Read Gidar Wəza net Masləŋɗe 11 Bible Online

Wəza net Masləŋɗe 11 - Gidar bible

Wəza net Masləŋɗe 11

¹Masləŋɗe dit ɗii na Maŋgəlva naka dələv na Zude pak apprəmənək na ɗii məza Yahudiyenɗe həŋ ɓa atafənək Maŋgəlva.

²Yaŋ Piyer ambat a Zerusalem, Yahudiyenɗe məs ɗii na Maŋgəlva ahayyanənka, apsənən na:

³Kəmbatək anet ɗii da məs dəsklaŋ awra ɓa. Yaŋ bo ka kəzəm way dənɗaŋ.

⁴Amma yaŋ Piyer anah sit an dəgəɗ pakə, va gabban atəŋgə.

⁵Apsit na: Intatə zuli a Zoppe, Maŋgəlva arban suwək sokene, nəwələk zəga va godo wəpriken sə disiŋ metiŋgini, məziw gən aka təkzləmən poɗo, agapək ha azawa.

⁶Nulak gədəv zəga nan də maɗulawa, nuwələk zəga mamaya tələn poɗo də zəga nawra zəga məkrokoni dit biŋgeɗi pak tahəŋ adəvən.

⁷Yaŋ nəpprəm wəla ɗəf adawnah suwa: Piyer! Asili, ataw wəlani azəma!

⁸Amma yaŋ nənah na: Kay Ɗəfdaya zəga naw see'* naw də zəga mbrayen nəgul ɗaah amaw ɓa.

⁹Yaŋ wəla ɗəf nak aməs wənah su əmpa daga sə disiŋ: Zəga məs Maŋgəlva azaɓan salala, kədawlan va zəga naw see ɓa.

¹⁰Zəga nan agəɗək vas təl hoku, yas amil a disiŋ.

¹¹Dəpaska'e, yaŋ ɗii hoku azoŋ eŋgil atəki məs nəsawa. Ɗəf na Kaysariyayi də sliŋ azawa.

¹²Əmpəs apsu na say nəmbat dənɗaŋ go'u, nəda ɗum akan ɓa. Ɗii na Maŋgəlva slire sə Zoppe ambataŋgək də ina a Kaysariya, mənam pak məkkalək eŋgil ana Korneliyus da.

¹³Anah səmək va awla maslay eŋgil ananda, apsən na: Aslən ɗəf a Zoppe, dəya gən Simoŋ məs adawyaŋ na Piyer.

¹⁴Wanah suk wənna kohguko, də gəla nok pakə.

¹⁵Adan nətəŋ wəpele, Əmpəs Salala aprikik aket va aprik akam daga wətəŋ nani.

¹⁶Yaŋ kan nəɗumon an məs Ɗəfdaya anah na: Zaŋ məgəɗ baptem aɗɗak baptem dit iŋkile, amma nokum wakərəhaŋ baptem də Əmpəs Salala.

¹⁷Gesiŋ Maŋgəlva apsitik Əmpəs Salala va apsəmə, pay mətaf Ɗəfdaya nam Zezu Krestu. Ya askaana naw wanəɓap wətak Maŋgəlva kan sa?

¹⁸Adan apprəmən wənnani, aɓətaŋka agakdakanənək Maŋgəlva, aɓɗaŋ na: Mbaraka Maŋgəlva apsitik tive sit ɗii məza Yahudiyenɗe həŋ ɓa də tubiyaŋ gəni dərəhaŋ gən wəkoho!

¹⁹Ɗii na Maŋgəlva atrayaŋka, vi adawzəm gitin saha, pay məbay Etiyen. Ɗii meɓɓet ambataŋgək ha Finikiya də Kiprus gəm a Antakiya. Dəpeleŋ wənna Maŋgəlva sən ɗəf ɓa, say sit Yahudiyenɗe kaaka'ə.

²⁰Amma ɗii na Maŋgəlva məs sə Kiprus də Sirene, adoŋguk a Antakiya, arbanənək wənna Maŋgəlva sit ɗii məs Yahudiyenɗeŋ ɓa. Anahsitinik labara nenek na Ɗəfdaya Zezu Krestu.

²¹Sembe na Ɗəfdaya tay dənɗaŋ, ɗii diiɗa atafənək Ɗəfdaya tahəŋ wəsbanənni.

²²Yaŋ wənnan agap azet kretiyenɗe na Zerusalem, Aslənənək Barnabas a Antakiya.

²³Adan Barnabas agapə, awlak va Maŋgəlva agəɗ zəzay sit ɗii veti, zən anneke, yaŋ asəɓ sit na, say dəsənən Ɗəfdaya də goŋga də makret taka.

²⁴Barnabas vani ɗəf mogoni, aknahək də sembe də Əmpəs Salala gəm də wətafa. Ɗii diiɗa atafənək Ɗəfdaya.

²⁵Yaŋ Barnabas ambat a Tarsus wədaw kayan Sol.

²⁶Arəhəka, akiyək a Antakiya. Aɗɗaŋgək wəzva adak taka dit ɗii na Maŋgəlva arbansitinik zəga sit ɗii diiɗa. Antakiyayi ɗii na Maŋgəlva atəŋgaŋ wəyaŋ na kretiyenɗe.

²⁷Dəpaska məs kleŋɗe meɓɓet asilyoŋguk sə Zerusalem, adoŋguk a Antakiya.

²⁸Ɗəf taka səmbet məs adawyaŋ na Agabus, aziwik aweleŋgit ɗiiyi. Ɗə sembe na Əmpəs Salala, amna: May metiŋgin wagəɗə aka dələv pakə. (Agəɗək daga pay Kalawdiyus asan məlĩya.)

²⁹Gewleɗ aɗumoŋguk ko naway wəslən zəga va arah na baah sit ɗii na Maŋgəlva a Zude.

³⁰Aslənənək Barnabas də Sol də zəga məs akkalaŋ sit ɗii gugiriɗ na Maŋgəlva a Zuda.