Read Gidar Luka 20 Bible Online

Luka 20 - Gidar bible

Luka 20

¹Yaŋ pay maɓɓani Zezu tay ərban wən sit ɗii adəv gəla metiŋ naw zuliya*, anah sitik halabara neneke. Dayaɗe net mes dəlveŋge dit məsənaŋ zəga na ma henziŋ gəm ɗii gugiriɗe,

²azoŋko, assohonənka: Anah səmə də sembe na mi kədaɗɗe zigeɗiŋ di? Nawa dəpsuk sembe nan di?

³Zezu azlan sitik na: Naw van wanəssohokum wən taka. Mənah suwa:

⁴Naway dəslən Zaŋ məgəɗ baptem di? Maŋgəlva sa, walla ɗiiyi?

⁵Atəŋgaŋgək wəbay ma awalaŋ zit də wənah na: An mənahək na: Maŋgəlva, dəsləna, wasohomna: Ya vi mi kətafnən ɓa di?

⁶Amma an mənahək na ɗiiyən dəslənnəni, vas bo ɗii waskəmən dit kuneŋge, vi asəŋgənək Zaŋ məs kleŋgi.

⁷Yaŋ azlanən na: Məsən təki ade ɓa.

⁸Zezu apsit na: An vaski na naw van tam nənah sukum na məs sembe naɗɗe zigeɗis dəndən ɓa.

⁹Dərɓagan ləŋ Zezu atəŋgək wəpel wən məkpaŋgaŋ sit ɗiiyi: Ɗəf agəɗək guli net wəleŋɗe, apanək avet məzən seŋ, ambatək malaka, anziyək dədaka.

¹⁰Yaŋ pay naw ɓu uwa net wəleŋɗe agapə, aslənək gawla nan azet məzən seŋ, vi dəpsənən gən haran nani səket wəleŋɗe. Amma məzən seŋ avər nənək masləŋ, amil gənənək van mekeleŋ məzapsən zəga ɓa.

¹¹Affən guli net wəleŋɗe aslənək gawla nan maɓɓani, avərən kəmpa amil gənənək van mekeleŋ.

¹²Aslənək mohoko'it əmpa, aɗiyaŋ sənənək vamviya, arɓəh nənka.

¹³Affən guli net wəleŋɗe amna: Mbar nədaɗɗa di? Wanəslən wətu an nəŋgələ, nan wagakdakanəni.

¹⁴Amma adan məzən seŋ awlanəni, apeleŋgik awalaŋ zit na: Məzəm gəla yaŋ dəda zanəŋka, məbay səmə guli dəsan gən kanamə.

¹⁵Akanənək sə guli ama poho, abayənka. Yaŋ Zezu assohu, vas na affən guli net wəleŋɗe madawgiɗ sit di?

¹⁶Wade, wabey məzən seŋgi, wappan guli nan avet ɗii meɓɓeti. Adan ɗii apprəmən vaska, aɓɗaŋ na agəɗ na vas ɓa.

¹⁷Amma Zezu awleke amna: Ya an məverin mbar aŋgəl wənah di? Kunəŋ məs mərkaŋ gəla asgaŋgəŋka, awla ndəni dəkpaŋ kuwən na sləma.

¹⁸Ko naway dəsbər səka gərəməŋka warah vamviya. An abətək aka ɗəf bo watakaɗ va kəppa.

¹⁹Yaŋ məsənaŋ zəga na ma henziŋ dit ɗii gugiriɗ net Farisiyenɗe* aŋglaŋ wərmanən Zezu dəpaska, amma a geslene'eŋgək viyit ɗiiyi, asənənək pak wən məkpaŋgaŋ Zezu apeləŋ eketi.

²⁰Atəŋgaŋgək wəga Zezu, asləŋgaŋgək ɗiiyi vi kaw ki sit an məs adaɗɗa. Ɗii net aɗɗanənək zit va ɗii tektekki, vi karma Zezu də wəssoho kapsit ɗii na governer.

²¹Assohonənka: Mərbə zəga, məsənək an kədarba, də an kədawpele as pak goŋgayi. Ɗii pak aslaŋgək daka daka azoko, is tatərban tive na Maŋgəlva də goŋga.

²²Ma henziŋ atatək əpsən zomorgol sən məlĩ na Roma sa walla də tak ɓa?

²³Zezu asənək vurum neti, apsit na:

²⁴Mərban su sulay vani. Foto na naway də iya məverin akanəŋ di? Azlan nənək na: Na məlĩ na Romayi.

²⁵Apsit na: Məmndagan sən an dəslə sən məlĩ na Roma, məpsən Maŋgəlva bo an dəslə səni.

²⁶Dərəhaŋ wənnarman abet ɗii ɓa. Amma agətaŋgək aka wəzlan nani, aɓətaŋka.

²⁷Yaŋ ɗii meɓɓet səmbet Sadusiyenɗe. (Net tahəŋ wənahaŋ na Wasilya tay səka əmta ɓa.) Assohonənək Zezu:

²⁸Mərbə zəga, Moyis aver səmək na: An ɗəf amtəka, apatək guluk nani tuwa ɓa, say məlmən dəzəm gəla zata, dəɗi sən gən zev məlməni.

²⁹Kirin tahəŋ də məlma zit buhul. An daya akayək gulku, yaŋ amtə məza duwaŋ ɓa.

³⁰Masula'it azəmək gəla azata, ma hoko'it bo azəmək gəla zata.

³¹Ha ndəɗaŋ buhul pak aɗitənka amtaŋgək məza ərəhaŋ kirin ɓa.

³²Yaŋ guluk tam təmtə.

³³Kaŋ as kana pay wəsilyo səkəti əmta na kawsat kaguluk na nawa səmbet kandi? Vi ndəɗaŋ buhul pak aɗitənka.

³⁴Zezu azlan sitik na: Zel dit gul annaka dəlva wagəmən ziti.

³⁵Amma ɗiiyen məs dəgapaŋ nawsilyoŋ səki əmta nasoŋ də zeŋgillet aka dələv an dəda zani, agəməna zit ɓa.

³⁶Vi amtaŋ na əmpa ɓa. Wagulyoŋ va maslayɗe, wakpaŋgaŋ va kirtin Maŋgəlva vi asilyoŋgək səki əmta.

³⁷Moyis anahək kotakə ɗii mimtit wasilyoŋ də zeŋgille. Atəki adawpel wənnet dezeze, amna: Ɗəfdaya Maŋgəlva na Abraham, Maŋgəlva na Isak, Maŋgəlva na Zakub.

³⁸Maŋgəlva tay va Maŋgəlva net ɗii mimtit ɓa, amma Maŋgəlva net ɗii medereti, vi ɗii pak dəndən ada soŋ medereti.

³⁹Ɗii meɓɓet səmbet məsənaŋ zəga na ma henziŋ aɓɗaŋ na: Mərbə zəga kəpelik mogoni.

⁴⁰Geslne adek dassoh wən maɓɓani.

⁴¹Zezu apsit na: Mbari adawnahaŋ na Messiya Wətən Davitti* di?

⁴²Vi Davit sən kiyən anahək adəv gəlya nan na: Ɗəfdaya anahsən Ɗəfdaya naw na: Asok aka va dəzəŋ nawa,

⁴³hagap nəvoŋgiti gən məzu zel kun amba tulko.

⁴⁴Davit ayak na Ɗəfdaya ya mbari Krestu ada kpaŋ wətən di?

⁴⁵Zezu apel sitik gewleɗ keret ɗii məzapprəmaŋ wənnan pakə, amna:

⁴⁶Məga zukum səzet məsənaŋ zəga na ma henziŋ, məŋglaŋ wəbal də lukutɗe zezekɗe. Aŋlaŋ ɗii disɗetin gən agilet lumiɗi. Tay weleŋ təki nasa mogon day pak adəv gəla nawpel wənnet Yahudiyenɗe, atəki nawzəma, tahəŋ wəkayaŋ təki mogon naso.

⁴⁷Tayəɗɗaŋ kuket aket gil net gəbayɗe, taŋ zəmən gəla neti, tayənziyaŋ diiɗa aka wəzuli neti vi ɗii duleniŋgən va ɗii na Maŋgəlva. Warəhaŋ kita an tatuwãha.