Read Gidar Luka 7 Bible Online

Luka 7 - Gidar bible

Luka 7

¹Adan Zezu agrak wəpel wən sit ɗiiyi, ambatək a Kafarnahum.

²Daya net sozeɗ na Roma gawla nan məs aŋgəl tay də gbəgba' go'i namta.

³Yaŋ daya net sozeɗ nak apprəm wənna Zezu, aslinik ɗii gugiriɗ net Yahudiyenɗe azani vi kakamani dəde gən wəmbəl gən gawla nani.

⁴Azoŋko aza Zezu, akkamanənək sawɓa, aɓɗaŋ na Ɗəffəŋka, aslək kə baah sən gəni

⁵vi aŋgluwik ɗii namə, ndən dərka gəla nawpel wənnamə.

⁶Yaŋ Zezu ambat dənɗaŋ Adan agap go'o də gəla, daya net sozeɗ naka aslinik bayneŋgiɗin apsənən na Mərbə zəga kəyan zuk ɓa, vi nəgap ɗəf kətoŋ gən annawda ɓa.

⁷Vi vaski nulak zuna nəgap nawmbat amaŋgavok ɓa. Apel wən taka kaaka'ə gawla naw wambəllə.

⁸In sən kiyu amba təlit ɗii gugiriɗ naw nani, naw van tamə sozeɗ tahəŋ amba təlwa. An nənah sənək aŋka doko wambatə. An nənah sənək andaka bo ade wade. An nənahək na gawla nawa aɗɗa vana waɗɗa.

⁹Adan Zezu apprəm wənəska, agətka. Yaŋ akpaŋgə, appsit məzəsba nən na: Ko aweleŋgit Israyelɗe nərah ɗaah ɗəf də wətaf vaŋ ɓa.

¹⁰Yaŋ masləŋɗe amilyoŋko eŋgil ana daya net sozeɗ da arəhənək gawla ambəlka.

¹¹Yaŋ Zezu ambat awalaŋ gəla məs adawyaŋ na Nayin. Gewleɗ nan dit ɗii diiɗa ambataŋgək dəndən.

¹²Adan agap gbah a memeŋle na walaŋ gəla nani, yaŋ ɗii adawslanən ɗəf məmtən kadaw ndəkən. Ɗəf məmtən van wətət ga gəbayi, ndəni taka vaska vata. Ɗii nawalaŋ gəla nan tahəŋ diiɗa dənta.

¹³Adan Ɗəfdaya awləta awələk saha kata amna kədawhəm ɓa.

¹⁴Yaŋ ambatə arəŋgən zəga an adaw slanən ɗəf van dənnəŋka. Ɗii məzu slanən aziweŋke. Zezu amna: Gawla, əntatə nah suko: Asili

¹⁵Ɗəf məmtən asilke, asanka, atəŋgək wəpele. Zezu apsətək mani.

¹⁶Ɗii pak ageslne'eŋke, agakdakanənək Maŋgəlva, aɓɗaŋ na: Məs kleŋ metiŋgin arbanək zən awalaŋmə, Maŋgəlva adek wəbaah sit ɗii nani.

¹⁷Halabara na Zezu atrayək aka dələv na Zude dit dəlveŋge pakə.

¹⁸Yaŋ gewleɗ na Zaŋ anah sənən wənnan pakə. Yaŋ Zaŋ aye ɗii sula suweleŋgit gewleɗ nan neki.

¹⁹Aslinik aza Ɗəfdaya, dəsohonən gəni: Əstə an məsəna wadeŋ sa? Walla məga ɗəf maɓɓani?

²⁰Yaŋ azoŋ aza Zezu, apsənən na: Zaŋ məgəɗ baptem də slənəm azoko, məssohok gəni: Əstə an məsəna wade nak sa, walla mə ga ɗəf maɓɓani?

²¹Dəpaska Zezu ambəl gitik məs gbəgbaɗe diiɗa də gbəgba' temtemi, akohgitik ɗii meɓɓet səmet tuyeŋɗe mbrayti, akoluk heret deŋgerɗe.

²²Yaŋ azlan sit masləŋɗe na Zaŋ nek na: Mədoŋ mənah sən Zaŋ an kulaŋ an kəpprəmaŋ: Deŋgerɗe tahəŋ ulaŋ, vədelɗe tahəŋ wədawaŋ, məs kokoleɗ ambəlaŋka, goryomɗe tahəŋ wəpprəmaŋ, ɗii mimtit asilyoŋko, məs sahaŋɗe tamə məpel siti Wən Neneke.

²³Zəzay aza ko naway məs dəpan wətaf nan ɓa.

²⁴Adan mesliŋɗe na Zaŋ ambataŋ Zezu atəŋgək wəpel wənna Zaŋ sit ɗiiyi amna: Mi kəduwaŋ ula awra di? Ngav an səmnya adaɓlan sa? Awwo vaski ɓa.

²⁵Ya mi kəduwaŋ ula kan di? Ɗəf məgul lukutɗe moget sa? Məguloŋ lukutɗe mogeti, məs aryeɗi, ameŋgle net milyeŋge da adasoŋ.

²⁶Ya mi kəduwaŋ ula kandi? Məs kleŋ sa? Intatə nah sukum: Gesiŋ, aŋki dədayki məs kleŋ.

²⁷Vi Zaŋgi an məs ɗerewel apel akani: Maŋgəlva amna: Yaŋ əntatə slən masləŋ naw aboko, vi dəzaɓan gən tive viko.

²⁸Gesiŋ nədawnah sukum: Ɗəf tay məwan dayki Zaŋ də gakdak ɓa, amma ɗəffan muzliya adəv məlĩ na Maŋgəlva ndəni dədayki Zaŋ də gakdaka.

²⁹Ɗii dit duwanɗe pak apprəmənək na Maŋgəlva an təstəssi, atafnənka, Zaŋ aɗɗa sitik baptem.

³⁰Amma Farisiyenɗe* dit məsənaŋ zəga na ma henziŋ, dəŋgereŋ wətaf wəŋgla na Maŋgəlva ɓa, aɓoŋgoŋgək dawtaf baptem sə va Zaŋ.

³¹Yaŋ Zezu anah əmpa na: Dəmi nədawsla ɗiiyen kakaŋ kiŋ di? Va mədəŋga agilyoŋ di?

³²Agilyoŋguk va kirin məsoŋ aɗawrak na walaŋ gəla, tahəŋ wiyanən ziti, tahəŋ wənahaŋ na: Məfon sukumək gozloro, ya kəskəlaŋ ɓa. Məya sukumək gəlya naw həmma ya kəhəmmaŋ ɓa.

³³Vi Zaŋ məgəɗ baptem adeke awzəm zəga nawzəm maɓɓan ɓa, aw saa biya net wəleŋɗe ɓa, amma kəɓɗaŋ na mitemni.

³⁴Wətən Ɗəf* adeke, tay zəma, tay saa, kəɓɗaŋ na məza zəma, məza saa biya net wəleŋɗe, baynet duwanɗe dit ɗii ɗəɗerɗeyi.

³⁵Amma wəsən na Maŋgəlva arbanək zən mogon azet ɗii dətafnən pakə.

³⁶Yaŋ Farisiyen maɓɓan aya Zezu vi kawzəm dəni. Zezu ambatək eŋgil ana Farisiyenda naka, asanək kan kawzəma.

³⁷Guluk maɓɓat məs mambray tatə awalaŋ gəla nani. Adan təpprəm na Zezu tay zəm eŋgil ana Simoŋ Farisiyenda, təkiyək bəbər na tursan.

³⁸Təziwik dərɓaga Zezu amba təlni. Tatəhəma, ha təlɓanək təl Zezu dit sin nata, yaŋ təkəlɓit də muhur-kita, tətuwəɗək vat azani təgba sənək tursan azani.

³⁹Adan Farisiyen məs dəya Zezu awla vaska, aɗumuk amakrani: Va ɗəffəŋ məs kleŋgi, wasən kəta guluk məzaw rəŋgən kəŋkə də mambray tə.

⁴⁰Yaŋ Zezu atəŋ wəpele, apsən Simoŋ na: Wən tay nədaŋgla wənah suko. Simoŋ azlan sənək na: Apele mərbə zəga.

⁴¹Zezu amna: Ɗəf maɓɓan taysbet ɗii sula aka dəmən. Ɗəffan takaŋka suleyɗe na təbəs səkat sle. Ɗəf maɓɓan tam suleyɗe na təbəs kaklaw sle.

⁴²Yaŋ dəɓapən wəfaɗən ɓa, apan sitike, ndəɗaŋ sulagit pak na naway dəŋglu maɓɓan daydi?

⁴³Simoŋ amna nulak na ɗəffan dəppan nəŋki day. Zezu apsən na: Kəsənək goŋga nani.

⁴⁴Yaŋ Zezu akpaŋgan haran akat guluk nakə, apsən Simoŋ na: Kulətək guluk kəŋ sa? Nədek eŋgil anok da, kəvay iŋkile nawɗa tələw ɓa, amma nata təlɓanək də sin nata, təɗɗanək də muhur-kita.

⁴⁵Kəvoŋ gən kiyuk azaw ɓa, amma nata daga nəde anokda, təpan wəpayan tələw ɓa.

⁴⁶Kəpay sən mel na tursan sən kiyu ɓa, amma nata, təgba sənək tursan sən təlwa.

⁴⁷Vi vaski əntatə nah sukum: Wəŋgla natəŋ diiɗaŋka ndən dərban mambray nat diiɗayi ya avika. Amma məs məviyan suɗike, wəŋgla nan tam bo suɗike.

⁴⁸Yaŋ Zezu apsət guluk nak na: Mambrayɗe nok aviyaŋka.

⁴⁹Məzawzəmaŋ dəndən atəŋgaŋgək wəɗumoŋ amakreti. Aɓɗaŋ na: Naway aŋ məviyan mambrayəŋ di?

⁵⁰Amma Zezu apsət guluk nak na: Wətaf nok akoh gukuko, dok zamə.