Read Gidar Luka 11 Bible Online

Luka 11 - Gidar bible

Luka 11

¹Yaŋ pay maɓɓani Zezu tay zuli atəki maɓɓani. Adan agrak wəzuliya, ɗəf taka səmbet gewleɗ nan apsən na: Ɗəfdaya arban səm wəzuliya va Zaŋ arban sit gewleɗ nani.

²Apsit na: An munokum tatə zuliyaŋ na mənah na: Aw Affən, salala* kənani, aɗɗa ko naway pak də gakdakan gən iya noko. Arban səm məlĩ noko.

³Apsəm zəga nawzəm nawtər səm wəray nam pay pakə.

⁴Aviyan səm mambray namə, vi nam van bo mənam tatə viyan mambray net ɗii məzaɗɗaŋ səmən mbrayen pakə. Ataɗmə vi Satan ada mbəɗamə, kapan wətaf nam ɓa.

⁵Zezu apsit əmpa na: An ɗəf səmbokum tay dəbay nani, ambatək azani tətaŋ dəfɗa vi kawnah sən na: Baynawa avay moŋgosokɗe hoku.

⁶Vi ɗəf taka səmbet bayneŋgiɗu adek səmalaka, taya naw da, zəga tay nədapsən ɓa.

⁷Yaŋ baynan nak azlan səna: Kədaw yaw kakaŋ kəmpa ɓa, ma giziŋ pak məmpani, mənam dit kirtu pak məvoŋgum mənani, nəɓapna wəsilyaw vi kapsuk moŋgosokɗe ɓa.

⁸Yaŋ naw əntatə nah sukum, kuzuŋ ko an asilik vi kapsəni na vi baynani ɓa, amma wasili wapsəni gap tər wəray nani vi akiyək man də wəssohoni.

⁹Intatə nah sukum: Məssohu, wakərəhaŋ. Məkayani wakərəhəni. Məsɗə eŋgili kawkol sukumi.

¹⁰Vi ko naway dəssohu, warahə. Ko naway də kayanni warəha. Ko naway dəsɗə eŋgili kakol səni.

¹¹Naway səmbokum an wətən assohonək kilif na wapsən doho di?

¹²Walla an assohuk ɗeŋzle na wapsən hərziya sa?

¹³Munokum mbraykum kəsənənək wəpsit zigeɗ moget sit kirtukum. Mbari kan Affukum na disiŋ dərəŋ kan aday na dapsit Əmpəs Salala* sit ɗii məzə sohonən ɓa sa?

¹⁴Zezu agil gənək tuya məs məkpaŋgan ɗəf goryom. Adan tuya nan agili, ɗəf nan apelke, ɗii pak agətaŋka.

¹⁵Amma ɗii meɓɓet aɓɗaŋ na: Məlĩ net tuyeŋɗe dədapsən sembe narɓehet tuyeŋɗe.

¹⁶Ɗii meɓɓet bo aŋglaŋ wəmbəɗanəni, vi vaski assohonəni. Agəɗ sit sokene vi də sənən gən na Maŋgəlva də slənko.

¹⁷Adan Zezu asən wəɗum neti, apsit na: An ɗii nadəv dələv awɗakaŋka, tahəŋ wəgayaŋ awalaŋ ziti, məlĩ na dələv nan wazə, gəla waɓəsl aka gəla.

¹⁸An Satan agayək də maɓɓani, mbari məlĩ nan adawsan əmpa di? Munokum tatə nahaŋ na də sembe na Belzebul nədarɓi tuyeŋɗe.

¹⁹Ya an əntat wərɓi tuyeŋɗe də sembe na Belzebul, ya də sembe na mi kirtukum tam adarɓihin di? Vi vaski kirtukum arbanənək wən nokum munokum tat də goŋga ɓa?

²⁰Amma an də sembe na Maŋgəlva nədarɓi tuyeŋɗena, asna tayərban na məlĩ na Maŋgəlva adek azokum.

²¹An ɗəf gurom azaɓanək zən də zəga naw gaya, tay ga gəla nani, zəga nan pak wasan zamə.

²²Amma an məday kiyən sembe adeke waday kiyən, wataf zəga naw gay nani məs adawsan viyən naka, wawɗakan arya nan məs ataf də guroməŋka.

²³Ɗəf məs tay də inɓa məzuzel wi. Ɗəffan məza abaah su wəkkal ɓa watərayə.

²⁴An tuya agilik səka ɗəffa, wabbal awra wəkay təki naffete*, an dərah ɓa, asna wanah na: Wanəmil adəv gəla naw məs nəgil sədəvən naka.

²⁵An amilik adəvən, warəh məfaɗəni, məzaɓani.

²⁶Asna wambatə, waki tuyeŋɗe meɓɓet buhul, mbreyit dayki an madabəŋ, wasoŋ adəv gəla nani. Wəsuwa na ɗəf nan wasan tuwãh dayki an dabəŋ.

²⁷Adan Zezu adawpel vaska, guluk təslanək wəlat aweleŋgit ɗiiyi təmna: Zəzay azat guluk akən tuwəko də bide nat an kəwaɗə.

²⁸Amma nan amna: Zəzay azet məzəpprəmaŋ wənna Maŋgəlva, məzər manən wənnani.

²⁹Yaŋ ɗii diiɗa akkalaŋ amaŋgava Zezu, atəŋgək wəpele: Ɗiiyen kakaŋ kiŋki, mbreyitiŋ, tahəŋ wəssohoŋ sokene. Amma arəhaŋ na ɓa, say sokene na məs kleŋ Zonas.

³⁰Vi va Zonas asan sokene azet ɗii na Niniwe, vaski Wətən Ɗəf* ada kpaŋ azet ɗiiyen kakaŋka.

³¹Məlyaŋgək naka dələv na dohoŋ, watəsil də kita bet ɗiiyen kakaŋka kawtaw kita aketi pay nagrak dəlva, tədek sə faraɗa vi kapprəm wən səma Salmoŋ məs məzu gilyan də wəsən diiɗa. Yaŋ məs dədayki Salmoŋ tayaŋka.

³²Pay wəgrak dəlva ɗii na Niniwe wasilyoŋ abet ɗiiyen kakaŋka kawtaw kita keti, vi ɗii na Niniwe atubiyaŋgək adan apprəmən wənna Zonas. Yaŋ məs dədayki Zonas də daya bo tayaŋka.

³³Ɗəf tay nasɗa offo adəv pitirla, kaw məsa uɗamani walla kaw ɗup hiliw akan ɓa, amma waɗi atəki naw kekeɓe na pitirla, vi ɗii nawtoŋgoŋ pak dulaŋ gən təki abeti.

³⁴Horok tay va pitirla na zuko. An horok tay mogoni, zuk pak wasan va naw kekeɓe'e. Amma an horok tay mogon ɓa, zuk pak wasan ara guzliyo.

³⁵Ya ataɗ zuko vi zukuŋ adakpaŋ ara guzli ɓa.

³⁶An zuk pak tay vana kekeɓe'e, an zuk tay dəpəl ara guzli ɓa, zuk pak taya kəti naw kekeɓe'e, asna tay va pitirla adaw kekeɓe təki nani.

³⁷Adan Zezu agrak wəpele, Farisiyen maɓɓan ayak Zezu dəzəm gən annanda, Zezu atoŋko, atəŋgək wəzəma.

³⁸Adan Farisiyen nak awla Zezu dawzəm məzawɗa van ɓa, agətka.

³⁹Ɗəfdaya apsəna: Munokum Farisiyenɗe, munokum tatə ɗanən zəga naw saa zəga nokum də hiliw nawzəm zəga, amma amokrokum aknahək də wəkay mama gəm də mambraya.

⁴⁰Ɗii Məza maɗulet tay ɓa, Maŋgəlva məs dəɗɗa gəɓani aɗɗana gədəvən ɓa sa?

⁴¹Məpsit məzurayɗe ana dəv zəga naw saa zəga nokum də na dəv hiliw nokum, asna zigeɗ pak wasoŋ sukumən mogeti.

⁴²Amma wakpaŋ sukum bonoy munokum Farisiyenɗe, vi munokum tatə gəmnən məklaw net teɓ na minti dit teɓ naguli nawzəm nokum pakə, munokum tatə panən təstəssə gəm wəŋgla na Maŋgəlva ndəni an dəslə narma, amma kəl zeletin meɓɓet ɓa.

⁴³Wakpaŋ azokum bonoy, munokum Farisiyenɗe, vi kəŋglaŋgək təki nasso ana bet ɗiiyi adəv gəla nawpel wənnet Yahudiyenɗe, kəŋglaŋgək bo dəsɗo kumən gən a lumiɗi.

⁴⁴Wakpaŋ azokum bonoy, vi munokum tat va magamasɗe məza awlaŋ ɓa tahəŋ wədawaŋ dəketi məza aw sənaŋ ɓa.

⁴⁵Yaŋ ɗəf taka səmbet məsənaŋ zəga na ma henziŋ apeli, apsəna: Mərbə zəga, məs kədawnahəŋ na annam kədawra.

⁴⁶Zezu azlanka: Wakpaŋ azokum bonoy munokum mərbaŋ zəga na ma henziŋ. Munokum tatə slanən zəga gakdak sit ɗiiyi nokum kabaahaŋ sitin wəslan ko də mətəl va ɗəf ɓa.

⁴⁷Wakpaŋ azokum bonoy, vi munokum tat ərkanən magamas net məs kleŋɗe məs dəhiŋgiɗkum abayaŋ.

⁴⁸Vaski bo, saydawa nokum tayərban zən na kə slereŋgək də wəza net dəhiŋgiɗkum abeyinək məs kleŋɗe, munokum tatərkanən magamas neti.

⁴⁹Wəsən na Maŋgəlva amna: Waməslin məs kleŋɗe dit masləŋɗe, wabeyin meɓɓeti, wazəm gitin saha a net meɓɓeti.

⁵⁰Bonoy adawgəɗsit ɗiiyen kakaŋka, vi abayinik məs kleŋɗe daga wətəŋ na dəlva fuŋ.

⁵¹Daga wəbay na məs kleŋ Abel, ha məs kleŋ Zakari məbayən akawalaŋ təki salala də təki nawtaw wəla zəga. Vaski nədaw nah sukum, ɗiiyen kakaŋ kiŋki, kita armeke vi gəbayɗe abayaŋgiŋki.

⁵²Wakpaŋ bonoy azokum munokum məsənaŋ zəga na ma henziŋ, vi kəgəmənək lakle naw səna, munokum sən kikum bo kətoŋgoŋ ɓa ɗiiyen dəŋglaŋ wətoŋgoŋ bo ya kəppetin dətoŋgoŋ gən ɓa.

⁵³Yaŋ agil sədaka, məsənaŋ zəga na ma henziŋ dit Farisiyenɗe*, asbanənək də wənna, assohonənək aka wənnet zigeɗ diiɗa.

⁵⁴Aziyənək zit azani vi kapprəm wənɗe mbreyit səmani vi ka wəliyən dəka wəneti.