Read Gidar Luka 14 Bible Online

Luka 14 - Gidar bible

Luka 14

¹Yaŋ pay naffet* maɓɓani, Zezu ambatək eŋgil ana daya net Farisiyenɗe* da, vi kawzəm adaka. Ɗiiyen nadak aziyənək zit wətaɗən.

²Yaŋ ɗəf gədəvən məskan taya bani.

³Zezu apel sitik məsənaŋ zəga na ma henziŋ dit Farisiyenɗe, amna: Ma henziŋ nam apsəmək tive sa, walla dəpsəm ɓa sa na mbəl gən ɗəf pay naffete?

⁴Ndəɗaŋ ɓataɓata. Yaŋ Zezu appar van aka ɗəf naka, ambəl gənka, Zezu apanək ɗəf nak dəmbat gəni.

⁵Yaŋ apsit na: Naway səmbokum, an wətəni walla ngari nani asbərək avov net iŋkile na akdəh na pay naffet ɓa di?

⁶Dəɓapaŋ wəzlan sənən ko wən taka ɓa.

⁷Zezu apel sitik ɗiiyen miyet də wən məkpaŋga, vi awlek awelinik kəti mogoni. Apsit na:

⁸An ɗəf ayukuk atəki wəɓele, kədasok a kəti mogon diiɗa ɓa.

⁹Kuzuŋ ɗəf tay aweleŋgit ɗii miyet də daya, vi ɗəf məs dəyukum adawnah na: Apəl təki sən ɗəffəŋka. Wil wadukən dawmbat wəsuwa aka zəga an dirɓe.

¹⁰Amma an məyukki, dokku sok aka zəga an dirɓe, hagap ɗəffan diyuk adeke, wanahsuko: Baynawa ade sok atəki mogoni. Wakpaŋ gakdak azok amaret ɗiiyen məs kədawzəmaŋ dənɗaŋ pakə.

¹¹Vi ɗəffan dəɓay gən kiyən pak kamnda gani dirɓe, ɗəffan dəɓegən kiyən pak kawɓay gəni.

¹²Yaŋ Zezu apel sən ɗəf məs diya naka: An kəgəɗək zəga nawzəm na kədawye bayneŋgiɗuk ɓa, walla milmiŋgiɗuk ɓa, walla megeŋgiɗuk məs aryeɗ ɓa, vi adawgukun kaw faɗ suk akan ɓa.

¹³Amma an kəgəɗək zəga nawzəm nawzləra, aye məs sahaŋɗe məs zit məmtəni dit vədelɗe, gəm deŋgerɗe.

¹⁴Akənneken zuko vi aɓapəna wəfaɗ suk agəlan ɓa. Maŋgəlva wafaɗ suk agəlan pay wəsilyo net ɗii təstəssə.

¹⁵Yaŋ ɗəf taka səmbet ɗii na Zezu apprəm wənɗeska, amna: Zəzay aza ɗəffan nawzəm zəga adəv məlĩ na Maŋgəlva.

¹⁶Zezu azlan sənək na: Ɗəf maɓɓan agəɗək zəga nawzəm diiɗa, ayek ɗii diiɗa.

¹⁷Pay nawzəma aslənək gawla dənah sit gin ɗii miyet na: Məde vi zəga pak məzaɓani.

¹⁸Ndəɗaŋ pak atəŋgaŋgək wəpel aka ziti vi dəppet gini. An dabəŋ amna: Nəlbahək gulyo wanəmbat ulani, nəkomoko.

¹⁹Ɗəf maɓɓan bo amna: Nəlbahək wazliɗe nense kəlaw waməmbat wəyegeti nəkomoko kəppaw gəni.

²⁰Dəf maɓɓan bo amna: Kakaŋ nəgəm gulku vi ni nərah na wəmbat ɓa.

²¹Gawla amndanək aza daya nani, anahsənək wənnan pakə. Yaŋ gədəv affən gəla adə, apsən gawla nan na: Dok awalaŋ gəla go'u, aye məs sahaŋɗe məs zit məmtəni, dit deŋgerɗe gəm vədelɗe.

²²Gawla asilke ambatka amilke, amna: Ɗəfdaya an məs kəɗi su wənnan nak agəɗka, amma təki apəlkəmpa'e.

²³Ɗəfdaya apsən gawla na: Dok abet tiveɗ metiŋgiti dit tiveɗ mimeɗeŋɗe, agəɗ sən gagay sən ɗəf kərah adak pakə, dəzoŋ, gəla naw dəknah gəni.

²⁴Intatə nah sukum: Ko ɗəf səmbet ɗii miyet dabəŋ a nan na ɗaah zəga nawzəm naw ɓa.

²⁵Ɗii diiɗa tahəŋ wəmbataŋ də Zezu aka tive. Zezu akpaŋganək harani apsit na:

²⁶An ɗəf aŋgələk wəkpaŋ gawla nawa an dəzel affən dət mani dət ɗak nani dit kirtini dit milmiŋgiɗin mezeŋgilleketi dit muguluŋgiti, daga də zeŋgillen pak ɓa, aɓapna wəsan gawla naw ɓa.

²⁷Vi ko naway dəslan wəlaŋga məzliwrihe nan dəsbaw gən ɓa, aɓapna wəsan gawla naw ɓa.

²⁸Ko naway səmbokum an aŋgələk wərka gəla naw ga, wasan wəɗumon tagay, an məs adawzanni kawla an məs adagrak wəza nani.

²⁹Vi an a təŋgəkka, dəɓap wəgrakən ɓa, ɗiiyen məs dədawlanən pak wamasaŋ akani.

³⁰Də wənah na: Ɗəffaŋ atəŋgək wərka gəla dəɓap wəgrakən ɓa.

³¹Walla məlĩ awani, an aŋgələk wəlpa də məlĩ mbərən, asanna wəɗumon, an waɓap wəmbat dit ɗii uzine klaw kaw ləmsən ɗəffan dədazan wəzəm walaŋ gəla nan dit ɗii uzine kaklaw sula ɓa di?.

³²An aɓap na ɓa, adan məlĩ andak tay faraɗa tagay wasləŋ masləŋɗe azani vi kassohon dəslereŋ gəni.

³³Vaski bo azokum, an ɗəf dəppet zigeɗ nan pak ɓa, aɓapna wəsan gawla naw ɓa.

³⁴Bəttu zəga mogoni, amma an lelem na bəttu agraka madaw tər əmpa di?

³⁵Atər na wəray aza dəlva fuŋ ɓa ko va ba'ar ɓa, kakgbani agisbe. Məs də sləman napprəma dəpprəma.