Read Gidar Zaŋ 10 Bible Online

Zaŋ 10 - Gidar bible

Zaŋ 10

¹Yaŋ Zezu apelək wən məkpaŋga, amna: Gesiŋ nədawnah sukum: Ko naway dətoŋ agazlaŋ net timeŋgiɗ məza kla madamba ɓa, amma atoŋguk dəmba zlava atoŋguk agazlaŋ, ndəni mahala, məvoŋ tiveyi.

²Amma məs dətoŋ kla madamba, ndəni məzutaɗa net timeŋgiɗi.

³Məzutaɗa wakol sit madamba, timeŋgiɗ bo wapprəmən wəlani. Waye timeŋgiɗ nan pak də iya neti, vi kawket amawtaɗa.

⁴An agil gitik pak appaka, watoŋ abeti, timeŋgiɗ bo wasbanəni vi asəŋgənək wəlani.

⁵Amma asbanən na ɗəf məs də sənən ɓaɓa, wageslne'eŋ sənəni, vi dəsənən wəlan ɓa.

⁶Zezu apel sitik wən məkpaŋgaska, amma dəpprəmən na aka mi apel sit di ɓa.

⁷Zezu aməsək wənaha: Gesiŋ nədawnah sukum: Əntə madamba na gazlaŋ net timeŋgiɗi.

⁸Ɗii məs dəzoŋ dabəŋ kiyu pak məheleŋɗeŋgeŋ məvoŋgoŋ tiveŋ, amma timeŋgiɗ dəpprəmən wəlet ɓa.

⁹Əntə madamba, ko naway dətoŋ də ina wakohu. Warah wətoŋ də wəgilya, warah wəzəma.

¹⁰Məhala nan wəzzan na say kawhala, kawbay zəga kawray gəni. Naw nəde na vi ɗii dərəhaŋ gən zeŋgille məs nawrəh zit dəndən.

¹¹Əntə məzutaɗa mogoni. Məzutaɗa mogoni tayəpsən zeŋgillen sit timeŋgiɗ nani.

¹²Amma məzutaɗ vi arya, timeŋgiɗ nanəŋ ɓa, məzutaɗa mogoni ɓa. An awlak kəra muya tayə zani, wanzani, wapet timeŋgiɗi. Asna kəra muya wazla a aketi watray giti.

¹³Wanzani vi məzutaɗa nawrəh aryayi kaaka'ə, məssan dit timeŋgiɗ ɗaah di.

¹⁴Əntə məzutaɗa mogoni, nəsinik timeŋgiɗ nawa, timeŋgiɗ naw bo asənwənka. Va Affən asənwa, vaski bo nəsəna. Nəpsənək zeŋgillew vi timeŋgiɗ nawa.

¹⁶Timeŋgiɗ naw tahəŋ meɓɓeti, tahəŋ ara ngaɓa aŋ ɓa. Say nəkiyi gən enet əmpa, wapprəmən wəllawa, wakpaŋgaŋ ngaɓa taka, məzutaɗa taka.

¹⁷Affu aŋgələuwəka, vi nəpsənək zeŋgillewa vi kaw məssa wərahən meleketen əmpa.

¹⁸Ɗəf tay naw ɓap wəgəm zeŋgillew ɓa, əntə nədapsən də əŋgla nawa. Intat də sembe napsəni, əntat də sembe nawsil gən meleketeni. Aski an Affu aɗi su wənnan naɗɗa.

¹⁹Vi wənnəski Yahudiyenɗe agayaŋ awalaŋ ziti.

²⁰Ɗii diiɗa suweleŋgit aɓɗaŋ na: Mitemni, dərway, vi mi kədapprəmən man di?

²¹Ɗii meɓɓet aɓɗaŋ na: Ɗəf mitemin apel na vaŋ ɓa. Witem wa ɓap kawkol heret deŋgerɗe sa?

²²Yaŋ pay nani pay naɗɗa salala aza gəla metiŋ a Zerusalemmi, mawalayi.

²³Zezu abalək adəv gəla metiŋ naw zuliya* amba genzek na Salmoŋ.

²⁴Yahudiyenɗe akaraŋgək kini, apsənən na: Dewɗe kədaw boton səm gəkgrəŋ nam aka wən nok di? An əstə Messiya* na anah səm təstəs kpak ɗa.

²⁵Zezu azlansitike: Nənah sukumək daga farə, amma kətafwən ɓa. Wəzeɗe məs nəgəɗ də sembe na Affuwa, tayəɗɗaŋ saydawa akawa.

²⁶Amma kətafaŋ ɓa, vi munokum tat aret timeŋgiɗ naw ɓa.

²⁷Timeŋgiɗ naw tahəŋ wəpprəmən wəlawa, nəsinike tahəŋ wəsbawəni.

²⁸Intatəpsit zeŋgille məs nasa faɗə, amtaŋ na ɓa. Ɗəf tay nawtefit səvaw ɓa.

²⁹Affən məs dipsiwe adayək ki zəga pak də daya, ɗəf tay naw mohit səva Affən ɓa.

³⁰Ina gəm Affən taka mənanni.

³¹Yaŋ Yahudiyenɗe andenin kuneŋge əmpa vi kaskani.

³²Amma Zezu apsit na: Nəgəɗək wəzeɗe moget diiɗa abokum də sembe na Affuwa. Wəza awani kan səmbet kəŋglaŋ wəskuwən akan kan di?

³³Yahudiyenɗe azlanənka: Məŋgəl wəskuk vi wəzeɗe moget ɓa, amma vi kəpel mbrayen aka Maŋgəlva. Is ɗəffa, amma yaŋ kədaɗɗa zuk na va Maŋgəlva kənani.

³⁴Zezu azlansitike: Məverni adəv ma henziŋ nokum: Maŋgəlva amna: Munokum maŋgəlveɗi.

³⁵Məsənka an məverin kawzar gəni ɓa. Maŋgəlva ayek ɗii məpprəmaŋ wəpel nani maŋgəlveɗi.

³⁶Amma nawa, Maŋgəlva awelwəka, aslənwək a duniya. Mambray kədaw nahaŋ na əntatə pel mbrayen aka Maŋgəlva di, vi nənah na Wətən Maŋgəlva* nani sa?

³⁷Ya an məs nədaɗɗaŋ wəzeɗe na Affuwəŋ ɓa, asna kədawtafwən ɓa.

³⁸Amma an wəzeɗe na Affuwəŋ, gesiŋ, ko kətafwən anaw ɓa, mətaf wəzeɗe naw van dayday kana, vi kəsəŋgən gən na Affu taya dəffuwa, naw van bo əntat adəv Affəni!

³⁹Yaŋ akayaŋ tive narman əmpa, amma akohuk səveti.

⁴⁰Zezu ambatək dəgar ki məlpa na Zordan əmpa, atəki məs Zaŋ agəɗ baptem, asanək adaka.

⁴¹Ɗii diiɗa azoŋguk azani. Aɓɗaŋ na: Zaŋ dəgəɗ sokene ko taka ɓa, amma an apel aka ɗəffəŋ pak goŋgayi.

⁴²Ɗii nadak diiɗa atafənka.