Read Gidar Zaŋ 20 Bible Online

Zaŋ 20 - Gidar bible

Zaŋ 20

¹Yaŋ pay damasə, də mompumo pum, daga dəɓəl wəɗɗa pasyak ɓa, Mari sə Magədalla təmbatək amagamasə. Tulak gərəm məslaŋgan sə magamasə.

²Tənzatəka, təmbatək aza Simoŋ Piyer gəm aza gawla məs Zezu aŋgələ. Təpsit na: Agəmənək Ɗəfdaya sədəv magamasə, məsən təki məɗiyən ɓa.

³Piyer gəm gawla məs Ɗəfdaya aŋgələ, ambataŋgək amagəmasə.

⁴Ndəɗaŋ sula git pak anzoŋko, amma gawla aŋkəŋ adayək ki Piyer də wənzuwa, agapək amagamasə dabəŋ ki Piyer.

⁵Aɓe'ək amagamsə, awlak boɗoko də gabaga adaka, ɓosso, amma dətoŋ adak ɓa.

⁶Yaŋ Piyer agapə, atoŋ adəv magamasə, awlak boɗoko də gabaga adak ɓosso.

⁷Gabaga məs mətər ki Zezu dəndən dəsap də gabaga maɓɓan ɓa, amma tay məktəmən sekke atəki maɓɓani.

⁸Yaŋ gawla məs dənzan dəgap dabəŋ amagamas nak bo atoŋko. Awlaka atafəka.

⁹Ha gap pay nan pak dəpprəmanən məs ɗerewel anah ɓa. Vi ɗerewel anahək na Zezu wasil səkəti əmta.

¹⁰Yaŋ gewleɗ sula nek ambataŋ.

¹¹Yaŋ Mari təziw appaka gu'o də magamasə, tatə həmma. Təɓe'ək adəv magamasə.

¹²Tulek maslayɗe sula, aguloŋguk lukutɗe beberɗe tahəŋ tuŋtuŋ atəki məvoŋ gən gəbay na Zezu naka. Taka kəla za kini, taka kəla za təlni.

¹³Assohotənka: Gulku vimi kədawhəm di? Təzlan sitike: Agəmənək Ɗəfdaya nawa, nəsən təki aɗiyən ɓa.

¹⁴Daga adaw apel nən wənnəska, təkpaŋganək harat dərɓe, tulak Zezu tay ziwe, amma təsənna Zezuwi ɓa.

¹⁵Zezu assohotəka: Ɗakə, vi mi kədawhəm di? Naway kədaw kayan di? Azat Mari na affən guliyi. Təpsən na: An is kəgəm na, anah su təki kəka, nəmbat gən wəgəmən.

¹⁶Zezu apsət na: Mari, Mari təkpaŋgək azani, təpsən də ma Ibrahiŋkore na: Rabbuni. Va wənah na mərbə zəga.

¹⁷Zezu apsət na: Kədawrəŋgu ɓa, amma doku nah sit milmiŋgiɗu na, əntatə vi nəɓəl wəpeŋ aza Affu ɓa, Affukumi ya'a, aza Maŋgəlva nawa, Maŋgəlva nokumi ya'a.

¹⁸Yaŋ Mari na Magdala təmbatka. Təpsit gewleɗ na: Nulak Ɗəfdaya, yaŋ tənah sit an məs Zezu anah səta.

¹⁹Yaŋ pay Alat nani, adan dəfəɗ agəɗə, gewleɗ akkalaŋgək adəv gəla. Ampanənək metive, vi geslne sit Yahudiyenɗe. Zezu adeke, aziwik awaleŋgti, apsit na: Wasan sukum zam.

²⁰Dərɓagani anah sit wənnəska, arban sitik vani də təkzləmən. Adan gewleɗ, awlanən Ɗəfdaya, mekret annekək diiɗa.

²¹Zezu anah sitik əmpa: Zam wasan azokum. Va Affən aslənwa, naw bo wanaslənkum.

²²Yaŋ affu aketi amna: Mətaf Əmpəs Salala.

²³Ɗiiyen məs kəviyan sitin mambray neti warəhaŋ wəviyan mambray neti, ɗiiyen məs kəviyanən mambray net ɓa, arəhaŋ na wəviyan mambray net ɓa.

²⁴Adan Zezu ade azet gewleɗ nani, ɗəf taka səmbeti, ndəni Tomas məs adawyaŋ na meseŋge tay dənɗaŋ ɓa.

²⁵Apsənən na: Mulak Ɗəfdaya. Amma yaŋ Tomas azlansiti: An nula gəlet huweɗ net penteɗe naza vanəŋ ɓa, an nətaman də məttəl ɗəf ɓa, an nugul vaw ara huwa naka təkzləmən ɓa, nətaf na wənnan ɓa.

²⁶Lumu taka dərɓagani, gewleɗ akkalaŋgək adəv gəla əmpa. Tomas tay dənɗaŋ. Metive məmpani, amma Zezu adeke, azuwik aweleŋti, amna: Zam wasan azokum.

²⁷Yaŋ apsən Tomas na: Agul məttal ɗəf aŋkana. Awla huwa, aki voko, agul aka təkzləmuwa, apan wəbay ma atafə.

²⁸Tomas azlan sənəka: Ɗəfdaya nawa, Maŋgəlva nawa.

²⁹Zezu apsən na: Kakaŋ na vi kuluwa ndəni kətafu sa? Zəzay azet məs duluwənən ɓa, amma atafwənka.

³⁰Zezu agəɗək sokeneɗ meɓɓet diiɗa ama heret gewleɗ nani məvertiŋ adəv ɗereweləŋ ɓa.

³¹Amma an məverit adəv ɗerewel nani, məverit vi də tafən gən na Zezu wi Messiya* Wətən Maŋgəlva*, vi kərəhaŋ gən zeŋgille də wətaf nani.