŋɗe neki agəɗ sənək soko sən Maŋgəlva, arɗetike apsitik gewleɗ nani vi duɗeket sitin gən ɗiiyi, gewleɗ awɗeketinik sit ɗiiyi.

⁷Kilif memeɗeŋɗe tahəŋ avet suɗike. Zezu agəɗək soko sən Maŋgəlva aket kilfi anah sit gewleɗ na muɗek sit ɗiiyi.

⁸Ndəɗaŋ pak aziminke, abaŋka. Gewleɗ akalanənək dambirgiti, aknahək keŋkelɗe buhul.

⁹Ɗii məs dəzəmaŋ tahəŋ va uzinere poɗo. Yaŋ Zezu anah sit kana mədoŋgu.

¹⁰Go'ləŋgə Zezu aguluk adəv bəlay dit gewleɗ nani, alək aka dələv na Dalmanuta.

¹¹Farisiyenɗe azoŋko atəŋgaŋgək wəbay ma də Zezu. Azaɗaŋgək mazaɗ abani, yaŋ assohonən dəgəɗ siti gən sokene, vi dəsənən gənna sembe nan səza Maŋgəlva ade.

¹²Zezu anɗəsək diiɗa amna: Vi mi ɗiiyeŋ kakaŋkiŋ adassohoŋ sokene di? Gesiŋ nədawnah sukum, arəhaŋ na sokene ɓa sam.

¹³Azarək sə zeti, amilik adəv bəlay agarək ki məlpa dədaka.

¹⁴Gewleɗ na Zezu asgətaŋgək daw gəm zəga nawzəm aveti say dupeŋ taka adəv bəlay neti.

¹⁵Zezu asəɓ sitike, amna: Məzi zukum aza wuɗo net Farisiyenɗe də məlĩ Herodə.

¹⁶Gewleɗ aseske'eŋgək awalaŋ ziti, adawpel vasna vi dupeŋɗe tahəŋ avam ɓayi.

¹⁷Zezu asənək məs adawpeleŋ awalaŋ ziti, assohotike: Vi mi kədaw seske'eŋ awalaŋ zukum di? Vi munokum tat dit dupeŋɗe ɓa yi sa? Kəsənən ɓa'a sa? Ha kakaŋka makrokum ɓəl sa?

¹⁸Munokum tat də horokum ya kawlaŋ ɓa sa? Munokum tat də sləmokum ya kapprəmaŋ ɓa sa?

¹⁹Kaɗumonən də wənnet dupeŋɗe sle nuɗak sit ɗii uzinere sle, keŋkelɗe mbarwa kəknahaŋ də an diyo di? Klaw kiyit sula anahaŋgə.

²⁰Ya dupeŋɗe buhul nuɗakan sit ɗii uzinere poɗo nak na, keŋkelɗe mbarwa aknahaŋ də an diyo di? Azlan sənənək na: Buhulli.

²¹Yaŋ anah sit na: Ya kapprəmənən ɓa'a sa?

²²Yaŋ agapaŋ a Baytisayda, adaki ɗii akiyaŋ daŋgar sən Zezu. Akamanənək Zezu dərəŋ gən gəni.

²³Zezu armak vani akak ama poho. Atufuk mefɗe arani, arəŋ gənək haran də vani. Yaŋ assohoni: Əstat ula zəga sa?

²⁴Daŋgar aslanək harani amna: Əntat ula ɗiiyi, amma va wəleŋɗe nədawleti, tahəŋ wədawaŋ.

²⁵Zezu aɗiyək van akan əmpa. Haran akolko, awəlka, awlek zigeɗ pak lewlewi.

²⁶Zezu alhanəka, dok eŋgili Zezu anahsən na: Kədodok awalaŋ gəla ɓa.

²⁷Zezu dit gewleɗ nan ambataŋgək kəla aweleŋgit gəleɗe, na Kaysariya Filipi. Aka tive na, assohotik gewleɗ nani: Mi ɗii madaw peleŋ aka wənnaw di?

²⁸Azlan sənənka: Ɗii meɓɓet aɓɗaŋ na əstə Zaŋ məgəɗ baptem, ɗii meɓɓet bo aɓɗaŋ na, əstə Eliyas. Ɗii meɓɓet əmpa aɓɗaŋ na əstə səmbet məs kleŋɗe en farə.

²⁹Yaŋ Zezu assohoti: Ya nokum, ka nawa kəda ɗiwən di? Piyer azlan sənəka: Əstə Messiya.

³⁰Yaŋ Zezu abay meti kədawnah sənən ɗəf ɓa.

³¹Yaŋ Zezu atəŋ wərban zəga sit gewleɗ nani: Dewle Wətən Ɗəf* wazəm saha diiɗa, avet ɗii gugiriɗ dit dayaɗe net məs dəlveŋge na Maŋgəlva, dit məsənaŋ zəga na ma henziŋ, wasganən agisbe. Wabayəni, amma dərɓaga wəvoŋ hoku wasil sətəki əmta də zeŋgilleni.

³²Anah sitik kotakə. Piyer ayak Zezu katər gəni, asəɓ sənəka.

³³Amma Zezu akpaŋganək harani awlek gewleɗ nani, ahayanək Piyer apsəna: Azar səzawa Satan kənani, wəɗum nok tay vana Maŋgəlva ɓa wəɗum nok venet ɗiiyi.

³⁴Zezu ayek ɗii dit gewleɗ nani apsit na: An ɗəf aŋgələk wəsbawa, say dəpan wəɗum aka zəni, dəgəm gən wəlaŋga mizliwrihe dəsbaw gəni.

³⁵Ko naway dəŋgəl wəkoh gən zeŋgilleni, wazani. Amma ko naway dəzan zeŋgillen viwa gəm vi Wən Neneke wakohu.

³⁶An ɗəf azəmək dələv pakə, amma azanək zeŋgilleni madawtərsən di?

³⁷Mi ɗəf nan adaɗɗa nawman zeŋgillen di?

³⁸Vi vaski, ko naway məs wil adanən viwa gəm dawpel wənnaw aweleŋgit ɗii en dəpaŋka, məs dəŋgluwən Maŋgəlva ɓa dit ɗi mambrayɗe, asna Wətən Ɗəf arəmsən na wil pay adazan də gakdak na Affən dit maslayɗe en salala* ɓa.