Read Gidar Zaŋ 11 Bible Online

Zaŋ 11 - Gidar bible

Zaŋ 11

¹Ɗəf maɓɓan tay iya nan na Lazar gbəgba'yi. Ɗəf na Baytaniyayi, walaŋ gəla məs Mari dət Marta milmiŋgiɗin məgiliŋgit asoŋ.

²Mari ndətə məs təman tursan aka təl Ɗəfdaya, təɗɗan də muhur kita. Lazar məlmətti gbəba'a.

³Məlmiŋgiɗin məguliŋgit sula nek asləŋgaŋgək ɗəf aza Zezu, dənah sən gən na Ɗəfdaya baynok tay gbəgba'a.

⁴Adan Zezu apprəm labara nani, amna: Gbəgba na Lazar abay na ɓa, amma warban sembe na Maŋgəlva, də wərban gakdak na Wətən Maŋgəlva*.

⁵Zezu aŋglutək Marta dət Mari gəm Lazar.

⁶Adan apprəm na Lazar gbəgba'yi anziyək pay sula əmpa atəki məs asani.

⁷Yaŋ Zezu apsit gewleɗ nan na: Məmil səm aka dələv na Zude.

⁸Yaŋ gewleɗ nan azlan sənən na: Mərbə zəga məvoŋgi səza Yahudiyenɗe adaw koyokun naskuk də kuneŋge ɓa, yaŋ kədaŋgla wəmilya adaka?

⁹Zezu azlanka: Ler tay klaw kiyən sula adəv wəsɓəta ɓa sa? An dəf tay wədaw kapaya, aŋgbay na ɓa, vi tayula təki babar na duniya.

¹⁰Amma an ɗəf tay wədaw dəfɗa, waŋ gbayə vi təki babar taya zan ɓa.

¹¹Zezu apel sit wənəska yaŋ aməs wənah na: Baynam Lazar aleŋke, amma wanəmbat wəfɗaahanni.

¹²Gewleɗ azlanənək na: Ɗəfdaya an wəleŋgi na wafɗaahə.

¹³Zezu aŋgəl wənah sit kəta na Lazar amtaka, amma azet gewleɗ na aka wənnet sin adawpel gesiŋ.

¹⁴Zezu anah sitik kotak kana: Lazar amtəka.

¹⁵Amma vi wən nokum əntatə neken zuwa vi əntat adak ɓa, vi kətaf wən gəni. Asna, mədamsa zani.

¹⁶Tomas məs adawyaŋ na meseŋge apsit gewleɗ meɓɓet na: Nam van mədaməs adaka, məmtə gən də mərbə zəgaŋka.

¹⁷Adan Zezu agap a Baytaniya, arəhək Lazar məndəkni, agəɗək pay poɗo adəv magamasə.

¹⁸Baytaniya go'oy də Zerusalem, va kilometər hoku.

¹⁹Yahudiyenɗe azoŋguk diiɗa azat Marta dət Mari vi kaw ɓət git aka wənna məlmit dəmtəŋka.

²⁰Adan Marta təpprəm na Zezu adeke, təmbatək wələmsəni amma Mari təsatək eŋgili.

²¹Marta təpsən Zezu na: Ɗəfdaya va istataŋ na kəta məlmu wamtə kəta ɓa.

²²Amma nəsənəkana, ko kakaŋka, Maŋgəlva wapsuk məs kəssohon pakə.

²³Zezu apsət na: Məlmuk wasili kawsan madarani.

²⁴Marta təzlanəka: Nəsənka wasili, kawsan madarani pay wəsilya net ɗii mimtiti, pay wəgrak dəlva.

²⁵Zezu apsət na: Əntə wəsilya səka əmta, nawsil git ɗii məs dəmtaŋ dəsoŋ gən madereti. Ko naway dətafwa wasan madarani, ko an amtəka.

²⁶Ko naway məs madarani dətafwa amtə na ɓa. Kətafək sa?

²⁷Marta təzlanəka: Haa'aw nətafəka əstə Messiya*, Wətən Maŋgəlva, məs dəde a duniya.

²⁸Dərɓaga wənnəska, Marta təmilik azat məlməta Mari, tənah sətək Məɗama: Mərbə zəga adeke, tay yuko.

²⁹Adan Mari təpprəma təsilik go'u təmbatək aza Zezu.

³⁰Zezu dətoŋ awalaŋ gəla tagay ɓa, taya təki məs Marta təlləm dəndən naka.

³¹Yahudiyenɗe məs dəsoŋ eŋgil dət Mari vi kaw ɓət gəta awlətənək təsilik go'u, təgilik də kakara, asbatənka. Azet na amagamas tədadat vi kawhəm adaka.

³²Mari tədek atəki məs Zezu asani, tulaka, təskək morkoyo amba təlni, təpsən na: Ɗəfdaya, va istat aŋ na, məlmu amtə na kəta ɓa.

³³Zezu awlətək tatəhəma, Yahudiyenɗe məs dəzoŋ dəndət pak tahəŋ wəhəmaŋ. Asiripik zəni.

³⁴Assohotike: Aŋga kəndəkən di? Azlan sənənka: Ɗəfdaya, ade awla.

³⁵Zezu ahəmək dit sinni.

³⁶Yahudiyenɗe aɓɗaŋ na: Mula va aŋgluta.

³⁷Amma ɗii meɓɓet aɓɗaŋ na: Ndəni məs dəkol heret deŋgerɗe nak ɓa sa, aɓap na wəkoh gən Lazar səma əmta ɓa sa?

³⁸Zezu aməsək wəsirip əmpa, ambatək amagamasə. Bətəŋ na milɓeyi magamas vani.

³⁹Zezu amna: Məkol gərma. Marta akən məlməni təmna: Ɗəfdaya kakaŋkəs na wafoku, agəɗək pay poɗo adəv magamasə.

⁴⁰Zezu apsət na: Nənah suk ɓa sa an kətafək na, akula gakdak na Maŋgəlva ɓa sa?

⁴¹Akolənək gərəm naka. Zezu aslanək haran a disiŋ, amna: Affuwa, nəgəɗ sukuk soko vi kəpprəmək mawa.

⁴²Nəsənka istat əpprəm maw pay pakə, amma nənah vas na vi ɗii məs dəkaraŋ kiwiŋki vi dətafaŋ gən na is kəslənwa.

⁴³Adan apel wənəska, anahək də wəlan daya daya: Lazar agili.

⁴⁴Gəbay agilginik vani də tələn tay mətwəɗən də gabaga, haran pak mətərən də lukutu. Zezu apsit ɗii na: Məpparsəni, məppan dəllə.

⁴⁵Yahudiyenɗe diiɗa məs dəzoŋ azat Mari awlanən məs Zezu agəɗə, atafənka.

⁴⁶Amma ɗii meɓɓet səmbet ambataŋgək azet Farisiyenɗe*, anahsitinik an məs Zezu agəɗ pakə.

⁴⁷Farisiyenɗe dit dayeɗe net məs dəlveŋge aslerinik meti, aɓɗaŋ na: Mbar mədaɗɗa di? Vi ɗəffəŋ tayəɗɗa sokeneɗ diiɗa.

⁴⁸An məppanək tayəɗɗan vaska, ɗii pak watəfəni. Asna Romeɗe məs də sembe watoŋgoŋ wənnani, waray gənən gəla metiŋ naw zuliya* dit ɗii nan pak warayaŋ.

⁴⁹Ɗəf taka səmbeti məs iya nan na Kayafas, ndəni daya net məs dəlveŋge də wəsva nani, apsit na: Nokum kapprəmaŋ wən ko suɗike ɓa.

⁵⁰Kaw sənən na ɗəɗaah ɗəf taka dəmtə viyit ɗii pakə, ki ɗii pak wəzaŋ ɓa sa?

⁵¹Ɗəfəs dəpel wənəs də wəsən nan ɓa. Amma ndəni, daya net məs dəlveŋge də wəsva nani, agəɗək kleŋ: Zezu wamtə viyit ɗii net Yahudiyenɗe pakə.

⁵²Viyit ɗii netiŋki kaaka' ɓa, amma vi kaw sepet kirtin Maŋgəlva məs dətərayaŋ aka dələv pakə.

⁵³Daga pay dəpaski ɗii gugiriɗ net Yahudiyenɗe aslereŋ aka kuket nawbay Zezu.

⁵⁴Vi vaski Zezu dəbbal ɗaah aweleŋgit Yahudiyenɗe appaka ɓa. Ambatək atəki amaŋgava muya, na walaŋ gəla məs adawyaŋ na: Efrayim, adakki anzi dit gewleɗ nani.

⁵⁵Wəzləra net Yahudiyenɗe məs adawyaŋ na wəzləra na Paska* go'oy, ɗii na aka dələv temtem anzoŋguk a Zerusalem daga wəzləra dəbɓəl ɓa, vi kaw salalan ziti dəsoŋ gən məza də mambray ɓa.

⁵⁶Akayanənək Zezu pay nan adəv gəla metiŋ naw zuliya, assohonənək ziti: Mbar kəda ɗumonən di, wade awəzləra van sa? Wala ade na ɓa sa?

⁵⁷Ɗii gugiriɗ net məs dəlveŋge dit Farisiyenɗe aɗinenek wenani, an ɗef asənək ateki mes Zezu asani, say dənah sit gəni dərmanen gəni.