Read Gidar Wəza net Masləŋɗe 13 Bible Online

Wəza net Masləŋɗe 13 - Gidar bible

Wəza net Masləŋɗe 13

¹Məs kleŋɗe dit mərbaŋ zəga tahəŋ aweleŋgit kretiyenɗe na Antakiya, Barnabas, gəm Simeyoŋ məs adawyaŋ na dəf titire, gəm Lukiyus dəf na Sirene, gəm Manahen məs dəɓayaŋ də məlĩ Herodə, gəm Sol.

²Pay maɓɓani, tahəŋ wəzuliyaŋ sənən Ɗəfdaya, tahəŋ wə see'eŋ meme, Əmpəs Salala* apsit na: Muwel su Barnabas də Sol vi wəza məs nəyesəni.

³Asee'eŋgək meme, azuliyaŋka, aɗiyənək vet aketi, asliŋninik aka wəza na Maŋgəlva.

⁴Vaski kan Əmpəs Salala aslən Barnabas də Sol. Ambataŋgək a Selewkiya sə daki aguloŋ adəv bəlay, ambataŋ aka mətuwəra a Kiprus.

⁵Yaŋ agapaŋ a Salamis, arbanənək wənna Maŋgəlva adəv gəla nawpel wənnet Yahudiyenɗe. Zaŋ Markus tay dənɗaŋ vi kabaah sit aka wəza nani.

⁶Agaraŋgək dəgar ki mətuwəra, agapaŋgək a Pafos, adaki arəhən ɗəf məgəɗ sokene iya nan na Bar-Zezu, Yahudiyenni, tay ɗi zən ka məs kleŋ, amma tepelke adawa.

⁷Bayna məlĩ na mətuwəra vani, iya nan na Sergiyus Pol, də maɗulani sawɓa. Məlĩ van ayak Barnabas də Sol ananda, vi manaka wəpprəm wənna Maŋgəlva sə meti.

⁸Amma ɗəf məs adawyaŋ Elimas də ma Grek na məgəɗ sokene, də nger də wənnet ɓa. Akayək tive kaw tak məlĩ, adawtaf wənna Maŋgəlva ɓa.

⁹Amma Sol (məs adawyaŋ na Pol bo,) aknahək də Əmpəs Salala, aziyək haran aka məgəɗ sokene naka.

¹⁰Apsən na: Wətən Satan! Is tatə ray gən zəga mogon pakə, kəppana wəkpaŋgan goŋga na Ɗəfdaya ka tepelke ɓa.

¹¹Kakaŋ na Ɗəfdaya wavərko, watippuk daŋgar kəwəl na təki ɓa ha wənziyə. Yas ləŋ zəga pak akpaŋgək titir aba Elimas, akpaŋgək daŋgar ayək ɗəffa dəkaysən gən ɗəf məs dədak dəhən.

¹²Adan məlĩ awla məs dəgəɗə, atafək wənna Maŋgəlva, agətək aka wərba na wənna Ɗəfdaya sawɓa.

¹³Pol dit ɗii məs dədasoŋ dəndən, atoŋgoŋgək adəv bəlay sə Pafos, ambataŋgək a Perge dələv na Pamfiliya. Amma Zaŋ Markus apetike, amilik dirɓe a Zerusalem.

¹⁴Net bo asilyeŋgik sə Perge, azoŋguk a Antakiya dələv na Pisidiya. Yaŋ pay naffet* na, atoŋgoŋ adəv gəla nawpel wənnet Yahudiyenɗe asuwaŋgək adaka.

¹⁵Ɗərɓaga məŋɗan ɗerewel nama henziŋ na Moyis, də ɗerewel net məs kleŋɗe, ɗii gugiriɗ nadəv gəla nawpel wən aslənaŋgək azet may Pol, aɓɗaŋ na: An munokum tat də wənnawpel sit ɗiiyi, məpele.

¹⁶Yaŋ Pol asil ziwi, aslanək van a disiŋ, atəŋgək wəpele amna: Milmiŋgiɗu Israyelɗe dit ɗii məza Yahudiyenɗeŋ ɓa məzuliyaŋ sənən Maŋgəlva, məpak sləmokum amba wənnəŋ ɗa.

¹⁷Maŋgəlva məs ɗii na Israyel adawzuliyaŋ sənəni awelik dəhiŋgiɗmə, aɓay gitik daga adasoŋ aka dələv na Misra. Maŋgəlva agil gitik sə Misra də sembe nani.

¹⁸Wəsva kaklaw poɗo tay ɓəs sit a muya.

¹⁹Azetik məlyeŋge buhul səka dələv na Kanana, apsitik dələv nan sit ɗii nani.

²⁰Dələv nan neti, as pak agəɗ na wasan va wəsva səkat poɗo də kaklaw sle. Dərɓagani apsitik mətawaŋ kita, daga pay məs kleŋ Samuyel.

²¹Yaŋ assohoŋ məlĩ ava Maŋgəlva, Maŋgəlva apsitik Sol wətən Kis, ɗəf səza ma əlfa na Benyamin, azəmək məlĩ aket wəsva kaklaw poɗo.

²²Yaŋ akdəh Sol səka məlya aɗi Davit agəlani. Maŋgəlva apelik aka Davit: Nərəhək Davit wətən Yessa an məs nəŋgələ, waɗɗa an məs nəŋgəl pakə.

²³Adəv ma əlfa na Davit bo, Maŋgəlva apsitik məzu koh git ɗii na Israyel, va wən minan nani, ndəni Zezu.

²⁴Daga Zezu dəɓəl wəzzan tagay ɓa, Zaŋ apel sitik wən sit ɗii na Israyel pakə, də tubiyaŋ gəni dəppanən gən mambray neti, dətafən gən baptem.

²⁵Daga Zaŋ asan gu'o də wəgrak wəza nani, apsit ɗii na: Ɗəf məs kədawgaŋgəŋ na əntə ɓa. Amma ɗəf maɓɓan tay dədazan dərɓagawa, naw nəgap ko naw pəl slapat net hensek nan ɓa.

²⁶Milmiŋgiɗu dəhiŋgiɗin Abraham, munokum məzu zuliyaŋ sənən Maŋgəlva, azami Maŋgəlva aslən labara nawkoh həŋka!

²⁷Amma ɗii na Zerusalem dit ɗii gugiriɗ net dəsənən na Zezuwi məzu koh git ɓa, vi dəsənən wəpel net məs kleŋɗe məs ɗii adaŋɗanən ɗayɗay adəv gəla nawpel wənnet Yahudiyenɗe pay naffet ɓa. Ndəni kan aknahanən wəpel net məs kleŋɗe də wətaw kita namta aka Zezu.

²⁸Ko dərəhaŋ wən gala nawtaw kita namta akan ɓa, akamanənək Pilatu dəbayə gəni.

²⁹Adan agrakən wəgəɗ sən an va ɗerewel na Maŋgəlva apel akan pakə, aprik gənənək səka wəlaŋga məzliwrihe, məndəkni.

³⁰Amma Maŋgəlva asil gənək sətəki əmta.

³¹Təl diiɗa adarban zən azet ɗii dəmbataŋ dəndən sə Galile a Zerusalem. Kakaŋ bo ndəɗaŋgəŋ saydaweɗ nan azet ɗii na Israyel.

³²Nam labara nenek mədawki sukum: Məs Maŋgəlva anah na waɗɗa sit dəhiŋgiɗmə,

³³aɗɗa səməka, mənam kirtiti, yaŋ asil gən Zezu sətəki əmta. Va məverin adəv gəlya na Davit ma sula'ən: Əstə Wətuwa, dəpaŋ nəwəko.

³⁴Apprəm an Maŋgəlva apel aka wəsil gən sətəki əmta, vi adaŋgəna ɗaah ɓa: Gesiŋ wanəgəɗ suk zəzay də zəzay nawa, va nənah sən Davitti.

³⁵Va anah atəki maɓɓan əmpa na: Kəppana gawla məzəpprəm mok dəŋgən gən ɓa.

³⁶Vi Davit agəɗək wəza sən Maŋgəlva pay adawsani, ha gap ndən zamə, məndək ni amaŋgevet dəhiŋgiɗin, aŋgənka.

³⁷Amma ɗəf məs Maŋgəlva asil gən sətəki əmta aŋgən na ɓa.

³⁸Milmiŋgiɗwa, munokum pakə, say məsən na wərban wənna Maŋgəlva, də wəviyan mambray ade sukumək də Zezu. Ma henziŋ na Moyis aɓapna wə kpaŋgokum salala aba Maŋgəlva ɓa, amma ko naway dətaf Zezu, nan amanək zən səza mambray pakə.

³⁹

⁴⁰Ya say məzi zukum, vi an məs kleŋɗe apeleŋ adawrəhkum ɓa.

⁴¹Mula munokum məzu zelin wənna Maŋgəlva. Məgətə haaya, wakəzaŋ. Vi wəza məs nəgəɗ pay nokuməŋka. Kətafənən ɓa, ko də ɗəf adawnah sukum wənnan zlaŋ.

⁴²Adan Pol də Barnabas adawgilyoŋ sədəv gəla naw pel wennet Yahudiyenɗe, ɗii apsitin na: Pay naffet* dirɓe na kəzoŋ gən əmpa, vi də məsaŋ gən wəpel wənnak əmpa.

⁴³Yaŋ ɗii atrayaŋ, Yahudiyenɗe diiɗa dit ɗii məs dətoŋgoŋ wənna wəsban Maŋgəlva net Yahudiyenɗe diiɗa, asbanənək Pol də Barnabas. Masləŋɗe apeleŋ sitinke, asɓetinik də soŋ gən də sembe adəv mbəlembəle na Maŋgəlva.

⁴⁴Adan pay naffet agəɗ əmpa, ɗii na walaŋ gəla vadaysa net azoŋguk wəpprəmən wənna Maŋgəlva.

⁴⁵Adan Yahudiyenɗe awlenin ɗii diiɗa, aɗɗaŋgək kotorok sawɓa. Azelenənək wəpel na Pol aranənka.

⁴⁶Amma Pol də Barnabas apeleŋgək məza də geslne ɓa, aɓɗaŋ na: Dewle say mərban sukum gən wənna Maŋgəlva dabəŋ. Ya amma yaŋ kəɓoŋgoŋgu, kədaɗumoŋ na wakərəhaŋ wəkoh nasuwa ha faɗə ɓa. Waməppokum, waməmbat azet ɗii məza Yahudiyenɗeŋ ɓa.

⁴⁷Ndəni məs Ɗəfdaya asil gəm də wənnani, amna: Nəɗikuk kəkasek gin ɗii məza Yahudiyenɗeŋ ɓa, kəsok gən tive nawkoh net ɗii namba dələv pakə.

⁴⁸Adan ɗii məs Yahudiyenɗeŋ ɓa, apprəmən wənnəska, anneken nək ziti, aɗiyənək ki wənna Ɗəfdaya, ɗii məs məwelit dəkohoŋ gəni, atafənək wənna Maŋgəlva.

⁴⁹Labara na Ɗəfdaya atrayək aka dələv nan pakə.

⁵⁰Amma Yahudiyenɗe asil gənənək makret ɗii gugiriɗ na walaŋ gəla, dit gil məs sədəv ma əlfa gakdaka, məs Yahudiyenɗeŋ ɓa, məzu zuliyaŋ sənən Maŋgəlva. Atəŋgaŋgək wəzəm gən saha na Pol də Barnabas, arɓehtinik səka dələv neti.

⁵¹Masləŋɗe atu'ənək hologodo naza tilit aket ɗii veti. Ambataŋgək a Ikoniya.

⁵²Gewleɗ na Antakiya annekenənək zit sawɓa, aknəhaŋgək də Əmpəs Salala.