Read Gidar Zaŋ 12 Bible Online

Zaŋ 12 - Gidar bible

Zaŋ 12

¹Dəpas apələk pay slire naɗɗa wəzləra na Paska*. Zezu ambatək a Baytaniya awalaŋ gəla na Lazar məs Zezu asil gən sətəki əmta.

²Aɗɗaŋ sənənək zəga nawzəm adaka, daga Zezu adawzəm də Lazar may dit ɗii məyet meɓɓeti, Marta tatəpsit waya.

³Yaŋ Mari təgəm tursan an tuwãh diiɗa də dədak litər, məslahan də gaŋgəlya an mogoni: Təmanək aka təl Zezu, yaŋ təɗɗan də muhur kita. Gədəv gəla pak aknahək də məŋgənən.

⁴Zuda Iskariyot, məs naweleŋgit gewleɗ na Zezu, an məs nawzəm kiyən amna:

⁵Vi mi məvəlni tursannəŋ deleɗ na təbəs səkat hoku kapsit məs saheŋɗe ɓa di?

⁶Dənah vi ula saha aket məs saheŋɗe ɓa, amma vi məhalayi. Ndəni mərəm deleɗi, tayəhal deleɗ məs məzeɓet avani.

⁷Amma Zezu amna: Kədaɓlatən ɓa təɗɗak dabəŋ an məs adaɗɗaŋ daw ndəkwəni.

⁸Məs saheŋɗe wasoŋ də munokum ha faɗə, amma naw nəsaw na də munokum ha faɗ ɓa.

⁹Yahudiyenɗe diiɗa apprəmənək na Zezu taya Baytaniya. Ambataŋgək adaka, vi Zezuwi kaka ɓa, amma ambataŋ vi kawla Lazar məs Zezu asil gən sətəki əmta.

¹⁰Dayaɗe net məs dəlveŋge akayaŋgək tive vi kawbay Lazar tamə.

¹¹Vi wənani Yahudiyenɗe diiɗa apetinik dayaɗe net məs dəlveŋge, atafənək Zezu.

¹²Vit pumpum nani, ngaɓa net ɗii dədazoŋ wəzləra na Paska nak apprəmənən na Zezu wade a Zerusalem.

¹³Akzlohunək kiva wəlaŋga na dubunozi, adoŋguk wələmsəni, tahəŋ wənahaŋ də wəlet daya daya: Gakdak aza Maŋgəlva. Maŋgəlva dəɗɗa zəzay nan aka ɗəf məzəzan zan də iya na Ɗəfdaya! Maŋgəlva dəɗɗa zəzay nan aka məlĩ net Israyelɗe.

¹⁴Zezu arahək koro apaŋgək akani, va ɗerewel anahə:

¹⁵Geslne daduk ɓa walaŋ gəla metiŋ na Siyona. Awla məlĩ nok tayə zani, tay ka'a aka bəlata na koro.

¹⁶Pay nani gewleɗ nan dəsənən gaban tagay ɓa. Amma adan Zezu atoŋ adəv gakdak na Maŋgəlva, aɗumonənək wənnadəv ɗerewel annah akani, goŋga nan arbanək zən də wəzeɗe neti.

¹⁷Pay Zezu aya Lazar, agil gən sədəv magamasə, asil gən səkəti əmta, ɗii diiɗa tahəŋ adaka. Net bo anahsitinik ɗii meɓɓeti məs awlaŋgə.

¹⁸Vini ngaɓa net ɗii diiɗa azoŋ wəlmaŋ sənən Zezu, vi apprəmənək wənna sokene məs agəɗə.

¹⁹Yaŋ Farisiyenɗe*, anahaŋ awalaŋ zit na: An məs agəɗ pak dətər wəray ɓa, yaŋ ɗii pak atəŋgaŋ wəsbanəni.

²⁰Grekɗe meɓɓet tahəŋ aweleŋgit ɗii dədazoŋ a Zerusalem vi kawzuli sən Maŋgəlva pay nawzləra,

²¹azoŋguk aza Filip ɗəf nawalaŋ gəla na Baytisayda dələv na Galile, apsənən na: Ɗəffa abaah səmə, mammaka ula Zezu.

²²Filip ambatka, anah sənək Andre yaŋ sulegit pak anah sənən Zezu.

²³Zezu azlan sitik na: Pay agapək kakaŋka, ka gakdak na Wətən Ɗəf* darban gən zəni.

²⁴Gesiŋ nədawnah sukum: An zemve na alkamari məslgani ɓa, an dəmtə ɓa wasan katər gəni. Amma an amtəka, asna waɗi aran diiɗa.

²⁵Ko naway dəŋglu zeŋgilleni wazani. Amma ko naway dəzel zeŋgillen a duniyaŋka wakoh gən zeŋgillen ha faɗə.

²⁶Ko naway dəŋgəl wəgəɗ su wəza say dəsbawa, vi məza gəɗ su wəza, də san gən atəki məs nəsaw tamə. Ko naway dəgəɗ su wəza. Affu wa gakdakni.

²⁷Zezu amna: Kakaŋ na makraw atapawəka. Mi nədawnah di? Nənahsən Affu dəkohgu gən səma wəzəm saha an nadəv pay aŋkəŋ sa? Amma gesiŋ nəde na vi nəzəm gən saha adəv pay aŋki.

²⁸Affuwa aɗɗa ko mi vi gakdak na iya noko. Yaŋ wəpel ade sə disiŋ, amna: Nəgakdakanəka, wanəgakdakan əmpa bo.

²⁹Ɗiiyen nadak apprəmənək wəpel nani, aɓɗaŋ na: As buni. Ɗii meɓɓet aɓɗaŋ na: Maslay dədawpelsəni.

³⁰Amma Zezu apsit na: Wəpelis dəde viyu ɓa, amma vi kum ade.

³¹Kakaŋki də pay aŋki Maŋgəlva adawtaw kita aka duniya. Kakaŋ na karɓəhni məlĩ na duniyaŋka.

³²Naw an nəpeŋgək a disiŋ na, wanətiɗ ɗii naw pak azawa.

³³Də wəpeliski arban zev əmta məs adamta.

³⁴Ɗii apsənən na: Məpprəmək adəv ɗerewel na ma henziŋ namə, vasna Messiya* wasan ha faɗə. Ya mbari kədawnah na kaw slani Wətən Ɗəf* a disiŋ di? Naway Wətən Ɗəf van di?

³⁵Zezu azlansitike: Təki babar tay də munokum pay suɗike kaka tagay. Mədaw ara təki babar pay məs kəsoŋ də təki babarəŋka, vi guzli adawɗamokum ɓa, vi məzu daw ara guzli asəna təki adadan ɓa.

³⁶Vi vaski mətaf təki babar pay kərəhənni, vi kəsoŋ gən ɗii na təki babara. Dərɓaga Zezu apel wənnəska, ambatka aɗɗamək səma hereti.

³⁷Ko vi Zezu agəɗ sokeneɗ keret pakə dətafən Zezu ɓa.

³⁸Vi kleŋ na Ezay dəsan gən gesiŋ, amna: Ɗəfdaya naway dətaf wəpel nam di? Aza naway Ɗəfdaya arban sembe nan di?

³⁹Dəɓapaŋ wətəfən ɓa, vi Ezay anahək əmpa na:

⁴⁰Maŋgəlva atipik hereti, aynanənək makreti, vi heret adawla ɓa, makret bo adapprəman ɓa, adaw milyoŋ azan ɓa, vi adawmbəl git ɓa.

⁴¹Ezay amna: Vaski va awla gakdak na Zezu, akan apeli.

⁴²Ko aweleŋgit Yahudiyenɗe bo ɗii diiɗa atafənək Zezu. Amma dərbanən zit ɓa, vi geslne net Yahudiyenɗe, vi ada rohən met sədəv gəla na zuli net Yahudiyenɗe ɓa.

⁴³Aŋgluwinik ɗiiyi dayki wəŋgla na Maŋgəlva.

⁴⁴Yaŋ Zezu anah də wəlan dayadaya: Ko naway dətafuwa, anaw ataf kaaka ɓa, amma ana ɗəf məs də slənu atafe'e.

⁴⁵Ko naway duluwa awlak ɗəf məs də slənwa.

⁴⁶Nədek a duniya, əntə təki babar na duniya, vi ɗəf məs dətafu pak adawsan ara guzli ɓa.

⁴⁷An ɗəf apprəmək wəpel nawa, ya dəsban ɓa, əntə nawtaw kita akan ɓa, vi nawkoh gən duniya nəde, vi kawtaw kita kani ɓa.

⁴⁸Ko naway dəɓoŋ akawa, dəŋglu wənnaw ɓa, an məs nawtaw kita akan tay. Wən məs nədawpeliŋka, ndəni nawtaw kita akan pay wəgrak dəlva.

⁴⁹Vi nəpel də sembe naw ɓa, amma də sembe na Affən məs də slənwa, ndəni dəda ɗisu məs nədawpele də an məs nədarba.

⁵⁰Nəsənək məs aɗi suwa waki sukum zeŋgille məs nawsan ha faɗə. Tay məs nədapelsən kiyu ɓa, say an məs Affən aɗisu nawpel kaaka'ə.