Read Gidar Luka 2 Bible Online

Luka 2 - Gidar bible

Luka 2

¹Yaŋ pay Agustus asan məlĩ na Roma aɗiyək wənnan də vereŋ gən iya net ɗii naka dələv na Roma pakə.

²Ndəni wəver madabəŋ an dəgəɗ gala Kiriniyus asan governer aka dələv na Siriya.

³Ɗii adoŋguk wəvere, naway pak awalaŋ gəla nani.

⁴Zozef tam asilik sə Nazeret dələv na Galile, ambatək aka dələv na Zude awalaŋ gəla na Betelihem, walaŋ gəla məs muwa məlĩ Davit, vi Zozef əlfa nan səza Davitti.

⁵Ambatka daka vi kaw vere, ndəni dət Mari, ɗak nan dədaway nakə.

⁶Adan adasoŋ adaka, təla nawa nat Mari agapka.

⁷Tuwək wiyən mizilin, tizi nata tətərək də lukutu, təvoŋ gənək adəv zəga nawzəmgit zigeɗi, vi dərəhaŋ təki atəki net melekeɗ ɓa.

⁸Yaŋ məzuteɗeŋɗe tahəŋ aka moya na dələv nani, tahəŋ wəgenin timeŋgiɗ net dəfɗa.

⁹Maslay na Ɗəfdaya arbanək zənna zeti, gakdak na Ɗəfdaya awiɗik aketi, ageslne'eŋgək sawɓa.

¹⁰Amma maslay apsit na: Kədaw geslne'eŋ ɓa, vi labara nenek nəki sukum, wan neken zit ɗii pakə.

¹¹Dəfɗəŋki, muwa məzu koho vi kum awalaŋ gəla na Davit, ndəni Krestu Ɗəfdaya.

¹²Məpprəma zəga an narban sukum: Wakərəhən wiyən mətərən də lukutu, məvoŋ gən atəki nawzəm zəga net zigeɗi.

¹³Go'ləŋ metiŋgit net maslayɗe azoŋguk wəsapaŋ də maslay annaka, agakdakanənək Maŋgəlva, aɓɗaŋ na:

¹⁴Gakdak aza Maŋgəlva na disiŋ, zam adek aka dəlva hagap azet ɗiiyen aŋgələ, gəm məs dəŋgluwən Maŋgəlva veti.

¹⁵Yaŋ maslayɗe apetini, amndoŋ a disiŋ, məzuteɗeŋɗe apelenənək awalaŋ ziti: Mədamsa Betelihem mula gən zəga an məs Ɗəfdaya arban səməŋka.

¹⁶Agəmənək zit wəmbat adaka, arətənək Mari də Zozef gəm wiyən priŋge, məvoŋ gən adəv zəga nawzəm zəga net zigeɗi.

¹⁷Yaŋ awlanən wina, annəhənək an məs maslay anah sit aka wənna wina.

¹⁸Ɗiiyen dəpprəmən wən məs məzuteɗeŋɗe apeleŋgi, agətaŋgək sawɓa.

¹⁹Amma Mari tərmak wənnan pak a makrata, tatəɗum akani.

²⁰Yaŋ məzuteɗeŋɗe amilyoŋ, tahəŋ wəgakdakanən Maŋgəlva də wəɗi kini, vi wən məs apprəmaŋ, an məs awlaŋ, vi as pak agəɗək va maslay anahsiti.

²¹Yaŋ wəvoŋ buhul dərɓaga wənnani, pay agapək nawkan wəskələn awra də wəlvani, apsənənək iya Zezu, iya nan maslay dənah sət man daga təɓəl wəɗi daway ɓa.

²²Yaŋ pay naɗɗa salala nat Mari agrakə va an ma henziŋ na Moyis anahə, migilin akanənək wiyən a Zerusalem, vi karban aba Ɗəfdaya, adəv gəla metiŋ naw zuliya.

²³Vi ma henziŋ na Ɗəfdaya amna: Wiyən an tizi pak na Ɗəfdayayi.

²⁴Aziyaŋka vi kaɗɗa sazlaga va Ɗəfdaya aɗi wənnani: Mukuɗuŋguleɗ sula walla mukuɗuŋguleɗ na maha sula.

²⁵Ɗəf maɓɓan taya daka, iya nan na Simeyoŋ, ɗəf təstəssi, tay ɓesən Maŋgəlva, tay ga ɗəffan nawkoh git ɗii na Israyel. Əmpəs Salala tay dəni,

²⁶arban sənəka amtəna ɓa, say an awlak Messiya* masləŋ na Ɗəfdaya.

²⁷Əmpəs akak adəv gəla metiŋ naw zuliya. Pay nani migil Zezu akinənək vi kaɗɗa sən an məs ma henziŋ anah naɗɗa.

²⁸Simeyoŋ aslanək wiyən aka vani. Aɗɗak soko sən Maŋgəlva, amna:

²⁹Aw Ɗəfdaya an məs kənah nak agəɗək kakaŋ kana. Apan balam nok dəmtə də zam kana.

³⁰Vi haraw awlak wəkoh noko,

³¹an məs kəzaɓan viyit ɗii pakəŋka.

³²Təki babarəŋka ndəni dədarbok azet ɗii naka dələv pakə, wapsit gakdak sit ɗii nok Israyelɗe.

³³Affəni dət ma Zezu vata agətaŋka adan apprəmən Simeyoŋ apel wən akan vaska.

³⁴Simeyoŋ agəɗ sitik zəzaya, apsət Mari ma Zezu na: Maŋgəlva awelik winəŋka, vi dəsan gən tive naw zet ɗii diiɗa gəm nawkohgit ɗii diiɗa səmbet ɗii na Israyel. Wakpaŋ zəga narban aza Maŋgəlva an məs ɗii atafən na ɓa.

³⁵Warban wəɗum net ɗii məɗamaŋka. Nok tamə gulku, wasok diiɗa aka wənnani.

³⁶Guluk maɓɓat tatə məs kleŋkə, iya nat na Hanna, wətən Fanuyel, zemvit may Asərtə. Təgalək sawɓa. Təɗiyək zil wəsva buhul daga səka goruk nata.

³⁷Yaŋ zilit amtə, yaŋ təsat məzaɗi zil əmpa ɓa, hagap wəsva nat agəɗək kaklaw dədopoɗo kiyən poɗo. Tatə mbat adəv gəla metiŋ na zuli pay pakə, tatəgəɗ sən wəza sən Maŋgəlva dəfəɗ də kapay pakə, tatə se' meme də wəzuliya.

³⁸Tədek dəpaska, təgəɗək soko sən Maŋgəlva, tənah sitik ɗii məzu ganən Maŋgəlva dəkoh gənəgən Zerusalem gəm wənna winəŋka.

³⁹Yaŋ migil Zezu agrakən wəɗɗa an ma henziŋ na Ɗəfdaya aɗi naɗɗa, amndoŋguk dəndən aka dələv na Galile, awalaŋ gəla net a Nazaret.

⁴⁰Wiyən tay ɓaya, tay ɓəlan zəni, aknahək də wəpprəma. Maŋgəlva aɗɗak zəzay nan akani.

⁴¹Aza wəsva pak migil Zezu tahəŋ wəmbataŋ a Zerusalem wədaɗɗa wəzləra na Paska*.

⁴²Adan Zezu agəɗ wəsva klaw kiyən sula, ambataŋgək wəzləra naka va ɗayɗayə.

⁴³Yaŋ wəzləra agrakə, yaŋkan adamndoŋgu, amma Zezu abewik dirɓe a Zerusalem, migilin də sənən ɓa.

⁴⁴Azet na tay dit ɗiiyen dəmbataŋ dənɗaŋ. Adawaŋgək wəsɓəta taka, yaŋ atəŋgaŋ wəkayanən aweleŋgit milmiŋgiɗti dit bayneŋgiɗti.

⁴⁵Amma dərəhnən ɓa, vi ni amndoŋ a Zerusalem wədaw kayani.

⁴⁶Pay ma hoko'ən, arəhənək adəv gəla metiŋ naw zuliya. Tay tuŋgo aweleŋgit məsənaŋ zəga na ma henziŋ dit Yahudiyenɗe, tay əpprəm an adawpeleŋ, tay sohon meti.

⁴⁷Ɗiiyen dəpprəmən wənnan pak agətaŋgək aka wəpprəm nani də wəzlan nan məs adawzlani.

⁴⁸Yaŋ migilin awlanəni agətaŋgək sawɓa. Man təpsən na: Wətuwa vi mi kəgəɗ səm vaŋ di? In də affuk pak maɗulam azlərwiyək daw koyok sawɓa.

⁴⁹Azlansitike amna: Vi mi kədaw kayawən di? Kəsənən na say nəsaw gən adəv gəla na əbba ɓa sa?

⁵⁰Amma dəpprəmən an məs anah sit ɓa.

⁵¹Yaŋ Zezu amndan dənɗaŋ a Nazaret, apprəmək meti. Man tərmak wənnan pak amakrata də wəɗumon wənnan pay pakə.

⁵²Zezu tay ɓaya wəpprəm nan bo tay mbat abe abe, neki aza Maŋgəlva dit ɗii pakə.