Read Gidar Luka 24 Bible Online

Luka 24 - Gidar bible

Luka 24

¹Yaŋ də mompum pum na Alatə, gil nek ambataŋgək a magamasə, akanənək tursan məs akayaŋ.

³Atoŋgoŋguk adaka, amma dərəhən gəbay na Ɗəfdaya Zezu ɓa.

⁴Atapetik aka an məs dəgəɗə. Yaŋ ɗii sula arbanən zit azeti, tahəŋ də lukut azet məzu wiɗ diiɗa.

⁵Gil nek ageslne'eŋke, aɗamanənək hereti, amma ɗii net aɓɗaŋ na: Vi mi kədaw kayanən ɗəf madaran aweleŋgit ɗii mimtit di?

⁶Tayaŋ ɓa, asilke. Məɗumon məs apel daga adawsan aka dələv na Galile, amna:

⁷Say kapsəni Wətən Ɗəf* avet məɗɗaŋ mambray wakpaa'ən aka wəlaŋga məzliwrihe, wasil pay ma hoko'ən səki əmta.

⁸Yaŋ aɗumonən wənna Zezu.

⁹Yaŋ azaraŋ səza magamasə, ambataŋgək wənah sit gewleɗ klaw kiyit taka dit ɗii meɓɓet pak wənnet zigeɗiŋki.

¹⁰Ɗii məs dəzoŋ wənahaŋ ndəɗaŋgəŋ Mari na Magdala gəm Zannə gəm Mari ma Zakə, gəm gil məs dəda soŋ dənɗaŋ.

¹¹Gewleɗ awlanənək wənnet gul wən ɗar mekeleŋ, dətafnən ɓa.

¹²Amma Piyer asilke, anzanka, ambatək a magamasə, aɓeke adaka, duwəl zəga ɓa, say boɗoko afuŋ. Yaŋ amndani agətək aka məs dəgəɗə.

¹³Yaŋ, pay nani gewleɗ sula tahəŋ wəmbataŋ awalaŋ gəla na Emawus, faraɗayi gap kilometər klaw kiyən taka də Zerusalem.

¹⁴Tahəŋ wəsgaŋ meŋ aka wən məs dəgəɗ aka Zezu.

¹⁵Daga dəɓəlaŋ wəgrakən wəpelən ɓa, yaŋ Zezu agapək ambeti tay mbat dənɗaŋ.

¹⁶Awlanənka, amma zəga tay dətek daw sənənni.

¹⁷Zezu apsit na meŋ na mi kədawzəmaŋ də wədaw di? Yaŋ aziweŋ zit sirip.

¹⁸Yaŋ ɗəf taka məs adawyaŋ na Keliyopas azlan na: Malaka kənan a Zerusalem sa? Kəsən məs dəgəɗ adəv wəvoŋgəŋ ɓa sa?

¹⁹Assohotike: Mi dəgəɗ di? Yaŋ azlan sənən na: Məs dəgəɗ aka Zezu məs na Nazaret, məs kleŋ metiŋ, də sembeyi adivit wəzaɗe də wəpel aba Maŋgəlva də abet ɗii pakə.

²⁰Ɗii gugiriɗ net məs dəlveŋge namə dit dayaɗe net ɗii namə azəmənək kini, atawaŋgək kita namta akani, a kpaa'ənək aka wəlaŋga məzliwrihe.

²¹Azam na wasan məzu koh git Israyelɗe. Amma də as pakə, pay hoku yaŋ dəpaŋka zigeɗ net aɗɗaŋ akani.

²²Əmpa bo gil suwalaŋgəm atapamənka, na mom pumoŋ pum ambataŋgək a magamasə,

²³dərəhən gəbay nan ɓa. Gil net amilyoŋko, anahaŋ səmənək na, maslayɗe arbanənək zit azeti, apsitin na madarani.

²⁴Ɗii meɓɓet suwalaŋgəm ambataŋgək a magamasə, arəhənək zigeɗ net va gil anahaŋ amma ndən sən kiyən, dulanən ɓa.

²⁵Yaŋ Zezu apsit na: Kay Zel məza tahəŋ də wətaf ɓa, dewɗe kədawtafnən an məs kleŋɗe anahaŋ di?

²⁶Ya say an Messiya* azəmək sahayi kan dətoŋ gən adəv gakdak nan ɓa sa?

²⁷Yaŋ apprəman sit an ɗerewelɗe apeleŋ akan pak daga ɗerewelɗe na Moyis ha ɗerewelɗe net məs kleŋɗe pakə.

²⁸Yaŋ adawgapaŋ go'o də walaŋ gəla məs adawmbataŋ agəɗək va wətoŋgo.

²⁹Ayanənək də wənah na: Asok də mənamə, vi pay tay ɓa, dəfɗi kana. Atoŋko kawsan dənɗaŋ.

³⁰Yaŋ asan dənɗaŋ kawzəma, agimik dupeŋɗe, asokonək Maŋgəlva, arɗetike, apsitike.

³¹Yaŋ heret akolu, asənənka, amma azək səma hereti.

³²Yaŋ anahaŋ awalaŋ zit na: Makram dəzla va offo daga adawpel səm aka tive, də wəpprəman səm wənna ɗerewelɗe net məs kleŋɗe nak ɓa sa?

³³Pay nani yaŋ asilyoŋ, amilyoŋ a Zerusalem, arihinik gewleɗ klaw kiyit taka, akkalaŋgək dit ɗii məs dəda soŋ dənɗaŋ,

³⁴tahəŋ wənahaŋ: Gesiŋ kpakə Ɗəfdaya asilke Simoŋ awlaka.

³⁵Net bo anah sitinik an məs diri aka tive, va asənən Zezu pay arɗet dupeŋɗe.

³⁶Yaŋ adan adawpelenən wənnani, ndən sən kiyən arbanək zən azeti, apsit na: Wasan zam azokum.

³⁷Makret azlaka, ageslne'eŋke, azet na tuyayi awlaŋ.

³⁸Amma apsit na: Vi mi kədaw geslne'eŋ di? Vi mi wəɗum vas asan a mokrokum munokum pak di?

³⁹Mula vaw sula gəni də təllu sula gəni, əntə. Mərəŋguwa, mula, vi Əmpəs tay də sluw walla dit slesleŋɗe va kulanən nəsaw dəndən ɓa.

⁴⁰Yaŋ adawnaha, arbanək van sula gəni də təllən sula gəni.

⁴¹Zit annekək sawɓa, agətaŋgək sawɓa, ha dəɓapaŋ wətaf nən tagay ɓa. Adan tahəŋ gərəŋ gərəŋ tagay, apsit na: Zəga naw zəm taya vokum aŋ sa?

⁴²Akisənənək kilif məpsani.

⁴³Aboŋguk səzani, ampərək ama hereti.

⁴⁴Yaŋ amna: Aŋki məs nədawnah sukum daga nədaw saw də munokum naka. An məverin akaw adəv ma henziŋ na Moyis də ɗerewelɗe net məs kleŋɗe də gəlya na Davit pak dəsan gən gesiŋ.

⁴⁵Yaŋ akol maɗuleti dəpprəmanən gən wənnet ɗerewelɗe,

⁴⁶apsit na: Vaŋki va məverin: Messiya* wazəm saha, wasil səkəti əmta aka pay ma hoko'ən,

⁴⁷vi dərbanən gən wənna tubi na viyan mambray dərbə gən azet ɗii pak də iya nani, dətəŋ daga sə Zerusalem.

⁴⁸Munokum təsaydawa na wənnəŋka.

⁴⁹Wanəslən sukum an məs Affu aynan wənnani. Amma məsoŋ awalaŋ gəla metiŋ ha an sembe na disiŋ adek akokum kana.

⁵⁰Yaŋ, Zezu agil suwalaŋ gəla metiŋ, akek kla Baytaniya. Aslanək van sula gəni, agəɗ sitik zəzaya.

⁵¹Daga daya adaw gəɗ sit zəzaya, awɗakək dənɗaŋ, apeŋgək a disiŋ.

⁵²Net bo, dərɓaga azuliyaŋ sənənni, amndoŋguk a Zerusalem də wənneken ziti.

⁵³Tahəŋ wəsbanən wəmbat adəv gəla metiŋ na zuli pay pakə, tahəŋ wəɗiyən ki Maŋgəlva, tahəŋ wə gakdakanəni.