Read Gidar Luka 10 Bible Online

Luka 10 - Gidar bible

Luka 10

¹Dərɓagan vaska, Ɗəfdaya awelik gewleɗ meɓɓet kaklaw buhul kiyit sula, aslinik sula sula abani, awalaŋ gəla metiŋ dit walaŋ gəleɗe memeɗeŋɗe ndən van bo wambatə.

²Apsit na: Mawala agəɗka. Zəga naw bəl tay diiɗa, amma məzu bəlaŋ tahəŋ diiɗa ɓa. Məkaman Affən wəbəla də məs gən wəslin məzu bəlaŋ nani.

³Mədoŋ nə slənkumək va timeŋgiɗ aweleŋgit kərɗe muya.

⁴Kədawgəmaŋ gabal net deleɗ ɓa, walla zəga nawzəm aka tive ɓa, ko henseki. Kədasɗaŋ ɗəf aka tive ɓa'a.

⁵Gəla məs kəl toŋgoŋ pakə, mənah tagay na zam wasan adəv gəlaŋka.

⁶An ɗəf nasan zam taya dəv gəla vani, zam nokum wasan azani. An tay ɓa, zam nokum wamil azokum.

⁷Məsuwaŋ adəv gəla an mətaf kum pakə, məzəma məsaa an məpsukum pakə. Vi məgəɗ wəza aslək dərah gən iya nani. Kədawzaraŋ sədəv gəla aŋka, adəv gəla maɓɓan ɓa.

⁸An kətoŋgoŋguk awalaŋ gəla awandi pakə, an ataf kumunko, məzəm an məs apsukuməni.

⁹Məmbəl git məs gbəgbaɗe nadaka, mənah sit na: Məlĩ na Maŋgəlva go'oy də munokum.

¹⁰Amma an kədoŋguk ko awalaŋ gəla aŋga, dətaf kumun ɓa, məgil aket tiveɗ nani, mənah sit na:

¹¹Ko hologodo nokum naza təlmə, wamətu sukum, amma wakəsənən na məlĩ na Maŋgəlva go'oy.

¹²Intatə nah sukum, pay wəgrak dəlva, kita naka walaŋ gəla na sodoma wasan ɗəɗaah ki na walaŋ gəlaŋ nan də tattuwãha.

¹³Wakpaŋ bonoy azok is Korazin. Wakpaŋ bonoy azoko is Baytisayda. Va sokeneɗ məs nəgəɗ awalaŋ gəla nokuməŋ, va awalaŋ gəla na Tirus də Sidon nəɗɗe na, kəta ɗii net wasoŋ, waguloŋ lukut net sakɗe, wavohoŋ moŋlo a zeti, dərban gən na atubiyaŋka.

¹⁴Vi vaski pay wəgrak dəlva, kita na Tirus də Sidon wasan ɗəɗaah ki kita nokum.

¹⁵Is Kafarnahum, azok na Maŋgəlva waslok a disiŋ sa? Aw haya! Kaw toŋguki atəki net ɗii mimtiti.

¹⁶Yaŋ Zezu apsit gewleɗ nan na: Məs dəpprəm mokum maw apprəmə, məs dətoŋ ki mokum, ki maw atoŋgu, dətoŋ ki maw tamə ki ma ɗəf dəslənu atoŋgu.

¹⁷Masləŋɗe kaklaw buhul kiyit sula amilyoŋguk də wənneken ziti, aɓɗaŋ na: Ɗəfdaya, ko tuyeŋɗe wəɓe'eŋ səməni vi iya noko.

¹⁸Yaŋ Zezu apsit na: Nulak Satan wəbəta daga sə disiŋ va uwiɗ na buna.

¹⁹Yaŋ nəpsukumək sembe nawdaw dəket dohoŋɗe dit harziyeɗi mədoŋ bo də sembe dəka məzəɗɗa hire nokum pakə ko mi azəm gukum na saha ɓa.

²⁰Amma kə nekenən zukum vi tuyeŋɗe aɓe'eŋ sukumən ɓa, amma məneken zukum vi iya nokum məverni a disiŋ.

²¹Yaŋ pay nani Əmpəs Salala aslanək Zezu də wəneken zəni, amna: Aw Affən Daya na disiŋ də dəlva fuŋ, soko azoko vi kərban sitik kirin muzliyeɗ an məs kəɗaman azet məsənaŋ zəga dit məzapprəmaŋ. Vaski aw Affuwa, vaski an dəslə suk kana.

²²Affu apan suwək zigeɗ pakə. Ɗəf tay dəsən Wətən* ɓa, say Affəni, ɗəf tay dəsən Affən ɓa, say Wətəni gəm an məs aŋgəl nərban pakə.

²³Yaŋ akpaŋ azet gewleɗi, apel sit ketirgiti: Zəzay azokum məzulaŋ an məs kədawlaŋ.

²⁴Intatə nah sukum: Məs kleŋɗe diiɗa dit milyeŋge diiɗa aŋglaŋ ulanən an məs kədawlaŋ, amma dulanən ɓa. Aŋlaŋ wəpprəmənən an məs kədapprəmaŋ, amma dəpprəmənən ɓa.

²⁵Yaŋ mərbə zəga na ma henziŋ ade vi kawmbəɗan Zezu, assohonəka: Mərbə zəga, mi nədaɗɗa nərah gən zeŋgille məza agrak na ɓa di?

²⁶Zezu apsən na: Mi məverin adəv ma henziŋ di? Məkədaŋɗan adak di?

²⁷Azlanək na: Aŋlu Maŋgəlva Ɗəfdaya nok də makrok pakə, də ma genegenok pakə, də gurom nok pakə, də əmpəs nok pakə. Aŋglu meggok va kəŋglu zuko.

²⁸Zezu apsən na: Kəzlanək mogoni, aɗɗa vaska, wakərah zeŋgille məza agrak na ɓa.

²⁹Amma nani aɗiyək zən va təstəssə, apsən Zezu na: Naway megew di?

³⁰Zezu amna: Ɗəf tay dəsil sə Zerusalem wəmbat a Zeriko. Məvoŋgoŋ tive arəh nənka, agbukunək zəga səzani, avərənka, adoŋko, apanənək va məmtəni.

³¹Məs dələv* maɓɓan bo adawək tive nani, awlak ɗəf naka amzlaka, ndən toŋgu.

³²Məs lewi adek kla təki nani, awlak ɗəf naka. Nan bo amzlaka, atoŋko.

³³Amma yaŋ məs Samariya tay mbat malaka, agapək təki nani. Yaŋ awla ɗəf naka awələk saha kani.

³⁴Azarək azani, agəɗsənək mele də mbazla an məzlə zigeɗ səra huwa aket huweɗ nan neki, aynetike, aslanək aka koro nani akak atəki net melekeɗi, agak adaka.

³⁵Vit pumpum nani, andek deleɗ na təbəs sula, apsənək affən təki net melekeɗi, amna: Aga an kəzetik deleɗ daykiyit eski, an nədek na wanəmndeget suko.

³⁶Yaŋ Zezu amna: Azok kana, suweleŋgit ɗii hokiski naway mege məs məvoŋgoŋ tive avəraŋ di?

³⁷Mərbə zəga na ma henziŋ azlanka: Ɗəf məs duwəl saha akanəŋki. Zezu apsəna: Dokə gəɗ vas tamə.

³⁸Yaŋ adan Zezu tay daw aka tive dit gewleɗ nani, atoŋgoŋguk awalaŋ gəla maɓɓani, guluk məs adawyaŋ na Marta tətafək eŋgil annat da.

³⁹Məlmət tat məs adawyaŋ na Mari, təsatək amaŋgava Ɗəfdaya, tatəpprəm wənna Zezu.

⁴⁰Marta tatəgay də wəza temtem eŋgili. Tədeke, təmna: Ɗəfdaya kawlət məlmukəŋ təppaw nədawgay dit wəzeɗeŋ ɓa sa? anah sət təbaah su gən tam ɗa?

⁴¹Ɗəfdaya azlan sətəka: Kay Marta, kay Marta, istatə yan zuk də zigeɗ diiɗa.

⁴²Zəga taka ana tər wəray harana, Mari təgəmək zəga mogoni, an məs kaw ɓapi wətafən səvat ɓa.