Read Gidar Wəza net Masləŋɗe 12 Bible Online

Wəza net Masləŋɗe 12 - Gidar bible

Wəza net Masləŋɗe 12

¹Dəpaska məlĩ Herodə atəŋgək wəzəm git saha net ɗii meɓɓet aweleŋgit ɗii na Maŋgəlva.

²Abayək Zakub, məlmən Zaŋ də kafahi.

³Adan awla na lawi vas aret Yahudiyenɗe, armak Piyer asganək daŋgay. (Pay nan bo pay nawzləra net dupeŋɗe məza wuɗo ɓa yi.) Aɗiyək wənnan sit sozeɗ dəganən gəni. Sozeɗ vet bo muɗeketi gilet poɗo, gilet taka pak sozeɗ poɗo. Herodə aŋgəl na kawtaw kita akan abet ɗii pak dərɓaga wəzləra na Paska*.

⁵Sozeɗ bo tahəŋ wəganən vaska, amma ɗii na Maŋgəlva bo tahəŋ wəkkamanən Maŋgəlva aka wənnan zit soksoku.

⁶Dəfəɗ nadaŋ kan Herodə adawtaw kita akan kətaŋka, Piyer tay leŋ aweleŋgit sozeɗ sula, minani dit ngiyamɗe sula, sozeɗ məzu gaŋ madamba bo tahəŋ wəganəni. Vas bo pumpum nani adawgil gənən abet ɗiiyi.

⁷Yas ləŋ maslay na Maŋgəlva ade, təki babar akekeɓehik adəv gəla pakə. Maslay aɓlanək Piyer afɗaahanəka, apsən na: Asil gu'u! Vaski ləŋ ngiyamɗe apəlaŋ səza vani, abətaŋka.

⁸Yaŋ maslay apsən na: Aynan dadakoko, akpa hensek noko. Piyer aɗɗak vaska, yaŋ maslay anahsən na: Aklak godo noko, damsa.

⁹Piyer agilik ambani sədəv gəla na daŋgay. Amma dəsəna va gesiŋgi ɓa, azana wissineyi.

¹⁰Atoŋgoŋguk kiyit sozeɗ en dabəŋ, ndəɗaŋ əmpa toŋ kiyit sozeɗ masuleti, yas kan agapaŋ madamba na daŋgay məs haran ta' aka walaŋ gəla, madamba nan akoluksən kiyən. Agulyoŋko. Ambataŋgək klaka tive na walaŋ gəla, yas ləŋ maslay apan Piyer adaka.

¹¹Yaŋ Piyer atəŋ wəsən məs dəgəɗ azani, amna: Kakaŋ na nəsənka gesiŋgi! Mbarakana Ɗəfdaya aslənək maslay nan azawa kakoh gu səva Herodə, də məs Yahudiyenɗe aɗumoŋ naɗaŋ suwən pakə.

¹²Adan asən gabba məs dəgəɗə, ambatək eŋgil anat Mari da, ma Zaŋ Markus. Ɗii diiɗa tahəŋ wəkkalaŋ eŋgil anatda, tahəŋ wəzuliyaŋ adaka.

¹³Piyer argak madamba na memeŋle, yaŋ waŋ məs adawyaŋ na Rode, təmbat ədawlan na naway asvan di.

¹⁴Yaŋ təsən wəlani Piyer ri, zət neki sawɓa, amma təkolsən madamba ɓa, təmilik də wənzuwa azet ɗii məs dədasoŋ adak neki. Təmna: Piyer tay ziwe ameŋgle.

¹⁵Apsətən na: Dərwaŋ kənan sa? Amma təməsək wənah siti: Gesiŋ, ndəni kpakə. Yaŋ aɓɗaŋ na, an vaski na, maslay nani.

¹⁶Amma Piyer dəppan wərga madamba ɓa, adan akolən madamba, agətaŋgək sawɓa də ulani.

¹⁷Aslan sitik van ka dəɓətaŋ gəni, arban sitik va Ɗəfdaya agil gən sə daŋgay. Amna kənahsənən gən labara nan sən Zakuba dit ɗii meɓɓeti. Yaŋ ambat atəki maɓɓani.

¹⁸Adan təki adaŋgə, wənnan atapetik sozeɗ sawɓa. Aɓɗaŋ na: Piyer kpak na mbarmbar agəɗ di?

¹⁹Herodə aɗi sitik wənnan dəkayanən gəni, amma dərəhən ɓa. Vini akayan wənnan amet sozeɗi, aɗi wənnan kaw beyti. Dərɓagani Herodə asilik sə Zude, ambatək a Kaysariya, anziyək adaka.

²⁰Gədəv Herodə adək aket ɗii na Tirus dit ɗii na Sidon pak sawɓa. Akkalaŋ ka, azoŋguk azani, atəŋgaŋgək wəsler də Balastus gawla na məlĩ dabəŋ, dayayi eŋgil ana məlĩ da. Yaŋ ambataŋ aza Herodə assohonən kaw slire, vi ɗii net tahəŋ wəlbahaŋ hay aka dələv nani.

²¹Yaŋ payan məs Herodə aɗi agapka, aguluk lukut na məlĩ nani, asanək aka mazaŋga na məlĩ nani, apelsitike.

²²Ɗii aɗiyaŋgək geŋgere, aɓɗaŋ na: As ɗəf dəda pel ɓa, maŋgəlvayi.

²³Vaski ləŋ maslay na Ɗəfdaya arga vi də gakdakan Maŋgəlva ɓa, tentewilgeɗ azəmənka, amtəka.

²⁴Amma wənna Maŋgəlva tayənzləra abe abe.

²⁵Yaŋ Barnabas də Sol agrakən wəza net a Zerusalem, ambataŋgək də Zaŋ Markus a Antakiya.