Read Gidar Wəza net Masləŋɗe 1 Bible Online

Wəza net Masləŋɗe 1 - Gidar bible

Wəza net Masləŋɗe 1

¹Baynaw Tewfilu, adəv ɗerewel naw madabəŋ nəver sukuk wən an Zezu agəɗɗə gəm an arban daga ətəŋ nan pakə

²ha gap pay an ateŋ a disiŋ. Daga dəɓəl wəteŋ a disiŋ ɓa, asəɓ sitik masləŋɗe en məs awel də sembe na Əmpəs Salala*.

³Dərɓaga əmta nani arbanək zən azeti, də wərbansit təstəs na madarani, gap wəvoŋ kaklaw poɗo adarban zən azet də wəpel sit wənna məlĩ na Maŋgəlva.

⁴Pay akkal dənɗaŋ, anah sitik na adaw zaraŋ sə Zerusalem ɓa, amma dəganən gən an məs Affən anah na wapsiti, va anah sukum farə.

⁵Vi baptem na Zaŋ də iŋkileyi, amma nokum abe suɗike akərəhaŋ baptem də Əmpəs Salala.

⁶En məs dəkkalaŋ də Zezu atokonənka: Ɗəfdaya daski kədawzaɓan məlĩn net Israyelɗe sa?

⁷Zezu azlansitike, wən nokum taya za əsən uvoŋ nan də pay nan məs Affən aɗi də gakdak nan ɓa.

⁸Amma nokum akərəhaŋ sembe pay Əmpəs Salala adawpriken akokum, akəkpaŋgaŋ saydaweɗ naw a Zerusalem gəm a Zude a Samariya ha aket meŋge na dələv nan pakə.

⁹Adan anah sit vaska, apeŋke a disiŋ tahəŋ ulanənni slay buwən azanək sə ma hereti.

¹⁰Gala adawlaŋ kəla disiŋ dəkki məs Zezu apeŋgi ɗii sula aziweŋgik go'o dənɗaŋ.

¹¹Assohotinke: Munokum ɗii na Galile vimi kədawlaŋ a disiŋ di? Zezu məs dəteŋ a disiŋ sə walaŋkuməŋka, wamil va ateŋ a disiŋgəŋka.

¹²Yaŋ masləŋɗe amilyoŋ a Zerusalem səka massorgo an adawyaŋ na mosorgo na hereme gu'o də Zerusalem va kilometər taka.

¹³Adan agapaŋ a Zerusalem ateŋgeŋgək adəv gəla atəki adakkalaŋ ɗayɗay adəv gəla ma sula'ən a disiŋ. Piyer də Zaŋ, gəm Andre, gəm Filipi, gəm Tomas, gəm Bartolomi gəm Matiye, də Zak wətən Halfa, gəm Simoŋ məs dəŋglu dələv nani, gəm Zuda wətən Zak.

¹⁴Ndəɗaŋ pak asapanənək met taka aka wənnakkama, dit gil pak may Mari ma Zezu gəm milmiŋgiɗin Zezu.

¹⁵Daska Piyer asilik aweleŋgit milmiŋgiɗin ɗii məkkalit gap səkat də kaklaw sula neki, anahka:

¹⁶Munokum milmiŋgiɗwa, kətana, an məs Əmpəs Salala anah adəv ɗerewel dəsan gən gesiŋ, apel də ma Davit dabəŋ daga farə, aka Zudas məs dəzəm ki Zezu.

¹⁷Zudas ndəni ɗəf sə walaŋmə, arahək haran nan sədəv wəza namə.

¹⁸Zudas albəhək guli dit deleɗ en arah də wəza mambray nani, adaki əmta aslba, gədəvən aɓaka, herɗen agulyoŋguk appaka.

¹⁹Ɗii na Zerusalem pak apprəmənək wənnani, ndəni ayanən guli nan na: Akeldama də ma net na: Guli net mbeli.

²⁰Vi wənnan məverni adəv ɗerewel na Davit: Gəla nan dəsan ki məskiya, ɗəf adasan adak ɓa. Vaski wənnan məverin: Say ɗəf mbərən dəgəm wəza nani.

²¹Vi vaski say ɗəf mbərən də sap azam dəgəɗ gən saydawa na əsilya na Ɗəfdaya səka əmta. Ɗəf nan dəsan gən sə walaŋgit ɗii məzəbalaŋ də mənam gala Zezu adabal də mənam a təki pakə, təŋ səza arah baptem səva Zaŋ ha gap pay an Zezu apeŋ a disiŋ sə walaŋmə.

²³Yaŋ arbanən iya net ɗii sula: Zozef məs adawyaŋ na Barsabas məlvan na Zustus, gəm Matiyas.

²⁴Ndəɗaŋ pak akkamaŋgək vaŋka: Ɗəfdaya is məs kəsən mekret ɗii pakə, arban səmə naway kəwel suweleŋgit ɗii suleŋ di?

²⁵Nagəm wəza an məs Zudas apələŋka ambatək va an dəslə azani.

²⁶Yas kan aɗɗanən də kevile aza veti də wəbalan aket ɗii sula neki, abətək aka Matiyas atoŋguk aweleŋgit ɗii klaw kiyit sula ka masləŋɗe.