Read Gidar Zaŋ 21 Bible Online

Zaŋ 21 - Gidar bible

Zaŋ 21

¹Dərɓagani Zezu arbanək zən azet gewleɗ nan a pe'e na Tiberiyas. Awla va arban zən azet kana.

²Simoŋ Piyer də Tomas məs adawyaŋ na meseŋge gəm Nataniyel məs nawalaŋ gəla na Kana dələv na Galile gəm kirtin Zebede dit gewleɗ na Zezu meɓɓet sula, asapaŋka.

³Simoŋ Piyer apsit na: Wanəmbat wərma kilfi. Aɓɗaŋ na nam bo waməmbat də isi. Ambataŋka, aguloŋguk adəv bəlay. Amma dəfəɗ nan pak dərəhaŋ kilif ɓa.

⁴Yaŋ təki biŋ biŋ ni, Zezu arbanək zən ama busgum, amma: Gewleɗ dəsənən na ndəni ɓa.

⁵Yaŋ Zezu assoheti: Gewleɗi kərəhaŋgək kilif vet sa? Azlan sənənka: Awwo, ko kəlfaŋkə.

⁶Apsit na məsgan zəva aka təkzləm bəlay dəka va dəzəŋ, wakərəhaŋ. Asganənək zəva, armaŋgək kilif diiɗa sawɓa ha dəɓapaŋ wəsgan zəva adəv bəlay ɓa.

⁷Gawla məs Zezu aŋgəl apsən Simoŋ Piyer na: Ɗəfdayayi. Adan Simoŋ Piyer apprəm vaska, aguluk lukut nani, vi agbukuk laŋka, azlahək aret iŋkile.

⁸Gewleɗ meɓɓet azoŋguk adəv belay, tahəŋ wəkdəhən zəva məs dəknah dit kilfneki, faraɗaŋ də ma busgum ɓa, tay va metər səkate.

⁹Yaŋ agulyoŋ appaka, yaŋ awlanən offo dit kilif akani gəm dupeŋɗe.

¹⁰Zezu apsit na: Məki kilif suɗike siret məs kərəmaŋ kakaŋkiŋki.

¹¹Simoŋ Piyer atoŋguk adəv bəlay, agil gənək zəva kilif gugiriɗ gugiriɗ diiɗa wəŋɗa net səkat də kaklaw sle kiyit hoku. Ko də diiɗa net pak zəva dəŋgar ɓa.

¹²Zezu apsit na: Məde məzəm waya. Ɗəf tay ko taka səmbet gewleɗ nan dəɓap wəssohon na: Nawa kənan di ɓa? Vi asənənək na Ɗəfdayayi.

¹³Zezu azarək azeti, agimik dupeŋɗe, apsitike dit kilif neki apsitike.

¹⁴Aŋki wərban zən azet gewleɗ nan ma hoko'ən dərɓaga asil səkəti əmta.

¹⁵Dərɓaga azəmaŋ, Zezu apsən Simoŋ Piyer na: Simoŋ wətən Zaŋ, kəŋgəluwək dayki eŋ sa? Azlanəka: Ɗəfdaya kəsənəka nəŋglukuko. Zezu apsən na say ateɗ kirtit timeŋgiɗ nawa.

¹⁶Yaŋ apelsən ma sula'ən, apsən na: Simoŋ wətən Zaŋ, kəŋgəluwək sa? Azlanəka: Kəsənəka nəŋglukuko. Zezu apsən na: Kula siw gən timeŋgiɗ nawa.

¹⁷Apel sənək mo hoko'ən əmpa, apsən na: Simoŋ wətən Zaŋ, kəŋgəluwək sa? Zə Piyer asiripke, vi Zezu assohon ma hoko'ən na: Kəŋgəluwək sa? Azlan sənək na: Ɗəfdaya kəsənək ko mi pakə, kəsənək bo nəŋglukuko. Zezu apsən na: Say ateɗ timeŋgiɗ nawa.

¹⁸Gesiŋ nedawnah suko: Daga kəsok wəman zuko is sən kiko istat winan dadakko, istatə mbat atəki kəŋgəl pakə. Amma an kəgalka, ɗəf dəda winan suk dadakko, də wərma voko wakuk atəki məs kəŋgəl ɓa.

¹⁹Wən aski Zezu aŋgəl karban zev əmta an Piyer adamta vi na gakdakan Maŋgəlva. Yaŋ Zezu apsən na asbawa.

²⁰Piyer akpaŋganək harani, awlak gawla məs Zezu aŋgəl tayəzan dərɓe, ndəni dəsan amaŋgava Zezu daga asan atəki wəzəma, anah nak na assohoni naka: Naway nawzəm kiyən di?

²¹Yaŋ Piyer awla, apsən Zezu na: Ɗəfdaya mbari na ɗəffaŋ di?

²²Zezu azlan sənəka: An nəŋgələk dəsan gən məza əmta ɓa ha pay nədaw milyo na, mi nok di? Nok na asbawa.

²³Wənan atrayək akawaleŋgit ɗii dətafaŋ, aɓɗaŋ na: Gawla nan amtə na ɓa. Amma Zezu denahsən Piyer na gawlaŋ amatə na ɓaɓa. Amma apsən na: An nəŋgələk dəsan gən adamta ɓa ha pay nədaw milyo na mi nok di?

²⁴Gawlaŋka ndəni dəgəɗ saydawa aka halabaraŋka, averike, məsənka məs aver bo gesiŋgi.

²⁵Zezu agəɗək wəzeɗe meɓɓet diiɗa. Va məverti taka taka pak na, duniya aɓapəna wərma ɗerewel nan ɓa.