Read Gidar Zaŋ 1 Bible Online

Zaŋ 1 - Gidar bible

Zaŋ 1

¹Səza wətəŋga, daga Maŋgəlva dəɓələɗɗa dələv tagay ɓa, tay məs adaw yaŋ na wəpele. Wəpel nan asanək də Maŋgəlva, ndəni Maŋgəlva.

²Asanək də Maŋgəlva daga wətəŋ nani.

³Maŋgəlva aɗɗak ko mi pak də wəpel nani. Zəga tay ko taka məɗɗan məza dəndən ɓaɓa.

⁴Səzani zeŋgille nawkoh ade, zeŋgille nawkoh nan tay ki sit təki babar sit ɗiiyi.

⁵Təki babar tay kasak ara guzliyo, amma guzli dəɓap wəsərətən ɓa.

⁶Maŋgəlva aslənək ɗəf məs iya nan na Zaŋ.

⁷Adek vi karban təki babar nak sit ɗiiyi, vi ɗii dətafnən gəni.

⁸Ndən sən kiyən təki babari ɓa, amma adek kaɗɗa saydawa aka təki babara.

⁹Wəpel naka ndəni təki babar an təstəssə adek adəv dəlva, tay kasak azet ɗii pakə.

¹⁰Wəpel nan taya dəv dəlva, Maŋgəlva aɗɗa dələv pak dəni, amma dələv dəsən ɓa.

¹¹Yaŋ ade aka dələv nani, amma ɗii nan dəŋgluwən ɓa.

¹²Amma ɗii meɓɓet aŋgluwənka, atafənka. Yaŋ net apsit sembe də kpaŋgaŋ gən kirtin Maŋgəlva.

¹³Dəkpaŋgaŋ də tive na nziya net ɓa, də uweti va ɗii adawaŋ ɓa, amma vi Maŋgəlva apsitik zeŋgille meleketeni.

¹⁴Wəpel nak akpaŋgək ɗəffa məs də gəɓa zəni, asanək awalaŋgəmə. Mulak gakdak nani, ndəni gakdak va Wətən məs taka arah aza Affəni. Dəndəni Maŋgəlva arban mbəlembəle nani də gegesiŋ nan pakə.

¹⁵Zaŋ apelik wənnani, anahək daya daya amna: Ndəni məs nəpel wənnani, nənah na: Wade dərɓagawa, amma waday kiyu də sembe, daga məɓəlli uwəw ɓa tay səkay.

¹⁶Mənam pak mərahək haran nam səzet aryeɗ nani, mərahək zəzay aka zəzaya.

¹⁷Maŋgəlva apsənək ma henziŋ ava Moyis, amma mbəlembəle nani də gegesiŋ nani arbanək də Zezu Krestu.

¹⁸Ɗəf tay dula ɗaah Maŋgəlva ɓa. Amma Wətən məs taka, an dəsan də Affən, ndəni dərban səm Maŋgəlva.

¹⁹Aŋki saydawa na Zaŋ dagan Yahudiyenɗe na Zerusalem asliŋgin məs dəlveŋge dit Lewiɗ azani, vi dəssohonən gəni: Nawa kənan di?

²⁰Dəɓoŋ dawzlan ɓa, arbanək lewlew abet ɗii pakə: Əntə Messiya* ɓa.

²¹Assohonənka: Ya nawa kənan kan di? Eliyas kənan sa? Zaŋ azlan na: Awwo, Eliyas nan ɓa. Aɓɗaŋ na: Əstə məs kleŋ məs mədawga tay sa? Amna: Awwo vaski ɓa.

²²Apsənən na: Ya nawa kənan kan di? Məmnda gan gən wəsləŋ sit ɗii də sləŋ məni. Ya ka nawa kəda ɗi zuk kandi?

²³Zaŋ azlan na: Əntə an məs kleŋ Ezay apel akani, amna: Vamvəl tayənzla awra tay nah na: Məgəɗsən tive metiŋ sarara sən Ɗəfdaya.

²⁴Suweleŋgit ɗii məsliŋgit aza Zaŋ neki, Farisiyenɗe* meɓɓet tahəŋ.

²⁵Assohonənka: Ya an Messiya kənan ɓa, walla məs kleŋ Eliyas, walla məs kleŋ maɓɓani ɓa, ya vi mi kədaɗɗa baptem di?

²⁶Zaŋ azlansitike: Intatə gəɗ sukum baptem də iŋkile, amma ɗəf maɓɓan tay awalaŋkum, kəsənən ɓa.

²⁷Wade dərɓagawa, amma nəgap nawpel helegeɗ net hensek nan ɓa.

²⁸Wənnəs pak awalaŋ gəla na Baytaniya agəɗə, dəgar ki məlpa na Zordan, atəki Zaŋ adawgəɗ sit baptem sit ɗiiyi.

²⁹Yaŋ vit pumpum nani, Zaŋ awlak Zezu dazan azani, amna: Andaki botol na Maŋgəlva naw gəm mambray na dəlva.

³⁰Ndəni ɗəf məs nədawpel sukum wənnani, nənah na: Ɗəf maɓɓan wade dərɓagawa, amma adayək kiyu də sembe, vi tay daga məɓəlli uwəw ɓa.

³¹Nəsəna naway dəl san vaskəŋdi ɓa, amma nədek wəɗɗa baptem viyit Israyelɗe dəsənən gəni.

³²Zaŋ anah əmpa na: Nulak Əmpəs na Maŋgəlva aprikik sə disiŋ va mukuɗuŋgulo, adek əsan akani.

³³Pay nani nəsən ɓa, amma Maŋgəlva məs də slənu wəɗɗa baptem ndəni dənah suwa, apsu na: Akula Əmpəs daw pirke, wasan aka ɗəffa, ndəni naɗɗa baptem də Əmpəs Salala*.

³⁴Zaŋ amna: Nulaka nəgəɗək saydawa akani, ndəni Wətən Maŋgəlva*.

³⁵Vit pumpum nani Zaŋ tay ziwe atəki naka dit gewleɗ nan sula neki.

³⁶Yaŋ awla Zezu dawtoŋgo, amna: Aŋki botol na Maŋgəlva.

³⁷Gewleɗ na Zaŋ sula nek apprəmənək məs anahə, asbanənək Zezu.

³⁸Zezu amanək haran dirɓe, tahəŋ wəsbanəni, assohotike: Məkədaw kaya nən di? Apsənən na: Mərbə zəga, aŋga kəsok di? Apsit na: Məde mula.

³⁹Yaŋ ambataŋ awlanənək aki adawsani. Dəpas tay va ler poɗo anziyaŋgək dəndən.

⁴⁰Ɗəf taka səmbet ɗii məzəpprəmən wəpel na Zaŋ, asbanək Zezu, ndəni Andre, məlmən Simoŋ Piyer.

⁴¹Andre aləmək də Simoŋ məlməni dabəŋ apsəna: Mərəhək Krestu.

⁴²Akak aza Zezu. Zezu awlaka, amna: Əstə Simoŋ wətən Zaŋ abesna iya nok wasan Kefas, va wənah na milɓe.

⁴³Vit pumpum nani, Zezu aŋgələk əmbat a Galile. Aləmək də Filip apsən na: Asbawa.

⁴⁴Filip bo sə Baytisayda ade, sə walaŋ gəla nani, ndəni gəm Andre də Piyer.

⁴⁵Filip bo aləmək də Nataniyel, apsən na: Mərəhək an məs Moyis apel akan adəv ɗerewel na ma henziŋ, məs kleŋɗe bo apelinək wənnani, ndəni Zezu wətən Zozef məs na Nazaret.

⁴⁶Nataniyel apsən na zəga mogon waɓap wəzzan sə Nazaret sa? Filip amna ade awla.

⁴⁷Adan Zezu awla Nataniyel dazan azani, apelik akani, amna aŋki Israyel məs tay də muluvuluvu azan ɓa.

⁴⁸Nataniyel assohonəka: Mbarmbar kəsənu di? Zezu azlan sənəka: Nulukuk daga kədawsok amba sukoyo, daga Filip dəɓəl əyuk tagay ɓa.

⁴⁹Yaŋ Nataniyel anah sən na: Mərbə zəga istə Wətən Maŋgəlva*, istə məlĩ net Israyelɗe.

⁵⁰Zezu apsən na! Kətaf na vi nənah na nulukuk amba sukoyo sa? Akula zigeɗ daykiyit zigeɗes də gugiriɗe.

⁵¹Apsən əmpa na: Gesiŋ nədaw nah suko, akulanən disiŋ məkolən, maslayɗe wapeŋgeŋ wapirkeŋ dəka Wətən Ɗəffa*.