Read Gidar Zaŋ 18 Bible Online

Zaŋ 18 - Gidar bible

Zaŋ 18

¹Adan Zezu agrak wəzuliyəŋka, ambatək dit gewleɗ nan dəgar kiyit məlpaŋ na Kederon, wəleŋɗe tahəŋ məmpet adaka, Zezu atoŋguk adak dit gewleɗ nani.

²Zuda məs nawzəm kiyənəŋ asənək gəla təki nani, vi Zezu dit gewleɗ nan asərəkaŋgək wəmbat adaka.

³Zuda ambatək adivit wəleŋɗe veti dit sozeɗi dit məgaŋ gəla metiŋ naw zuliya*. Ɗii gugiriɗ net məs dəlveŋge dit Farisiyenɗe* dəslinini, tahəŋ də zəga naw gaya dit pitirileɗi də offo mətalən.

⁴Zezu asənək məs naw rəhən pakə. Vini alləm dənɗəŋ, assohotike: Nawa kədawkayanən di?

⁵Azlanənka Zezu na Nazaret mədawkayani. Zezu apsit na: Inyakəŋkə. Zuda məs dəzəm kiyən tay dənɗaŋ adak ziwe.

⁶Yaŋ Zezu amna: Əntə, adereŋgək dirɓe, asbəraŋgək afuŋgu.

⁷Zezu assohotik əmpa: Naway kədawkayanən di? Azlanənka: Zezu məs na Nazaret.

⁸Zezu amna: Nənah sukumuko, inyakəŋkə. An anaw kədakayawənna, məpet ɗiiyeŋ də mbataŋ.

⁹Agəɗ vasna vi wən məs məpelin dəsan gən gesiŋ: Aw Affən nəzan ko ɗəf taka suweleŋgit ɗii məs kəvayaŋ ɓa.

¹⁰Simoŋ Piyer tay də kafahi, aptuwəka, abələk gawla na daya net məs dəlveŋge, abələk sləman dəka van də zəŋ. Iya na gawla nan na Malkus.

¹¹Amma Zezu apsən Piyer na: Agul kafahi nok agəlani. Azok na nəsət na huloŋ na bonoy məs Affu avaykəŋ ɓa sa?

¹²Yaŋ sozeɗ də daya neti, gəm Yahudiyenɗe məzugaŋ dərmanən Zezu, aɓrukunko.

¹³Dabəŋ nani akanənək aba Annas, ndəni dəhən Kayafas, daya net məs dəlveŋge də wəsva nani.

¹⁴Kayafas vani anahsitik Yahudiyenɗe na: Ɗəɗaah ɗəf taka dəmtə viyit ɗii pakə.

¹⁵Simoŋ Piyer də gawla maɓɓani asbanənək Zezu. Gawla van daya net məs dəlveŋge asənəka, vini arah wətoŋ annanda pay mətoŋ gən Zezu eŋgil annanda.

¹⁶Amma Piyer tay ziwe appaka, ama meŋgle. Yaŋ gawla məs daya net məs dəlveŋge asən nak apsət guluk məzuga memeŋle na, atoŋ gən Piyer eŋgili.

¹⁷Guluk nak təpsən Piyer na: Nok gawla na ɗəffəŋ kənan ɓa sa? Azlanəka: Awwo.

¹⁸Gewleɗ dit məzugan armanənək offo, tahəŋ wəluwəni, vi səmnya tay. Piyer aziwik dənɗaŋ, tayə lu offo.

¹⁹Yaŋ daya net məs dəlveŋge assohon Zezu aka wənnet gewleɗ nani də wənna wərba nan məs adarbə sit ɗiiyi.

²⁰Zezu azlan sənəka: Intatə pel keret ɗii pakə. Intatə wərban wən adəv gəla metiŋ naw zuliya daga adəv gəla nawpel wənnet Yahudiyenɗe məs adakalaŋ adəvən pakə, nəpel wən məɗama ko suɗike ɓa.

²¹Vi mi kədassohu di? Assohet ɗii məs dədapprəmən an məs nədawpele, net asənənka.

²²Adan Zezu apel wənnəska, ɗəf taka səmbet məzugaŋ argaka, amna: Vas kədawzlansən daya net məs dəlveŋge sa?

²³Zezu azlan sənək na: An məs nənah na an gesiŋgi ɓa na, arban ɗa. Amma an gesiŋ nənahə ya vi mi kərgudi?

²⁴Amma Annas aslənək muɓrukun ana Kayafas da daya net məs dəlveŋge.

²⁵Pay nani Simoŋ Piyer taya dak ziwe, tayə lu offo. Ɗii nadak assohonənka: Nok ɗəf nambet gewleɗ na ɗəffəŋ kənan ɓa sa? Amma azelenik wənnani, amna: Awwo vaski ɓa.

²⁶Ɗəf səmbet gewleɗ na daya net məs dəlveŋge, məlmən ɗəf məs Piyer abəl sləman naka apsən na: Nuluk adivit wəleŋɗe dəndən ɓa sa?

²⁷Amma yaŋ Piyer azelen wənnan əmpa. Dəpas ki gəmnda ahəmə.

²⁸Vit pumpum nan də mompumo pumu agəmənək Zezu səŋgil ana Kayafas da, akanənək eŋgil ana ngomna net Romeɗ da. Yahudiyenɗe dətoŋgoŋ eŋgil adak ɓa, vi adasoŋ də mambray ɓa, ka arəhaŋ na wəzəm way na Paska* ɓa.

²⁹Vini ngomna, Pilatu asili, ade azeti, Assohotike: Aka mi kəwəliyən ɗəffəŋ di?

³⁰Azlanənka: Va ɗəf mbrayeni ɓana məkina zok ɓa.

³¹Pilatu apsit na: Məgəmma mətaw kita akan va ma henziŋ nokum. Yahudiyenɗe azlanənək na: Dəpsəm tive nawtaw kita namta aka ɗəf ɓa.

³²Agəɗ vas na vi an Zezu anah dəsan gən goŋga, darban wəmta nani.

³³Pilatu atoŋguk eŋgil annanda əmpa, ayak Zezu, assohonəka: Əstə məlĩ net Yahudiyenɗe sa?

³⁴Zezu azlanəka: Əstə kənahsən kiyuk sa, walla ɗii dənahaŋ sukuni?

³⁵Pilatu azlanəka: Yahudiyen nan sa? Əlfiŋgiɗuk dit dayaɗe net məs dəlveŋge dəwəlikun azawa. Mi kəgəɗ di?

³⁶Zezu azlanəka: Məlĩ naw dəde səka dələv ɓa. Va məlĩ naw səka dəlva fuŋgi, kəta gewleɗ naw wazoŋ wətaf wənni, səvet Yahudiyenɗe. Amma məlĩ naw dəde səka dələv ɓa.

³⁷Pilatu assohonəka: Amma də as pak məlĩ kanan sa? Zezu azlanəka: Vaski məlĩ nani. Məwəwi nəde adəv dəlvəŋka, vi kaɗɗa saydawa an də goŋga. Ko naway dəŋgəl goŋga, wapprəm an məs nədawpele.

³⁸Pilatu assohonəka: Mi goŋga di? Yaŋ Pilatu agil azet Yahudiyenɗe əmpa, apsit na: Nərah wən gala naw taw kita aka ɗəfəŋ ɓa.

³⁹Amma va an məs kəsərəkaŋ də wəzləra na Paska* pak wanəpel sukum ɗəf na daŋgay taka an məs kəŋglaŋ. Akəŋglaŋ nəppan sukumən gən məlĩ net Yahudiyenɗe sa?

⁴⁰Amma anzlaŋgək vamvəlla, aɓɗaŋ na: Awwo anan kədapa ɓa, mamaka kəppan səmə gən Barabbas. Barabbas van məvoŋ tiveyi.