Read Gidar Zaŋ 3 Bible Online

Zaŋ 3 - Gidar bible

Zaŋ 3

¹Ɗəf maɓɓan tay aweleŋgit Farisiyenɗe*, iya nan na Nikodemus Ɗəfdayayi aweleŋgit Yahudiyenɗe.

²Adek aza Zezu də dəfɗa, apsən na: Mərbə zəga, məsənka əstə mərbə zəga əstə ɗə an Maŋgəlva aslənə, vi ɗəf tay ko taka naɗɗa sokeneɗ va kədaɗɗetiŋ ɓa, say an Maŋgəlva tay dəni.

³Zezu azlan sənək na: Gesiŋ nədawnah suko: Ɗəf aɓapna ula məlĩ na Maŋgəlva ɓa, say an awək ma sula'ən.

⁴Nikodemus assohonəka: An ɗəf agalək na mbarmbari adawa əmpa di? Waɓap wəmndan adəvət man, kawan ma sula'ən sa?

⁵Zezu azlan sənəka: Gesiŋ nədawnah suko: An ɗəf duwə dit iŋkile gəm də Əmpəs ɓa, aɓap na wətoŋ məlĩ na Maŋgəlva ɓa.

⁶An muwan də ɗəffa ɗəffi, an muwan də Əmpəsa Əmpəsyi.

⁷Kəda gətta kan vi nənah suk na: Aslək kuwə gən ma sula'ən ɓa.

⁸Səmnya tay əɓla atəki məs aŋgəl pak istat əpprəm ɓaɓəlmani, amma kaw səŋgən na səŋga ade di ɓa walla aŋga dadandi ɓa. Vaski an muwan də sembe na Əmpəs adawsani.

⁹Nikodemus assohonəka: Kawrəhən mbarmbar kandi?

¹⁰Zezu azlan sənəka: Is mərbə zəga net Israyelɗe na kəsən ɓa sa?

¹¹Gesiŋ nədawnah suko nam mənam tatə pel an məsənə, mənam tatəɗɗa saydawa aka an muwəl də haramə amma də as pak kətafənən na saydawa nan ɓa.

¹²Kətafwən vi nədawpel sukum wənnet zigeɗ na duniya ɓa, mbari kədawtafən an nəpel sukumək wənnet zigeɗ na disiŋ di?

¹³Ɗəf tay dəmbat ɗaah a disiŋ ɓa bo, say an məs dəde sə disiŋ, ndəni Wətən Ɗəffa*.

¹⁴Va Moyis alaw doho na tabəs na meleŋge aka wəlaŋga awra, vaski adawlawən Wətən Ɗəffa.

¹⁵Asna ko naway dətafa nan warah wəkoh nassa ha faɗə.

¹⁶Maŋgəlva aŋgluwək duniya sawɓa. Vini apsən Wətən an taka nani. Ko naway dətaf Wətənəŋka, azə naɓa, amma warah wəkoh an nassa ha faɗə.

¹⁷Maŋgəlva də slən Wətən aka dələv vi kawtaw kita akan ɓa, amma vi duniya dərah gən wəkoh dəndən.

¹⁸Ko naway dətaf Wətən, kita arma na ɓa. Amma ɗəffan dətaf ɓa, kita warma vi dətaf Wətən Maŋgəlva* an taka nak ɓa.

¹⁹Awla va kita nan asani: Təki babar adek a duniya, amma ɗii na duniya aŋgluwənək guzli dayki təki babara, vi tahəŋ wəɗɗaŋ zəga məs tay mogon ɓa.

²⁰Ko naway tayəɗɗa zəga mogon ɓa tay zel təki babara, tay san ara guzliyo, geslne warma vi wəza nan mbrayenəŋ adawgilyan appaka ɓa.

²¹Amma ko naway dəsban goŋga, wambat aza təki babara, vi ɗii pak dulanən gəni tay ɓesən Maŋgəlva də wəza nani.

²²Yaŋ, dərɓagani Zezu ambat aka dələv na Zude. Anziyək dənɗaŋ suɗike, agəɗək baptem sit ɗiiyi.

²³Zaŋ bo agəɗ sitik baptem sit ɗiiyi a Aynon, walaŋ gəla nan tay faraɗa də Salim ɓa, vi iŋkile tahəŋ adak diiɗa. Ɗii tahəŋ wəmbataŋ azani, tay gəɗ sit baptem.

²⁴Dəpasna mərmani Zaŋ a daŋgay tagay ɓa.

²⁵Ɗii meɓɓet səmbet gewleɗ na Zaŋ atəŋgaŋgək wəbay ma dit Yahudiyenɗe aka wənnasban Maŋgəlva də wənna salalan zit dit zigeɗi.

²⁶Ambataŋgək aza Zaŋ, apsənən na: Mərbə zəga, istatə ɗumon ɗəf məs dəsan di'is dəgar ki məlpa na Zordan nak sa, məs kəpel səm wənnan nak sa? Nan bo tayɗ ɗa baptem sit ɗiiyi, ɗii diiɗa tahəŋ wəmbataŋ azani.

²⁷Zaŋ azlanəka: Ɗəf tay nawrəh ko mi ɓa say an Maŋgəlva dəpsəni.

²⁸Munokum sən kikum munokumtə saydawa nawa, nənah ka: Əntə sən kiyu Messiya* ɓa, amma məslənwi nəde gən dabəŋ kini.

²⁹Məzu ɓelta, ndəni zilta. Amma bayna məzu ɓel tay ziwe amaŋgavata, taypprəm wənna ni. An apprəmək wəlani waneken zəni. Vaski bo wənek naw adaknəh kakaŋka.

³⁰Say daya nan dəl abe abe, naw nəmil gən dirɓe.

³¹Ɗəf məs dəde sə disiŋ ndəni dayki zəga pakə. Ɗəf məs dəde sə duniya bo ɗəf na duniyayi, wənna duniya adawpele bo. Ɗəf məs dəde sə disiŋ ndəni dayki zəga pakə.

³²An məs awələ, an məs apprəmə, anani adawpele, amma ɗəf tay ko taka dətaf saydawa nan ɓa.

³³Ko naway dətaf saydawa nani asənək Maŋgəlva goŋga adawnaha.

³⁴Masləŋ na Maŋgəlva tay pel wənna, vi Maŋgəlva aknəhək də Əmpəs nani.

³⁵Affən aŋgluwək Wətəni, apsənək sembe aka zəga pakə.

³⁶Ko naway dətaf Wətəni arahək wəkoho. Ko naway dətaf Wətən ɓa, arah na wəkoh ɓa, amma wəda gədəv na Maŋgəlva wasan akani.