Read Gidar Wəza net Masləŋɗe 10 Bible Online

Wəza net Masləŋɗe 10 - Gidar bible

Wəza net Masləŋɗe 10

¹Ɗəf maɓɓan taya Kaysariya iya nan na Korneliyus, daya net sozeɗ meɓɓet na Roma məs adawyaŋ na ngaɓa na Italiya.

²Ɗəf dətaf Maŋgəlvayi, də gəla nan pakə, tahəŋ wəzuliyaŋ sənən Maŋgəlva pay pakə. Pay pak tayəbaah sit Yahudiyenɗe məs sahaŋɗe, apan wəzuli sən Maŋgəlva ɓa.

³Pay maɓɓani, dəpas pay vuroki, Maŋgəlva akisənək sokene ama harani, awlak maslay na Maŋgəlva adek azani, apsən na: Korneliyus!

⁴Awlak maslay də geslne, yaŋ assohon na: Aw mi dəgəɗ di Ɗəfdaya nawa? Maslay azlansənək na: Maŋgəlva apprəmək wəzuli noko, awlak wəza nokəŋ mogonəŋka, dəsgət kiyuk ɓa.

⁵Say aslin ɗii a Zoppe dəkayanən gən gəla na Simoŋ Piyer.

⁶Malakayi eŋgil ana Simoŋ məlmis gəba da, gəla nan amaŋgava məlpa metiŋgini.

⁷Yas kan maslay ambatə, yaŋ kan bo, Korneliyus aye ɗii sula səmbet məɗɗaŋ wəza nani, ɗii məs maɗuleti, gəm soze taka məzu geslne sən Maŋgəlva.

⁸Korneliyus aneh sitik an məs maslay anahsəni, yaŋ kan aslin a Zoppe.

⁹Vit pumpum nani, va pay ziwi, net bo gu'oŋ aza wəgapaŋ a Zoppe, Piyer apeŋgək aka balakə vi kawzuliya.

¹⁰May bo tay dani, manaka wəzəma. Amma adan adawdaŋ sənən way tagay. Maŋgəlva akisənək sokene ama harani.

¹¹Awlak disiŋ akolko, zəga va godo metiŋgin təkzləmən poɗo, aprikik afuŋ abani.

¹²Adəv zəga nak bo zəga mamaya məs tələn poɗo dit zigeɗ məkroketi dit biŋgeɗ pak tahəŋ adəvən.

¹³Yaŋ apprəm wəla ɗəffa, anahsən na: Piyer! Asil ataw wəlani kəzəm gəni.

¹⁴Amma Piyer amna: Awwo, aw Ɗəfdaya, nəzəm ɗaah zəga naw see'* nam ɓa walla zəga mbrayen ɓa.

¹⁵Wəla ɗəf nak apel sənək əmpa. Zəga məs Maŋgəlva azaɓan na kədawlan va zəga naw see ɓa.

¹⁶Zəga nan agəɗək vas təl hoku, dərɓagan na zəga nan amndanək a disiŋ.

¹⁷Piyer tay ɗumon an məs Maŋgəlva aŋgəl wənahsən də sokene nani. Das bo ndəni ləŋ masləŋɗe na Korneliyus ada sohonən gəla na Simoŋ, aziweŋgək ameŋgle.

¹⁸Aslanənək wəlet dayadaya assohoŋ na, malaka tayaŋ məs iya nan Simoŋ Piyer sa?

¹⁹Piyer tay ɗumon an məs Maŋgəlva arbansənəŋka. Yas ləŋ Əmpəs na Maŋgəlva anahsən na: Ɗii yeŋ hoku wəkayokuni.

²⁰Asili, apriki dok dənɗaŋ məza wəɗum akan ɓa, əntə nəsline.

²¹Yaŋ Piyer apriki, ambat azet ɗii neki. Inyakəŋkə, əntə ɗəf məs kədaw kayanən vani. Vimi kəzoŋ wəkayawən di?

²²Azlansənənək na: Korneliyus daya net sozeɗ də slənmə. Ɗəf mogoni, aw geslne sən Maŋgəlva. Yahudiyenɗe pak asənənka, maslay na Maŋgəlva apsən na: Dəyuk gəni eŋgil annanda, vi dəpprəm gən an kədawpele.

²³Piyer atefik eŋgili dəzəmaŋ gəni. Vit pumpum nani, asilke, ambatək dənɗaŋ. Ɗii na Maŋgəlva sə Zoppe ambataŋgək dənɗaŋ.

²⁴Huruɓ pumpum taka nani agapaŋgək a Kaysariya. Korneliyus ayek əlfiŋgiɗni dit bayneŋgiɗni məs təstəssə tahəŋ wəganən Piyer.

²⁵Adan Piyer agapə, Korneliyus adek wələm səni, akdukuk takpran abani azulisənəka.

²⁶Amma Piyer asil gənəka, apsən na: Aziwi naw bo ɗəf nani.

²⁷Piyer tay pelsən Korneliyus ha ndəɗɗaŋ toŋgoŋ eŋgili. Arihinik ɗii akkalaŋgək diiɗa annanda.

²⁸Piyer apsit na: Kəsənənka, wəsban ma henziŋ na Maŋgəlva net Yahudiyenɗe atakək ko naway səmbet dawmbat aza ɗəf məs dəsən Maŋgəlva ɓa ko wətoŋ eŋgil annanda. Amma Maŋgəlva arban suwək na nədawla ko naway mbrayen ɓa.

²⁹Vini nəde, wəpprəm iya məs kiyuwəni, nəssoh ko mi ɓa. Amma nəŋgəl nəsən gən an məs kiyuwən akani.

³⁰Korneliyus azlanəka: Agəɗək pay hoku, va pay asan avanəŋka, əntatə zuli ana moskoy eŋgil anaw da, dəpas nuwələk ɗəf də lukut məzu wiɗ abawa.

³¹Apsu na: Korneliyus, Maŋgəlva apprəmək wəzuli noko, dəsgət ki wəza mogon nok ɓa.

³²Asləŋ ɗəf a Zoppe aya Simoŋ məs adawyaŋ na Piyer. Malakayi eŋgil ana Simoŋ milmis gəba da, amaŋgava məlpa metiŋgin.

³³Vini nəslən wəyuk go'u, nok bo kəŋgerke, kədeke. Asna mənam pak məkkalək aba Maŋgəlva, vi kapprəm an məs Ɗəfdaya apsuk nawnah səmə.

³⁴Piyer atəŋgək wəpele, amna: Kakaŋ nəsənək kana, ɗii pak dakadaka həŋ aza Maŋgəlva.

³⁵An ɗəf ageslne sənəka, agəɗək wəza mogoni, Maŋgəlva waŋglu ko zemvit maay naway pakə.

³⁶Kəsəŋ gənək wən məs asləŋ sit ɗii na Israyel, arban sitik labara nenek ziti, va wənah na zam adek də Zezu Krestu Ɗəfdaya net ɗii pakə.

³⁷Kəsəŋgənək məs dəgəɗ a Zude pakə, atəŋ aka dələv na Galile, dərɓaga baptem məs Zaŋ məgəɗ baptem arban wənnani.

³⁸Kəsəŋgənək labara na Zezu na Nazaret, məs Maŋgəlva apsən sembe na Əmpəs Salala. Abalək ko aŋga wəɗɗa wəza mogoni, ambəl gitik ɗii məs Satan adawzəm git saha pakə, vi Maŋgəlva tay dəndən.

³⁹Mənamtə saydawa na an agəɗ aka dələv net Yahudiyenɗe də a Zerusalem pakə. Abayənək də wəkpa'ən aka wəlaŋga məzliwrihe.

⁴⁰Amma Maŋgəlva asil gənək sətəki əmta nan aka pay ma hoko'ən, arbanək zən azamə.

⁴¹Dərban azet ɗii pak ɓa, say azam kaaka'ə. Mənamtə saydaweɗ məs Maŋgəlva awel dabəŋ. Dərɓaga asil sətəki əmta, məzəmək dəndən də wəsaa zəga pakə.

⁴²Yaŋ Zezu anah səm na mepel gən labara nenek azet ɗii pakə, məpel gən saydawa nan na, ndeni Maŋgəlva aɗiyə nawtaw kita aket ɗii mimtiti dit madereti.

⁴³Məs kleŋɗe pak apelinik wənnani, aɓɗaŋ na: Ko naway dətafa, Maŋgəlva waviyan sən mambray nan vi iya nani.

⁴⁴Daga Piyer adawpel tagay, Əmpəs Salala aprikik aket ɗii məs dəpprəmən wəpeləŋ pakə.

⁴⁵Yahudiyenɗe məs dətafaŋ dəzoŋ də Piyer agətaŋka, aɓɗaŋ na: Mbaraka na ko ɗii məs Yahudiyenɗe həŋ ɓa bo Maŋgəlva apsitik Əmpəs Salala vanamə'a.

⁴⁶Vi appriminik dawpel də met ɗii meɓɓeti, tahəŋ wəɗinən ki gakdak na Maŋgəlva, Piyer amna:

⁴⁷Ɗii yeŋki, arəhaŋgək Əmpəs Salala vanam mərahə. Ya naway naw tekit dawrəh baptem di?

⁴⁸Apsitik tive məɗɗa siti baptem də iya na Zezu Krestu. Akkamanənka, dəsan gən dənɗaŋ gap wəvoŋ suɗike.