Read Gidar Luka 12 Bible Online

Luka 12 - Gidar bible

Luka 12

¹Pay nani ɗii akkalaŋgək uzineɗe ha wəndapanən ziti. Yaŋ Zezu atəŋ wəpel sit gewleɗ nani: Məsla zukum səza wuɗo net Farisiyenɗe* va wənah na muluvuluvu neti.

²Wən məɗama pak wapasə an məɗaman pak kawsənənni.

³An kənahaŋ ara guzli pakə, wapprəm atəki nawiɗe. An məs kəl peleŋ sokosoko aslma zukum a dəmba kətiya waŋgəsl vamvəlla wagil akaki biyən appaka.

⁴Intatə nah sukum, munokum bayneŋgiɗwa: Kədaw geslne'eŋ sit ɗii naw ɓapaŋ wəbayən gəba zukum ɓa, amma aɓapaŋ na wəɗɗaŋ dayki asɓa.

⁵Wa nərban sukum ɗəffan kəl daw geslne'eŋ sənənni: Məgeslne sən ɗəf məs naw ɓap wəbay kum, məs də sembe nasgokum aka offo. Vaski nənah sukum ndəni dəslə naw geslne səni.

⁶Kaw vəlli biŋgeɗ sle aka koɓo sula ɓa sa? Amma Maŋgəlva dəsgət ko ki taka səmbet ɓa.

⁷Ko muhur kikum pak məŋɗeti taka taka. Vi vaski kədaw geslne'eŋ ɓa, kədayaŋgək kiyit biŋgeɗ də sləma.

⁸Intatə nah sukum, ko naway dəgəɗ saydawa akaw abet ɗiiyi, Wətən Ɗəf* wagəɗ saydawa akan tam abet maslayɗe na Maŋgəlva.

⁹Amma ɗəf məs dədawnah na dəsənu ɓa, Wətən Ɗəf tam asəna ɓa haabet maslayɗe na Maŋgəlva.

¹⁰Ko naway dəpel mbrayen aka Wətən Ɗəffa warah wəviyan sən mambray nani: Amma məs dəpel mbrayen aka Əmpəs Salala arah na wəviyan mambray nan ɓa.

¹¹An akukumənək adəv gəla nawpel wənnet Yahudiyenɗe, walla abet milyeŋge, walla abet ɗii gugiriɗe, kədawzəm gənən saha na zukum an məs kəldawkohoŋ ɓa walla məs kədawpeleŋ ɓa.

¹²Vi Əmpəs Salala warban sukum an məs kədawpeleŋ pay nani.

¹³Yaŋ ɗəf səmbet ɗii apsən Zezu na: Mərbə zəga anahsən məlmu muɗakan arya an affəm apəl səməŋka.

¹⁴Zezu apsəna: Awlani, naway dəɗiyu mətaw kita nokum di, walla məzuɗakan sukum arya di?

¹⁵Yaŋ anah sit ɗii pakə: Məsla zukum səza əŋgla na arya, vi arya anneken na ənziya egge na ɗəf ɓa ko dəsan məs arya vami zlaŋ.

¹⁶Apel sitik wən məkpaŋga vana'ə: Ɗəf tay məs arya, gulyeŋɗe nan tahəŋ, aɗɗaŋ sənənək zigeɗ diiɗa.

¹⁷Aɗumuk amakrani: Mbar nədaɗɗa di? Vi əntat də təki nakkelet zigeɗ nama bardaw naw ɓa.

¹⁸Amna: Yo vana nədaɗɗa: Wanəŋgrof maheɗ nawa, kerket daykiyit eski, kakklelet zigeɗ nama bardaw naw pak adaka dit aryeɗ naw pak adaka.

¹⁹Asna wanənah sən zuwa: Arya nok tay diiɗa məzaɓani, wagəɗ suk wəsva diiɗa. Effeti, azəmə, a sə, anneken zuko.

²⁰Amma Maŋgəlva apsən na: Məza maɗulan tay ɓa, dəfɗəŋka wanəgəm zeŋgilleko, zigeɗ məs kəkaləŋ pakə, na nawaŋ kan di?

²¹Vas adawsan sən ɗəffan məkalan arya sən kiyən, dəkpaŋ məs arya aza Maŋgəlva ɓa.

²²Yaŋ dərɓaga aska Zezu apel sit gewleɗ nani: Vi vaski nədawnah sukum: Kədawyanən zukum də wənna zəga naw zəma walla wənna lukut ɓa.

²³Vi zeŋgille tay də sləman dayki wəzəma, zən bo dayki lukut də sləmani.

²⁴Mule gaŋgrekeɗ ɗa, aslgaŋ ɓa, awbəlaŋ ɓa, aw zaɓaŋ zəga ɓa, walla maha net ɓa, amma Maŋgəlva tay zəm giti. Ɗii na sləma kənanən dayikiyit biŋgeɗ ɓa sa?

²⁵Naway səmbokum də sembe naw kay maŋgesl wəsva nan ko suɗike di?

²⁶Adan kəɓapəna vas ko suɗike ɓa, vi mi kədawyanən zukum vi dambər gən di?

²⁷Mule wəfiyeɗ nawra va ada fiyoŋgu. Aɗɗaŋ wəza ɓa, awhoŋ gabaga ɓa. Amma naw əntatə nah sukum: Ko Salmoŋ də arya nan diiɗaŋ pak də gul ɗaah lukut mogon va net wəfiyeɗ ɓa.

²⁸Maŋgəlva tay gul sən kevile awra dəpaŋka, pumpum offo wazla. An vaski na agul sukum na dayki as ɓa sa, munokum məs wətaf nokum tay diiɗa ɓa?

²⁹Kədaw yanən zukum na mi kədawzəmaŋ di walla mi kədawsaŋ di ɓa.

³⁰Vi zigeɗis pak məza dəsənən Maŋgəlva ɓa tahəŋ wəkayetini, amma Affukum asənək na munokum tat də wərayti.

³¹Ɗəɗaah məgay sən məlĩ na Maŋgəlva dabəŋg, nan wapsukum zigeɗis va maŋgeslin.

³²Kədaw geslne'eŋ ɓa, ngaɓa muzliya kənanaŋ ɓa, vi Affukum aŋgəl kapsukum məlĩ nani.

³³Məvəl zəga nokum, məpsit məzurayɗe, mərmah gabelɗe net deleɗ məza agrakaŋ ɓa, arya məza awray ɓa disiŋ. Vi adaka məhala arəh na ɓa, məsuk sləma bo aray gən na ɓa.

³⁴Vi atəki arya nokum asani, adaki makrokum adawsani.

³⁵Minan dadakokum vi wəza, pitirla nokum dəsan məsɗani.

³⁶Məsoŋ va ɗii məgaŋ daya neti, pay ada zan də wəɓele, wakol sənən madamba an agapəka argak madamba.

³⁷Zəzay azet gewleɗiski an day net arihik tahəŋ wəganəni. Gesiŋ nədawnah sukum, waynan zən vi wəza, waye dəzəmaŋ gəni, nan tam wagiɗsit wəza.

³⁸Zəzay azet gewleɗ neti, ko adek tətaŋ dəfɗa walla ko dayki as suɗike arihik tahəŋ wəganəni.

³⁹Məpprəm lewlewi: Va affən gəla asənək pay məhala adazan na, apana məhala detoŋgen annanda ɓa.

⁴⁰Nokum bo məzaɓan zukum, Wətən Ɗəf* wade pay an kəɗumoŋ akan ɓa.

⁴¹Yaŋ Piyer apsən na: Ɗəfdaya səm kədawpel məkpaŋgaŋ sa walla sit ɗii pakə?

⁴²Ɗəfdaya azlanka: Məgəɗ wəza awani mogonəŋ di, de maɗulanəŋ di? Məs daya nan aɗi aket məɗɗaŋ wəza nani vi dəpsiti gin zəga nawzəm də pay nani.

⁴³Zəzay aza gawla nan an daya nan adek wərəhən daɗɗan vaska.

⁴⁴Gesiŋ nedawnah sukum: Daya nan wapan zəga pak ava məgəɗ wəzaŋka.

⁴⁵Amma an gawla nan aɗumonək amakran na: Kakaŋ na daya naw aliyək dazani, yaŋ atəŋ wərge məɗɗaŋ wəza, zel dit guli, tay zəma wəsa, də witem dəni.

⁴⁶Daya nan wade də pay an məs dəɗum akan ɓa də pay məs dəsən ɓa. Daya nan wazəmgən saha an tattuwãh diiɗa, wapsən zəga an napsit muluvuluvuɗe.

⁴⁷Gawla məs dəsən an daya nan aŋgələ, amma dəɗi kiyən akan ɓa, dəɗɗa va daya nan aŋgəl ɓa, kaw verni wəvər diiɗa.

⁴⁸Amma gawla məs dəsən an daya nan aŋgəl ɓa, aɗɗak an məs dəslə naw vərən, kar gani suɗike kaaka'ə. Məs məpsən diiɗa, kassohoni diiɗa, məs məpan sən diiɗa kassohoni diiɗa dayki as kəmpa.

⁴⁹Yaŋ naw nəde na vi kasgan offo aka dəlva fuŋ, nəŋgəl dərəm gən daga kakaŋka.

⁵⁰Baptem an nədawrəha, nəzəmək saha vi wənnan dəgrak gəni.

⁵¹Azokum nəde na vi kaw ki zam aka dəlvi sa? Intatə nah sukum zami ɓa, amma uɗaki.

⁵²Vi abeska ɗii sle eŋgil taka wawɗakaŋ: Ɗii hoku aslereŋ na dit ɗii sula ɓa, sula aslereŋ na dit hoku ɓa.

⁵³Affən wiyən waseɓ dəndəni, wiyən bo waseɓ de affəni. Mat waŋ bo watəseɓ dət wətəta, wətət bo watə seɓət mata. Ɗak dət atət waseɓenən ziti.

⁵⁴Yaŋ Zezu anah sit ɗii məkkelit əmpa na: An kulanənək slay buwən asilik səmba pay na moskoyo, go'ləŋ munokum tatə nahaŋ na buwən waziyə, tay ɗa vaska.

⁵⁵An kulanənək səmnya asilik se dohoŋ bo munokum tate nahaŋ na: Təki hiriɓ wagəɗə, tay ɗa vas gesiŋ.

⁵⁶Muluvuluvuɗe, kəsənənək uɗakan an məs naɗɗa aka dəlva fuŋ də məs naɗɗa a disiŋ, vi mi kəsənən uɗakan payan kakaŋ ɓa di?

⁵⁷Vi mi kawsənən sən kikum an məs də slə naɗɗa ɓa di?

⁵⁸An ɗəf məs kegayaŋ tayi kuk aka kita, agay wəsler dəndən daga səka tive, vi adappok ava mətaw kita, mətaw kita tam kappok avet sozeɗi, kasgokən a daŋgay ɓa.

⁵⁹Intatə nah sukum: Kəgil na sədak ɓa, say an kəfaɗək an mətaw suk kita akani.