Read Gidar Wəza net Masləŋɗe 14 Bible Online

Wəza net Masləŋɗe 14 - Gidar bible

Wəza net Masləŋɗe 14

¹A Ikoniya bo, Pol də Barnabas ambataŋgək adəv gəla nawpel wənnet Yahudiyenɗe. Wən məs arbaŋ atərək wəray sawɓa ha Yahudiyenɗe diiɗa dit ɗii məza Yahudiyenɗeŋ ɓa atafənək wənnani.

²Amma Yahudiyenɗe meɓɓet aɓoŋgoŋko dətafənən ɓa. Aɓoŋgitinik ɗii məza Yahudiyenɗeŋ ɓa, dəzelin gən ɗii məs dətafaŋ.

³Masləŋɗe avoŋgoŋguk adak sawɓa. Arbanənək wənna Ɗəfdaya məza də geslne ɓa. Ɗəfdaya bo arbanək na zəga məs adarbaŋgəŋ na gesiŋgi, də wəpsit mbəlembəle də sembe naɗɗa sokeneɗi.

⁴Ɗii na walaŋ gəla nan awɗakaŋgək sula aka wənnani, ɗii meɓɓeti asbetinik Yahudiyenɗe, ɗii meɓɓet tamə asbetinik masləŋɗe.

⁵Yaŋ ɗii məza Yahudiyenɗeŋ ɓa, dit ɗii gugiriɗe gəm Yahudiyenɗe vet kana pak aslerinik meti, vi kawzəm git saha net masləŋɗe də wəsket dit kuneŋge.

⁶Adan Pol də Barnabas apprəmən vaska, anzoŋko, ambataŋgək a Listira də Derbe, awalaŋ gəla naka dələv na Ikoniya də aka dələv tuwəɗ kini.

⁷Adak bo arbanək labara neneke.

⁸A Listira na ɗəf tayadak maŋgalɓaya daga muwani, dədaw ɗaah ɓa.

⁹Apprəmək wən məs Pol adarbani, Pol bo awlak na tay də wətaf na mbəla səka maŋgalɓaya nani. Vini Pol azi haran akani,

¹⁰aslanək wəlani, amna: Asili, aziwi. Ɗəf nak azlaka, atəŋgək wədawa.

¹¹Adan ɗii məs dəkalaŋ awlanən Pol agəɗ zəga vaska, agətaŋgək də wənzla vamvəlla də ma naka dələv neti, Likoniyeɗi, aɓɗaŋ na: Maŋgəlveɗ en məs mədasba nek agilyeŋgik va ɗiiyi aprikeŋgik azamə.

¹²Yaŋ ayanən Barnabas na Zewus. Pol bo Hermes, vi ndəni dədawpele.

¹³Məs dələv* na maŋgəlva Zewus akiyək wasliɗe məs məbeysit gawla də wəffiyeɗ ameŋgle na gəla nasban Maŋgəlva net naka, məs arkaŋ ama poho, məs dələv vani dit ɗii pak aŋglaŋ wətaw wəla wasli kaɗɗa sazlaga sən Barnabas də Pol.

¹⁴Adan Barnabas də Pol apprəmən an məs adaŋglaŋ wəgəɗsiti, aŋgarənək lukutɗe neti, anzuwaŋgək suweleŋti ambataŋgək vandaka, aslanənək wəleti, apsitin na:

¹⁵Bayneŋgəɗmə mədəray kədaɗɗaŋ vaŋ di? Nam bo ɗii mənan va munokum! Nam məde ahəŋ na, vi kawnah sukum labara neneki, vi kəppanən gən matuya an ɗar mekeleŋgəŋka, kətafən gən Maŋgəlva məs də zeŋgille. Ndəni dəzəməɗ disiŋ də dəlva fuŋ dit məlpeŋge, də zəga nadəvən pakə.

¹⁶Daga laŋka apetik ɗii pak dəsbanən gən tive neti.

¹⁷Ko azokum bo, tayərban wəza mogon nani. Tay ziy sukum buwən daga sə disiŋ, zəga tay gəɗ sukum mogon aza dabya nan pakə. Tay zəm gukum, tay neken sukum zukum də makrokum pakə.

¹⁸Amma ko də may Pol apeleŋ vas zlaŋ, saha saha atakən kiyit ɗii daw giɗ sit sazlaga.

¹⁹Yahudiyenɗe meɓɓet azoŋguk sə Antakiya dələv na Pisidiya, daga sə Ikoniya. Aɓoŋgitinik ɗii meɓɓeti, ha askanənək Pol dit kuneŋge, akdəhənək amapoho, azet na amtəka.

²⁰Amma adan ɗii na Maŋgəlva akkalaŋ akani, asilke, amilik awalaŋ gəla. Vit pumpum nani, ambatək də Barnabas a Derbe.

²¹Pol də Barnabas arbanənək labara nenek a Derbe ha ɗii diiɗa atafənək wəsban Zezu. Yaŋ amilyoŋ a Listira a Ikoniya də Antakiya dələv na Pisidiya.

²²Asɓetinik ɗii məs dətafən Zezu, asəɓaŋsitinke dəsbanən gən wətaf də makret taka. Yaŋ anah sitin na: Say də tattuwãh mədawtoŋ məlĩ na Maŋgəlva.

²³Atəki məs gəla na zuli asan pak aɗiyaŋgək ɗii gugiriɗ net kretiyenɗe. Azuliyaŋka, asee'eŋgək meme, apetinik ava Ɗəfdaya an məs asənaŋ.

²⁴Yaŋ atoŋgoŋ klaka dələv na Pisidiya adoŋ a Pamfiliya.

²⁵Arbanənək labara nenek a Perge yas kan ambataŋ a Attaliya.

²⁶Sədaki aguloŋ adəv bəlay, amilyoŋ a Antakiya, awalaŋ gəla məs apanən mbəlembəle na Maŋgəlva vi wəza məs aɗɗaŋgəŋka.

²⁷Adan agapaŋ a Antakiya, akkeletinik kretiyenɗe pakə, anahsitinik an Maŋgəlva agəɗ dənɗaŋ pakə, va akol tive sit ɗii məs Yahudiyenɗeŋ ɓa, dətafən gən Zezu.

²⁸Avoŋgoŋguk adak diiɗa dit ɗii na Maŋgəlva.