Read Gidar Luka 4 Bible Online

Luka 4 - Gidar bible

Luka 4

¹Zezu amə'ək daga sə məlpa na Zordan, aknahək də Əmpəs Salala*, Əmpəs akak awra.

²Satan arakanək adaka, pay kaklaw poɗo. Pay nan pak dəzəm zəga ɓa. Yaŋ pay nan agrakə, may tay dani.

³Satan apsən na: An Wətən Maŋgəlva* kənan na, aɗi wənnan sən gərməŋka dəkpaŋ gən zəga nawzəma.

⁴Zezu azlan sənək na: Ɗerewel amna: Ɗəf asanna madaran vi way vi kaaka ɓa.

⁵Satan akak a disiŋ, arban sənəka, dule gən məlyeŋge na dələv pak də haran pilim taka,

⁶apsən na: Wanəpsuk sembeɗ na dəlvəŋka də arya nadəvən də gakdak na məlĩ nan pakə, vi məpsuwi, naw van tam wanəɓap wəpsən ɗəffan nəŋgəl pakə.

⁷An kukdukuk takprok afuŋ kə zuli suwəka, zigeɗis pak wasoŋ konoko.

⁸Zezu azlan sənək na: Ɗerewel amna: Azulisən Maŋgəlva Ɗəfdaya nok kaaka'ə, sən katər gən kəl gəɗsən wəza.

⁹Yaŋ Satan akak a Zerusalem əmpa, asu gənək aka gəla metiŋ naw zuliya*, apsən na: An Wətən Maŋgəlva* kənanna, azlah daga saŋka ha a fuŋ.

¹⁰Vi ɗerewel anahək na: Maŋgəlva waɗi wənnan sit maslayɗe nani vi dəzoŋ gən wəguko.

¹¹Əmpa na də kaslkun gən də veti, vi tuluk adaŋgbay aza gərəm ɓa.

¹²Zezu azlan sənək na: Ɗerewel amna: Kədawrakan Maŋgəlva Ɗəfdaya nok ɓa.

¹³Yaŋ Satan agrak wənna rakani də kuket nan pakə, ambatka, apanəka, say pay mambərən əmpa.

¹⁴Yaŋ Zezu amndan aka dələv na Galile, aknahək də sembe na Əmpəs Salala. Atəŋgaŋgək wəpel wənnan aka dələv nan pakə.

¹⁵Apel sitik ɗii wənna Maŋgəlva adəv gəla nawpel wənna Maŋgəlva net Yahudiyenɗe, agakdakanənka.

¹⁶Yaŋ Zezu ambat a Nazaret, awalaŋ gəla məs aɓayə. Pay naffet* na atoŋguk adəv gəla nawpel wənna Maŋgəlva net Yahudiyenɗe, va an adaɗɗa ɗayɗay. Asilik vi kaŋɗan ɗerewel,

¹⁷apsənənək ɗerewel na məs kleŋ Ezay, akoluk ɗerewel, arəhək təki məs məverin vaŋka:

¹⁸Əmpəs na Ɗəfdaya taya kawa, awelwəka vi nəpel gən alabara nenek sit məs saheŋɗe, aslənwəka vi nərban sit gən ɗiiyen na daŋgay wənna peti, vi kawkol sit heret deŋgerɗe, vi kawkohgit məzu zəmaŋ saha.

¹⁹Vi wətəl ma aka wənna wəsva an Ɗəfdaya adarban mbəlembəle nani.

²⁰Yaŋ ampan ɗerewel naka, apsən məzu gani, asanka. Ɗii na dəv gəla nawpel wənnet Yahudiyenɗe pak heret azan nyo.

²¹Yaŋ atəŋ wəpelsiti: Gəla təki an məvernəŋ adəv ɗerewel laŋkəŋka aknahək azokum kakaŋka va ɗerewel na Maŋgəlva anahə.

²²Ndəɗaŋ pak atafənək wənnani, agətaŋgək aka wəpel nan mogonəŋka, aɓɗaŋ na: Ndəni wətən Zozef ɓa sa?

²³Zezu apsit na: Nəsənka, wakənahaŋ suwən wən məkpaŋgaŋka: Zloktor, ambəl gən kizuko. Wakənah suwənna: Məpprəmək an kəgəɗ a Kafarnahum pakə, aɗɗa awalaŋ gəla nokuŋ tam kan ɗa.

²⁴Yaŋ kəmpa amna: Gesiŋ nədawnah sukum, məs kleŋ tay ko taka adawtafaŋ awalaŋ gəla nan də mogon ɓa.

²⁵An nəsəŋ nədawnah sukum, gil məzəmaŋ saha tahəŋ aweleŋgit Israyelɗe diiɗa gala pay na məs kleŋ Eliyas, kolay agəɗ wəsva hoku də təla slire buwən dəzi ɓa, may metiŋgin agəɗək amba dələv pakə.

²⁶Amma Maŋgəlva də sləŋ Eliyas azat guluk mə zəm saha ko taka səmbet ɓa, say azat ga gəbay taka awalaŋ gəla na Sarepta aka dələv na Sidon kaaka'ə.

²⁷Məs kokoleɗ tahəŋ diiɗa aweleŋgit ɗii na Israyel gala pay na məs kleŋ Elisa. Ko səmbet taka tay dəmbəl ɓa, say Naaman ɗəf naka dələv na Siriya kaka dəmbələ.

²⁸Adan apprəmən wəpelis vaska ɗiiyen nadəv gəla nawpel wənnet pak gidivit adək sawɓa.

²⁹Asilyoŋko, akdəhnənka, akkanənək ama poho səza gəla aka mosorgo an məs walaŋ gəla net asan akani, vi kaw slaŋ gən afuŋ.

³⁰Amma agilik suwaleŋti, ambatka.

³¹Yaŋ Zezu ambat a Kafarnahum, awalaŋ gəla naka dələv na Galile, apel sitik ɗii nadak wənna Maŋgəlva pay naffete*.

³²Agətaŋgək aka wəsən nani, vi də sembe na Maŋgəlva adawpele.

³³Ɗəf maɓɓan taya dəv gəla nawpel wənnet Yahudiyenɗe, tay də əmpəs mbrayen, atəŋgək ənzla vamvəl də sembe, amna:

³⁴Is Zezu na Nazaret məsok də mənam di? Issi, is Zezu mə Nazaret, kədek vi kawzam gən saha sa? Nəsənkuko: Əstə masləŋ an Salala* məs Maŋgəlva asləŋ kənani.

³⁵Zezu abay sənək gagay sən witem naka, apsən na: Aɓatə, agil səkani. Witem aslbak ɗəf nak abet ɗii pakə, yaŋ witem agili, apanəka, dəgəɗ sən zəga ɓa.

³⁶Ɗii pak agətaŋka apeleŋgək awalaŋ ziti: Wən mi yaŋ van di? Tay ɗi wən sit witemɗe mbreyit də sembe, tahəŋ wəgilyoŋ səka ɗəffa.

³⁷Apelinək wənna Zezu aka dələv nan pakə.

³⁸Adan Zezu agil sədəv gəla nawpel wənnet Yahudiyenɗe, ambatək ana Simoŋ da. Arəhtək attən Simoŋ, tat məvoŋgət də gbəgba' na gamba diiɗa, akkamanənək Zezu də mbəl gətəgəni.

³⁹Aɓe'ək akat məs gbəgba'ək nakə, apelək daya daya aɗiyək wənnan sən gbəgba'a dəgil gəni. Agilik səkat ɗak nakə, təsilik go'ləŋgə tədə sitik waya.

⁴⁰Moskoy təki zayə, aki sənənək məs gbəgbaɗe dit ɗii mitemti gəm məs gbəgbaɗe temtem sən Zezu. Aɗiyək van aket taka taka pakə, ambəl gitike.

⁴¹Witemɗe mbəreyit agulyoŋguk səket ɗii diiɗa, tahəŋ wənzlaŋ vamvəl də wənnəh vaska: Əstə Wətən Maŋgəlva*. Amma Zezu apel sitik də gagay, atekik dawpeleŋ vi asənənka ndəni Messiya*.

⁴²Adan təki addaŋgə, agilke ambatək awra katər gəni. Ɗii akayanənka, yaŋ arəhənni dəŋglaŋ dəpeti gən ɓa.

⁴³Amma Zezu apsit na: Aslək nəpel gən labara nenek na məlĩ na Maŋgəlva atəki maɓɓan tamə, vini Maŋgəlva aslənwa.

⁴⁴Ambatka, apelik adivit gəleɗe nawpel wənnet Yahudiyenɗe naka dələv na Zude.