Read Gidar Zaŋ 15 Bible Online

Zaŋ 15 - Gidar bible

Zaŋ 15

¹Zezu anahək əmpa: Əntə wəlaŋga məmpan na mbazla an də goŋga, Affuwi affən guliyo.

²Kivaw an məs awa ɓa, kaw bəlni. Amma ki vaw məzuwa, kaw zaɓani dəsan gən mogon dayki laŋka, də wə gən kirtin akani.

³Munokumtə məs məzoɓokum vi wənna wəbaah an məs nərban sukum.

⁴Məsoŋ adəv wəsler də ina, asna naw bo wanəsaw adəv wəsler də munokum. Kiva wəlaŋga na mbazla awə na kirtin ɓa say an asapək də wəlaŋga na mbazla. Vaski nokum bo, kətəraŋ na wəray ɓa, say an kəsapaŋgək də ina.

⁵Əntə wəlaŋga na mbazla, munokumtə ki vani. Ko naway dəsler də ina naw bo wənəsler dəndən, nan watər wəraya. Amma an kəslereŋ də in ɓa, kəɓapaŋ na wəɗɗa zəga ko gaban taka ɓa.

⁶Ɗəf məs dəsler də'in ɓa kasgani appaka va ki van məbələn, waŋkələ. Kivan an məkleketiŋ atəraŋ na wəray ɓa, kawlotti kawndol ti aka offo, wazlaŋ.

⁷An kəsuwaŋgək də wəsler də ina, wəpel naw bo wasan də munokum, asna an kəssohoŋgək an məs kaŋglaŋ pakə, wakərəhaŋ.

⁸An kətəraŋgək wəray diiɗa asna gewleɗ naw kənanaŋ gesiŋ. Vaski gakdak na Affu adarban zəni.

⁹Nəŋglukumək va Affu aŋgəluwa. Məsoŋ adəv əŋgla nawa.

¹⁰An munokum tatə ɓe'eŋ sənən wən an nədaw ɗiyəŋka, wakəsoŋ adəv əŋgla nawa, va naw nəɓesən dawka na Affuwa nəsawək adəv əŋgla nani.

¹¹Nənah sukum na vi wənek naw dəsan gən a mokrokum, wənek nokum tamə dəknah gəni.

¹²Aŋki wən an naw nəɗiyə, məŋglu zukum va nəŋgulukum.

¹³Wəŋgla aday na ki aŋ ɓa: Ɗəf kapsən zeŋgillen viyit bayneŋgiɗin.

¹⁴Bayneŋgiɗu kənanaŋ an kəɗɗanənək va dawka an nəɗi sukum.

¹⁵Nəyukum na məɗɗəŋ wəza nawa ɓa, vi məgəɗ wəza asən na an məs daya nan adaɗɗa ɓa. Wanəyukum na beyneŋgiɗwa, vi nərban sukumək an məs nəpprəm səza Affu pakə.

¹⁶Yaŋ na munokum kəwelwən ɓa, amma in nəwel kum. Nənah sukumək də kakara kədoŋ gəni. Kətəraŋ gən wəraya, wətər wəray nokum bo dəsan gən ha faɗə Affən wapsukum ko mi kəssohoŋ də iya nawa.

¹⁷Məŋglu zukum, ndəni kpak nəɗi sukum.

¹⁸An duniya azel kuməka, məsəna anaw atəŋ wəzel dabəŋ.

¹⁹Va ɗii na duniya kənanaŋ na, asna waŋglukum vi ɗii nan kənanaŋ. Amma nəyukuməka, məgil sədəv wənna duniya. Nokum ɗii na duniya kənanaŋ ɓa, vini duniya adawzel kum.

²⁰Məɗumon an məs nənah sukum: Məgəɗ wəza aday na ki daya nan də daya ɓa. Va azel wənni wazelkumənni. Va dəɓe'eŋ sənən wəpel naw ɓa, a ɓe'eŋ na sən wəpel nokum ɓa'a.

²¹Waɗɗaŋ sukumən vas pak vi wənnawa. Vi dəsənən ɗəf də slənu ɓa.

²²Va nəde ɓa tahəŋ də mambray ɓa, va nəpel sit ɓa, tahəŋ də mambray kəta ɓa. Amma kakaŋ na va awsəna asana vi mambray net ɓa.

²³Ko naway dəzelwa ana Affu azeli.

²⁴Va nəgəɗ wəza məs ɗəf dəɓap wəɗɗan ɗaah ɓaɓa, kəta mambray net awəl na ɓa. Amma kakaŋ na awlanənək wəza nawa, də as pak azel wənka, ina də Affuwa.

²⁵Agəɗ vas na vi an məverin adəv ɗerewel na ma henziŋ dəsan gən gesiŋ: Azel wənka məza nəgəɗ zəga ɓa.

²⁶Məzə baah sukum wade Əmpəs an də goŋgayi məs dəde səza Affən. Wanəslən azokum an nəmbatək aza Affuwa, wagəɗ saydawa akawa.

²⁷Nokum bo wakəɗɗaŋ saydawa akawa, vi kəsuwaŋgək də ina daga wətəŋ nani.