Read Gidar Luka 6 Bible Online

Luka 6 - Gidar bible

Luka 6

¹Yaŋ pay naffet na Zezu atoŋguk kla dəv guli na alkamari (zev hay neti) dit gewleɗ nani. Gewleɗ nan anzlaŋ kiyən taka taka, asurotənək aza veti, ampərənka.

²Farisiyenɗe* meɓɓet apsitin na: Vi mi kədaɗɗaŋ zəga an məs ma henziŋ dəpan tive naɗɗan pay naffet ɓa di?

³Zezu azlan sitike: Kəŋɗanən ɗaah ɓa sa an məs Davit dit ɗii nan aɗɗaŋ pay mbərən, yaŋ maay adawdet ɓa sa?

⁴Atoŋguk adəv gəla na Maŋgəlva, agəmək memteke məs məɗiyit vi Maŋgəlva, azəməka, apsitik ɗii nani, azəmnənka, ko vi ma henziŋ nam atak ɗii meɓɓet dawzəməni, say məs dəlveŋge kaaka'ə.

⁵Zezu aməsək wənah na: Wətən Ɗəffi* affən pay naffete.

⁶Yaŋ pay naffet* maɓɓan əmpa, Zezu atoŋguk adəv gəla nawpel wənnet Yahudiyenɗe atəŋgək wərba wənna. Ɗəf məs van dəzəŋ məmtən taya daka.

⁷Məsənaŋ zəga na ma henziŋ dit Farisiyenɗe* tahəŋ wəganən Zezu kuzuŋ wambəl gən ɗəffəŋ pay naffete, vi dərəhaŋ gən tive naw ɗi sən dolgoy.

⁸Amma Zezu asənək wəɗum neti. Apsən ɗəf məs van məmtən nak na: Asili, aziw aweleŋgit ɗiiyiŋki. Ɗəf nak asilke, aziwke.

⁹Yaŋ Zezu apsit na: Nəssohokum: Mi ma henziŋ nam apsəm tive naɗɗan pay naffet di? Wəɗɗa mogon sa, walla wəɗɗa mbrayen? Wəkoho gən zeŋgille ɗəf sa, walla wəzani?

¹⁰Awlek pakə, yaŋ apsən ɗəf nak na: Appar voko. Apparəka, ambəlka.

¹¹Ɗii meɓɓet gidivit adək sawɓa, aslereŋgək aka an adaɗɗaŋ sənən Zezu.

¹²Yaŋ pay nani Zezu apeŋgək aka gərma vi kawzuli ya avoŋguk kim akawzuli sən Maŋgəlva.

¹³Yaŋ təki adaŋgə, ayek gewleɗ nani, awelik klaw kiyit sula suweleŋgiti, ayek na masləŋɗe.

¹⁴Simoŋ (məs apsən iya na Piyer) gəm məlmən Andre, Zak gəm Zaŋ gəm Filipi gəm Bartolomi,

¹⁵Matiye gəm Tomas gəm Zak wətən Alfa, Simoŋ (məs adawyaŋ na məkay wəgil git ɗii nan səka balam).

¹⁶Zudas wətən Zak gəm Zudas Iskariyot an məs dələ zəm ki Zezu.

¹⁷Yaŋ Zezu aprik səka gərəm nak dənɗaŋ, yaŋ aziw atəki ɗawrakə, ɗiiyen dətaf nən tahəŋ diiɗa adaka. Ɗii diiɗa məs naka dələv na Zude pakə gəm ɗii na Zerusalem gəm ɗii naka məlpa ndəɗaŋgəŋ ɗii na Tirus gəm ɗii na Sidon pak tahəŋ adaka.

¹⁸Azoŋguk vi kapprəm wəpel nani, gəm vi kaw mbəl git səka gbəgba' neti. Ɗii məs tuyeŋɗe adawzəm gitin saha azoŋko, ambəlgitke.

¹⁹Ɗii pak aŋglaŋ wərəŋ gənəni, vi ni sembe agulyoŋ səzani, ambəl git ɗii pakə.

²⁰Adan Zezu awle gewleɗ nani, amna: Wakpaŋ azokum zəzaya, munokum məzurayɗe, vi məlĩ na Maŋgəlva nokumi.

²¹Wakpaŋ azokum zəzaya munokum məs maay adawda kakaŋka, vi nokum wakə baŋ ba'ə. Wakpaŋ azokum zəzaya, munokum məzu həmmaŋ kakaŋka, vi wakə masaŋ ba'ə.

²²Wakpaŋ azokum zəzaya, an ɗii azel kumənko, andol kumənko, arokumənko azelekumənko vi wənna Wətən Ɗəffa*.

²³Mənekenzukum, məɗələ, vi riba nokum tay gukum metiŋgin a disiŋ. Vi dəhiŋgiɗit vas aɗɗaŋ sitin məs kleŋɗe laŋka.

²⁴Amma wakpaŋ azokum bonoy, munokum, məs aryeɗi, vi kərəhaŋgək zam nokum.

²⁵Wakpaŋ azokum bonoy, munokum məzu baŋ kakaŋka, maay wadukum ba'ə. Wakpaŋ azokum bonoy, munokum məzu masaŋ kakaŋka, wa kəhəmmaŋ də wəska morkoyo ba'ə.

²⁶Wakpaŋ azokum bonoy, an ɗii anah sukumənək na mogoni, vi vas dəhiŋgiɗit anah sitin məs kleŋɗe məwaŋ wənna.

²⁷Intatə nah sukum, munokum məzapprəmən wəpel nawa: Məŋglu məzu zelkuməni, məgəɗ mogon sit məɗɗaŋ hire nokum.

²⁸Məgəɗsit zəzay sit məzu raygukuməni. Məzuli viyit məzu zəm gukumən saha.

²⁹An ɗəf avərkuk aka tapaslayuk dahãh, akpaŋgan sən an dahãh əmpa. An ɗəf agəmək lukut metiŋgin noko, kəl takən daw gəmət akən muzliyək ɓa.

³⁰Ko mi ɗəf assoh pak apsəni. An ɗəf agəmək zəga noko, kədawkayan ɓa.

³¹An məs kəŋglaŋ ɗii dəɗɗanən sukumən gən nəŋka, məɗɗa sit ɗii tamə.

³²An munokum tatəŋgluwin ɗiiyen dəŋglu kuməni, zəga na soko awan kədawgaŋ əmpa di? Ko ɗii məɗɗaŋ mambray pak tahəŋ əŋgluwin ɗiiyen dəŋgluwini.

³³An munokum tatə ɗaŋ mogon sit ɗii məɗɗaŋ sukumən mogon na zəga na soko awan kədawgaŋ kan di? Ko məɗɗaŋ mambray pak vaska daɗɗaŋ.

³⁴An munokum tatə zəm gitin ɗiiyen məs kədawrəhaŋ laha siveti, zəga na soko awan kədawgaŋ kan di? Ko məɗɗaŋ mambray pak tahəŋ wəzəm gitin məɗɗaŋ mambraya, vi dəɗɗaŋ sitin gən tamə.

³⁵Amma məŋliw məzu zel kuməni məgəɗ sit mogoni məza wəɗum na wanərahə ɓa. Wakərəhaŋ riba diiɗa, wakəkpaŋgaŋ kirtin Maŋgəlva an dəday pakə. Vi ɗəf mogoni azet ɗii mogeti dit məɗɗaŋ mambray pakə.

³⁶Məsoŋ də ula saha va Affukum asan məwəl saha.

³⁷Kədawtawaŋ kita aket ɗii meɓɓet ɓa, Maŋgəlva bo ataw na kita akokum ɓa. Kədazlbenin ɗii də kita ɓa Maŋgəlva bo azlbukum na də kita ɓa. Məviyan sit mambray net ɗiiyi Maŋgəlva bo waviyan sukum mambray nokum.

³⁸Məpsit ɗii meɓɓeti, Maŋgəlva wapsukum, zəga naw sla zəgaŋka mogoni, aslak paah setete, azi sukumək adəv ziba na lukut nokuməŋ metiŋginiŋka. Yaŋ zəga məs kədawslenin ɗii dəndənnəŋka, dəndəni Maŋgəlva adawslukum.

³⁹Zezu apel sitik wən məkpaŋga əmpa: An daŋgar tay əkdəh daŋgar, sulegit pak abətaŋ na adəv vov ɓa sa?

⁴⁰Məzu yagan zəga a day na ki məzərban sən ɓa, amma məzu yagan zəga an agrakək wəyagan zəga wagap va məzərban səni.

⁴¹Vi mi kədawla kevile ara məlmuk di, amma nok kan kaɗum aka wəlaŋga narok ɓa di?

⁴²Mbari kəɓap wənah sən məlmuk na: Məlmuwa appawa nəgəm suk kevile səroko, amma nokna kawla wəlaŋga sərok ɓana vi mi di? Muluvuluvu, agəm wəlaŋga sərok tagay, kuwəl gən mogoni, asna kə gəm gən kevile səra məlmuko.

⁴³Wəlaŋga mogon awə na kirtin mbreyit ɓa, wəlaŋga mbrayen awə na kirtin moget ɓa.

⁴⁴Wəlaŋga pak kaw səni də uwa nani. Kaw ɓuhi sukoyo səka gedirge ɓa, kaw ɓuhi uwa na vin səka dezeze ɓa.

⁴⁵Ɗəf mogon wagil gən zəga mogon səki wəzaɓan sə makranəŋ bo mogoni. Ɗəf mbrayen, wagil gən mambray səki məs azaɓan amkranəŋka. Vi ma ɗəf wapel an makra ɗəf aɗamə.

⁴⁶Vi mi kədawyuwənna Ɗəfdaya, Ɗəfdaya di? Amma kaɗɗanən an məs nənah sukum ɓaŋ di?

⁴⁷Wanərban sukum ɗəffan dədezawa, məzəpprəm wənnawa, məzər mani, va naway agil di.

⁴⁸Agilik va ɗəf mərkə gəla, aso'ək vov nan kpumu aɗiyək gabban aka milɓe. Iŋkile azoŋko aziweŋke amba gəla naka, amma dəɓəsl ɓa, vi mərkani mogoni.

⁴⁹Amma məs apprəm wəpel naw ɓa məza arman ɓa, agilik va ɗəf mərkə gəla aka membike, məza wəso vov nan ɓa. Adan iŋkile azoŋ amba gəla naka go ləŋgə aɓəslək pakə.