Read Gidar Zaŋ 4 Bible Online

Zaŋ 4 - Gidar bible

Zaŋ 4

¹Yaŋ Farisiyenɗe* apprəmən na Zezu tayəɗɗa baptem aket ɗiiyi, tay rəh gewleɗ dayki Zaŋ.

²Goŋga nan na, Zezu sən kiyən dəgəɗ baptem aka ɗəf ko taka ɓa, amma gewleɗ nan dədaɗɗanəni.

³Adan Zezu apprəm məs adawpeleŋ, asilik sə Zude amilik aka dələv na Galile.

⁴Vi wəmbat adak na say kawtoŋ kla ka dələv na Samariya.

⁵Agapək awalaŋ gəla məs adawyaŋ na Sikar, go'oy dəguli an Zakub apsən wətən an Zozef.

⁶Vov na iŋkile na Zakub taya daka. Zezu ayək dəwədaw malaka, vini asan ama vov nani. Dəpaska tətaŋ payi.

⁷Guluk na Samariya tədek wəmbaɗ iŋkile, Zezu amna: Avay iŋkile vet nəsə.

⁸(Gewleɗ nan ambataŋgək awalaŋ gəla vi kalbəh zəga nawzəma).

⁹Guluk tapsən Zezu na: Is ɗəf na Zude, kəssoh iŋkile naw saa, avaw in guluk na Samariya sa? Vi wəsler tay aweleŋgit ɗii na Zude dit ɗii na Samariya ɓa.

¹⁰Zezu apsit na: Va kəsənək wəvəl na Maŋgəlva, wakəvayə, va kəsənək naway dəssoh iŋkile naw saa vok di na, wakəssohoni, dəpsuk gən iŋkile an napsuk zeŋgille.

¹¹Guluk tapsən na Mərbə zəga, zəga naw mbaɗ iŋkile taya vok ɓa, vov bo kpumi diiɗa mbarmbari kədawrah iŋkile vet di?

¹²Dəhəm Zakub dəpsəm vov net iŋkileŋki, asaaŋgək iŋkileŋki, ndən dit kirtini dit zigeɗ mamayɗe nani. Asna kədayək ki Zakub də daya sa?

¹³Zezu azlan sətəka: Ko naway də sə iŋkile veti meme wadanənne'e.

¹⁴Amma ɗəf dəda saa iŋkile məs nədapsən niŋki meme adanən na ɗaah ɓa. Iŋkile məs nədapsənniŋki, wakpaŋgaŋ heret iŋkile adəvən, waymaŋ zeŋgille an nawsan ha faɗə.

¹⁵Guluk təpsən na: Avay su iŋkile veti, vi meme adaw duwən ɗaah əmpa ɓa, nəkoh gən səka wəmilya wəmbaɗ iŋkileŋki.

¹⁶Zezu apsət na: Dokuya zilko, kəzoŋ gən aŋka.

¹⁷Guluk təmna zilu tay ɓa. Zezu apsət na: Kəpelik goŋga, adan kənah na ziluk tay ɓaŋka.

¹⁸Vi kəgəmək zel sle, an məs kəsok amban kakaŋ bo ziluki ɓa. Kəpelik goŋga.

¹⁹Yaŋ guluk tapsən na: Mərbə zəga, nəpprəməka məs kleŋ kənani.

²⁰Dəhŋgiɗəm azuliyaŋ sənənək Maŋgəlva aka gərməŋka, amma munokum Yahudiyenɗe munokum tatə nah na Zerusalemmi təki na zuli sən Maŋgəlva.

²¹Zezu apsət na: Ɗakə, arma an məs nədawnah suko: Pay nan wade, an məs kədaw zuliyaŋ sənən Maŋgəlva aka gərməŋki ɓa, ko a Zerusalem mi ɓa'a.

²²Munokum Samariyeɗ munokum tatə zuli sən an məs kəsəŋgən ɓa, amma namə mənam Yahudiyenɗe məsənək məs mədawzulisəni, vi wəkoh səzet Yahudiyenɗe ade.

²³Amma pay nan wade, adek kakaŋ səkay, Əmpəs dərban gən goŋga na Maŋgəlva, waɓap wənah sit ɗii dəzuliyaŋ sənən gən Maŋgəlva ko aŋga pakə. Maŋgəlva Əmpəssi, ɗii dəŋglaŋ wəzuliyaŋ sənən na say dəsoŋ gən məwet də Əmpəs an gesiŋ. Zemvit məzu zuliyaŋ eskiŋ Maŋgəlva aŋgələ.

²⁴

²⁵Guluk təpsən na: Nəsənka Krestu wade. An adeke, warban zəga pakə.

²⁶Zezu azlanəka: Əntə nədawpel suk vanəŋka in vatə ndəni.

²⁷Pay nani gewleɗ amilyoŋko. Agətaŋgək sawɓa adan awlanən dawpel dət gulku. Mi kəŋgəl avan di? Amma ɗəf tay ko taka dəssohot vas ɓa. Vi mi kədawpel dəndət di? Ɗəf tay dəssohon Zezu vas ɓa'a.

²⁸Guluk təpanək hinzuw nat adaka, təmilik awalaŋ gəla, tənah sitik ɗiiyi, təmna:

²⁹Məde, mula ɗəf yana məs dənah su an məs nəgəɗ daga far pakə. Kuzuŋ ndəni Messiya*.

³⁰Ɗii agulyoŋguk suwalaŋ gəla, ambataŋgək aza Zezu.

³¹Pay nani gewleɗ na Zezu akamanənək dəzəm gəni, apsənən na: Mərbə zəga, azəm way suɗike.

³²Amma azlanək na: Way naw tay məs kəsəŋgən ɓa.

³³Gewleɗ assohonənək ziti: Ɗəf aki sənək way sa?

³⁴Zezu amna: Way naw ndəni wəɓesən ɗəf məs də slənwa də wəɗɗa an məs aɗi su naɗɗa.

³⁵Nokum munokum tatə nah na apələk təla poɗo kaw bəli, amma naw əntatə nahsukum, mula guliyeŋge law law ɗa, wəbəl aɓəlka, wəbəl go'oy.

³⁶Məzu bəl warah iya nani, wəkkalan hay na zeŋgille an nasa faɗə, vi məzəslga də məzu bəla pak wanekenən ziti.

³⁷Vi wən məkpaŋga anəhək goŋga: Ɗəf waslga, ɗəf maɓɓan wabələ, wən məkpaŋgaŋ goŋga anahə.

³⁸Nəslən kumək wəbəl aki məs kəɗɗaŋ wəza ɓa, ɗii meɓɓet dəɗɗanəni, nokum tamə watəraŋ wəray də wəza neti.

³⁹Samariyeɗ nawalaŋ gəla nan diiɗa atafənək Zezu. Vi guluk nak tənah sitik na: Anah suwək an məs nəgəɗ far far pakə.

⁴⁰Yaŋ azoŋ aza Zezu, akkamanənək dənzi gən dənɗaŋ. Zezu avoŋguk anet da pay sula.

⁴¹Ɗii diiɗa atafənək Zezu vi wəpel nani.

⁴²Apsətən guluk nak na: Kakaŋ mətafəka vi kənah səmi kaaka'a ɓa, vi mənam sən kiyim məpprəmək wəpel nani, məsənək kpakə, ndəni nawkoh git ɗii naka dəlva.

⁴³Yaŋ dərɓaga Zezu anzi adak pay sula, apetike ambatək aka dələv na Galile.

⁴⁴Zezu sən kiyən anahək na: Məs kleŋ arah na gakdak aka dələv nan ɓa.

⁴⁵Amma adan agap aka dələv na Galile, ɗii nadak atafənək mogoni, vi ambatək wəzləra na Paska* a Zerusalem, awlanənək məs agəɗ adəv wəzləra nan pakə.

⁴⁶Yaŋ Zezu amil awalaŋ gəla a Kana dələv na Galile, atəki akpaŋget iŋkile, akpaŋgaŋ mbazla net wələŋɗe. Ɗəf metiŋ na məlĩ taya daka, wətən tay gbəgba'a, tay məvoŋ gən a Kafarnahum.

⁴⁷Adan apprəm Zezu adek səka dələv na Zude, taya ka dələv na Galile, ambatək azani, akkamanəka: Dam matak a Kafarnahum, vi kəmbəl gən su wə gən wətu tay, gu'oy də əmta.

⁴⁸Zezu amna: Munokum kətaf wənna ɓa say an kulenənək sokeneɗi.

⁴⁹Ɗəf metiŋ apsən na: Mərbə zəga ade daga wətu dəɓəl wəmta tagay ɓa.

⁵⁰Zezu apsən na: Amndok eŋgil anok da, wətuk wambələ. Nan bo atafək məs Zezu anahsəni, ambatka.

⁵¹Daga taya ka tive tagay, ɗii nan almaŋgək dəndən, appsənən na: Wətuk ambəlka.

⁵²Assohotike: Pay mbarmbari agəɗ ɗəɗaah di? Azlanənək na: Nadəvɗaŋga də pay vuroku gamba apani.

⁵³Yaŋ affən aɗumonək na pay va Zezu anahsən nak na: Wətuk wambələ naki. Yaŋ ndəni dit ɗii naŋgil ananda pak atafənək Zezu.

⁵⁴Ndəni sokene an məs Zezu agəɗ ma sula'ən dərɓaga agil sə Zude, ambat a Galile.