Read Gidar Luka 13 Bible Online

Luka 13 - Gidar bible

Luka 13

¹Pay ɗii meɓɓet anahsənən Zezu wənnet ɗii na Galile en məs Pilatu abay daga adawtawaŋ wəla zəga sən Maŋgəlva (aslehetik mbel net də mbel na zəga məs mətaw wəlani).

²Zezu azlansitik na: Azokum na Galileyenɗe es aɗɗaŋgək mambray daykiyit meɓɓet vi agəɗ vas sa?

³Intatənah sukum tay vas ɓa, amma an kətubiyaŋ ɓa, wakəzaŋ venet pakə.

⁴Walla ɗii klaw kiyit dədopodo məs gəla naw ga aɓəsl aket a Silowama, amtaŋ, azokum na adayaŋgək kiyit ɗii na Zerusalem pak də mambray sa?

⁵Intatənah sukum, tay ɓa, amma an kətubiyaŋ ɓa munokum pak wa kəzaŋ vaska.

⁶Yaŋ Zezu apel sit wən məkpaŋga: Ɗəf tay ampək sukoyo adəv guli nani, yaŋ ade kaw ɓuh uwa nani, amma dərah ɓa.

⁷Yaŋ anahsən məgə guliyo: Awla wəsva hoku nədazaw wə ɓuh uwa na sukoyoŋka, amma nawrah ɓa. Abəla vi mi adawray gən sembe na dəlva fuŋ ɗar mekeleŋ di?

⁸Məgə guli apsən na: Daya nawa, apan dabyaŋ kəmpa, wanəso' gabbani, wanəzisən ba'arə,

⁹kuzuŋ dəkki na wawə an də wə ɓakan na kə bəllə gən kana.

¹⁰Yaŋ Zezu adarban wən adəv gəla nawpel wənnet Yahudiyenɗe, pay naffete.

¹¹Ɗak maɓɓat tatadaka məs tuya avitata wəsva klaw kiyən dədopoɗo, tuya avittatka, aɓegətəka tawɓap wəsilyat ziw ɓa.

¹²Adan Zezu awləta, apel sətka, apsət na: Gulku kəpetik səka wəvit noko.

¹³Aɗiyək van akata, go'ləŋgə guluk təziwke, təgakdakanək Maŋgəlva.

¹⁴Amma daya nawpel wənnet Yahudiyenɗe gədəvən adəka vi mi Zezu ambəl gət ɗak pay naffet di, apsit ɗii na: Pay slire tay vi kəɗɗa gən wəza, vasna ade mbəl gət dəpaska, amma mogoni wəmbəl gət pay naffet ɓa.

¹⁵Ɗəfdaya azlan sənəka: Munokum, muluvuluvuɗe kənanaŋ, nokum kapanən ngari nokum walla koro nokum pay naffet vi dəmbat gən wəsa iŋkile ɓa sa?

¹⁶Guluk zev Abraham kəŋkə, Satan aynatək wəsva klaw kiyən dədopoɗo, də slə kaw pələt pay naffet ɓa sa?

¹⁷Adan apel vaska, ɗii nadak wil edeninke, amma ɗii pak zit eneke vi zigeɗ gakdekɗeŋ agəɗiŋki.

¹⁸Yaŋ Zezu anah əmpa na: Va mi məlĩ na Maŋgəlva agil di? Dəmi mədawslan di?

¹⁹Agilik va zeve na sita maɓɓani, ɗəf wagəməta wasl gəta aguli nani, watəgili, watəkpaŋ wəlaŋga metiŋgin ha biŋɗe wazaɓaŋ gəla net akani.

²⁰Zezu anah əmpa: Va mi məlĩ na Maŋgəlva agil di?

²¹Agilik va wuɗo guluk təgəməka, təslahanək ara gəpa tasa kaklaw sula kiyən sle, ahəsək gəpa pakə.

²²Yaŋ Zezu atoŋ dəka waleŋgit gileɗe gugiriɗe, may dəka va makiɗe, arbək wən daga adawtoŋ a Zerusalem.

²³Ɗəf apsən na: Ɗəfdaya ɗii suɗike dədawkohoŋ sa? Zezu azlan sitke:

²⁴Məsok zukum mətoŋ kəla madamba feŋge. Intatə nah sukum: Ɗii diiɗa wakayaŋ batam nawtoŋgo, amma arəhaŋ na ɓa.

²⁵An affən gəla asilke, ampanək madamba, munokum an appaka kənanaŋ, kətəŋgaŋgək wərga madamba, munokum tatə nahaŋ na: Ɗəfdaya akol səm madamba. Wazlan sukum na: Nəsən təki kəzoŋ ɓa.

²⁶Wakətəŋgaŋ wənah na: Məzəmək də wə saa aboko, kərbək wən aket tiveɗ namə.

²⁷Wanahsukum na: Nənah sukumko nəsən təki kəzoŋ ɓa. Məzar səzawa munokum məɗɗaŋ mambraya.

²⁸Wakə həmmaŋ wakəmpəranən slaykum adaka, an kulanənək Abraham də Isak gəm Zakub dit məs kleŋɗe pak adəv məlĩ na Maŋgəlva, nokum tamə kasgokumi appoho.

²⁹Ɗii wazoŋ daga səmba pay nampum na moskoyo na disiŋ na dohoŋ wasoŋ adəv məlĩ na Maŋgəlva vi kawzəma.

³⁰Asna ɗiiyen nebe kakaŋka, wakpaŋgaŋ dirɓe, ɗiiyen dirɓe, kakaŋka wakpaŋgaŋ ɗii nebe.

³¹Yaŋ dəpaska Farisiyenɗe* meɓɓet azoŋgu apsənən Zezu na: Dok səŋka Herodə manaka bayko.

³²Zezu apsit na: Mədoŋ mənah sən balway əŋka: Intatə wərɓi tuyeŋɗe, əntat wəmbəl git məs gbəgbaɗe, dəpaŋ də pumpum pay mo hoko'ən wa nəgrak wəza nawa.

³³Amma say nəsban gən tive nan dəpaŋ də pumpum gəm huruɓ pumpum taka, vi dəslə məs kleŋ dəmtə gən ama poho na Zerusalem ɓa.

³⁴Midi, Zerusalem, Zerusalem, kəbeyək məs kleŋɗe, kəskek mesliŋɗe na Maŋgəlva dit kuneŋge. Nəgayək wəkkelet ɗii nok təl diiɗa, va gəmnda ada kelet kirtin amba perslekeni, amma kəŋgereŋ ɓa.

³⁵Apprəma gəla nokum wakpaŋ va ki məskiya. Amma əntatə nah sukum: Kuluwənna dərɓaganəs ɓa hagap pay an kədawnahaŋ na: Zəzay aza ɗəf dədazan də wəya na Ɗəfdaya.