Read Gidar Luka 18 Bible Online

Luka 18 - Gidar bible

Luka 18

¹Yaŋ Zezu apel sit wən məkpaŋga vi də sənən gən na say dəzuliyaŋ gən pay pakə məza wəpan ɓa.

²Apsit na: Ɗəf tay awalaŋ gəla mətaw kitayi awãy Maŋgəlva ɓa awãy ɗii ɓa pakə.

³Ga gəbay tat awalaŋ gəla nan məzəzat azan pay pakə, tatənah sən na: Aɗɗa su kita nawəŋ də ɗəf məzu zel wəŋka.

⁴Amma mətaw kita aɓoŋko də wənnata, ha anzika, amma dərɓagan aɗumuk amakrani: Ko vi naw na geslne sən Maŋgəlva ɓa, nawãy wənnet ɗii ɓa,

⁵amma guluk kəŋ tatə ki mawa, wanəɗɗa sət kita nata, vi tə dazat wəzlaɓan su maɗulaw zaya ɓa.

⁶Yaŋ Ɗəfdaya aməs wənah na: Məpprəm va ɗəf mbrayen mətaw kitas a anahə.

⁷Vas na Maŋgəlva agəɗ na təstəs go'ləŋ sit ɗii məs aweli, məzaw həmmaŋ sənən dəfəɗ də kapay pak ɓa sa?

⁸Intatə nah sukum, wagəɗ sit təstəs go'ləŋ. Amma an Wətən Ɗəf* adek na, warah wətaf aka dəlva fuŋ sa?

⁹Yaŋ Zezu apel wən məkpaŋga maɓɓan əmpa, vi məzulanən zit va ɗii təstəssə, də wəzelet ɗii meɓɓeti:

¹⁰Ɗii sula tahəŋ wəmbataŋ adəv gəla metiŋ naw zuliya*, vi kawzuliya, taka Farisiyen, taka bo duwani.

¹¹Farisiyen aziwke, azuliyək amakran vaska: Aw Maŋgəlva nəgəɗ sukuk soko vi əntat va ɗii meɓɓet ɓa, va meheleŋɗe, də sənaŋ goŋga ɓa, məɗɗaŋ mana'a, walla bo va duwan nəŋ ɓa.

¹²Intatə se' meme adəv pay buhul pak təl sula, əntatə gəm məklaw na zəga an nərah pakə.

¹³Duwan bo aziwik faraɗa, dəɗum naw slan haran a disiŋ ɓa, amma tayərga makrani, amna: Aw Maŋgəlva awəl saha akawa əntə ɗəf məs də mambraya.

¹⁴Intatə nah sukum, nan arahək an Maŋgəlva aŋgələ, yaŋ amndan eŋgil annanda, amma Farisiyen dərah an məs Maŋgəlva aŋgəl ɓa. Vi ko naway də gakdakan zəni kaw gəsani ko naway də gəsan zəni, kaw gakdakani.

¹⁵Yaŋ aki sənən kirin muzliyiɗ sən Zezu də rəŋgiti gəni, amma adan gewleɗ awlanən vaska, ahayetinik məzu kiyən kirini.

¹⁶Zezu ayeke, amna: Məppet kirin memeɗeŋɗe dəzoŋ azawa. Kədawtekin ɓa, vi məlĩ na Maŋgəlva tay viyit kirin zemvit eŋki.

¹⁷Gesiŋ nədawnah sukum: Ko naway an dətaf məlĩ na Maŋgəlva va wiyən muzliya ɓa, atoŋ na adak ɓa.

¹⁸Yahudiyen maɓɓan tay daya, assohonək Zezu: Mərbə zəga mogoni, mi nədaɗɗa nərah gən zeŋgille məza agrak ɓa di?

¹⁹Zezu azlan səna: Vi mi kənah su na mogok kenani di? Say ɗəf takayi mogoni, Maŋgəlvayi.

²⁰Kəsinik ma henziŋɗe: Kələɗɗa mana'a ɓa, kədaw bay gəbay ɓa, kədawhal ɓa, kədaɗɗa saydawa na tepelke ɓa, agakdakan affuk dət moko.

²¹Es pak nərmek wənnet daga nəsaw muzliya.

²²Adan Zezu apprəm vaska, apsən na: Apəl sukuk zəga taka əmpa: Avəl zəga nok pakə. Apsit məs sahaŋɗe, asna akərah arya məzaɓan a disiŋ. Asna kəde gən wəsbawkana.

²³Adan apprəm wəpel vaska, makran asanka, vi məs aryayi sawɓa.

²⁴Zezu awlak vaska, amna: Tuwãhi məs arya dətoŋ gən məlĩ na Maŋgəlva.

²⁵Ɗəɗaah zlogomo watoŋ dəmba batal ki məs arya wətoŋ məlĩ na Maŋgəlva.

²⁶Məzəpprəmən wənnan aɓɗaŋ na: An vaski na naway nakoh di?

²⁷Zezu azlanka: An tuwãh azet ɗiiyi, aza Maŋgəlva tay tuwãh ɓa.

²⁸Yaŋ Piyer amna: Yaŋ naməŋ məppetik zigeɗ pakə, məsbokuko.

²⁹Zezu apsit na: Gesiŋ nədawnah sukum, ko naway dəppan gəla nani, walla guluk nani, walla milmiŋgiɗin, walla migilin, walla kirtini, vi wənna məlĩ na Maŋgəlva.

³⁰Warah dayki as də pay nan an kakaŋka, pay an dədazan bo warah zeŋgille məza agrak na ɓa ha faɗə.

³¹Yaŋ Zezu aye gewleɗ klaw kiyit sula, apsit na: Yaŋ mənam tatə mbat a Zerusalem, an məs kleŋɗe avereŋ aka Wətən Ɗəf* pak wagrak adaka.

³²Vi kappani avet ɗii məs dəsənən Maŋgəlva ɓa wanahaŋ wən azani, waranənni, watufoŋ mefɗe akani,

³³warganən də ɗoŋgroŋɗe, wabayəni. Amma pay ma hoko'ən wasil səkəti əmta.

³⁴Amma dəpprəmən an məs Zezu adawpel akan ɓa.

³⁵Adan Zezu azar aza Zeriko, daŋgar maɓɓan tay tuŋgo aba tive, tayəŋgla zəga.

³⁶Yaŋ apprəm na ɗii tahəŋ wətoŋgoŋ, assohko mi dəgəɗ di?

³⁷Apsənən na: Zezu məs na Nazaret məzu toŋgo.

³⁸Aɗiyək geŋgere: Zezu Wətən Davit* awəl saha kawa.

³⁹Ɗiiyen nabe ahayanənka: Vi dəsan gən ɓatə. Amma aɗiyək geŋger dayki laŋka: Wətən Davit awəl saha kawa.

⁴⁰Zezu aziwke, aɗi sitik wənan sit ɗii də kiyən gən azani. Yaŋ daŋgar azar azani, Zezu assohonəka:

⁴¹Mi kəŋgəl nəgəɗ suku gən di? Azlanka: Mərbə zəga akol su harawa.

⁴²Zezu apsən na: Akolu, wətaf nok akoh gukuko.

⁴³Go'ləŋ haran akolko, asbanək Zezu, tay gakdakan Maŋgəlva. Ɗii məs dulanən pak aɗiyənək ki Maŋgəlva.