Read Gidar Wəza net Masləŋɗe 15 Bible Online

Wəza net Masləŋɗe 15 - Gidar bible

Wəza net Masləŋɗe 15

¹Ɗii meɓɓet sə Zude, azoŋguk a Antakiya, atəŋgaŋgək wərban sitin zəga, apsitin na: Kəkohoŋ na ɓa, say an kədoŋguk wəskəl awra, va ma henziŋ na Moyis anahə.

²Pol də Barnabas abayaŋgək ma dənɗaŋ diiɗa aka wənnəs sawɓa. Vini aslereŋ də Pol gəm Barnabas dit ɗii na Antakiya meɓɓeti, dəmbataŋ gən a Zerusalem wədawtawan wənnan dit masləŋɗe gəm ɗii gugiriɗ net Kretiyenɗe.

³Ndəni kan ɗii na Maŋgəlva aslinin adaka, daga adawtoŋgoŋ kla Finikiya də Samariya, anahsitinik Yahudiyenɗe məs dətafaŋ wənnet ɗii məs Yahudiyenɗeŋ ɓa atafənək Maŋgəlva, wənnan anekək zit sawɓa.

⁴Adan agapaŋ a Zerusalem, ɗii məs dətafaŋ dit masləŋɗe gəm ɗii gugiriɗ net kretiyenɗe atefinik anetda, anahsitinik va Maŋgəlva agəɗ sit pakə.

⁵Amma ɗii məs aweleŋgit Farisiyenɗe* laŋka məs dətafaŋ kana, asilyoŋko aɓɗaŋ na: Say dəsbanən wənna əskəl awra, də ma henziŋ na Moyis pakə.

⁶Masləŋɗe dit ɗii gugiriɗ net kretiyenɗe, akkalaŋka kawla wənnani.

⁷Adan anziyaŋ aka wəpelən wənnani, Piyer asilke, amna: Milmiŋgiɗwa kəsənənka daga farfarə Maŋgəlva awelwəka, nərban gən labara nenek azet ɗii məza Yahudiyenɗeŋ ɓa, dəpprəmən gəni, dətafən gəni.

⁸Maŋgəlva məs dəsən makret ɗii pakə. Arbanək na atafək wəpsit Əmpəs Salala sit ɗii məza Yahudiyenɗeŋ ɓa, va apsəmə.

⁹Duɗakan walaŋgəm dənɗaŋ ɓa, atafənka aviyan sitik mambray neti.

¹⁰Vini kana, kami mədaŋgla wərakan Maŋgəlva də wəɗi sit zəga nawsla an tuwãh diiɗa di? An ko mənamə ko dəhiŋgiɗmə kaw ɓapi wəslan ɓa.

¹¹Va mətafa, waməkoh də mbəlembəle na Ɗəfdaya nam Zezu, net bo vaski adawkohoŋ.

¹²Ɗii pak asoŋguk sləɓəkə, apprəmənək an Barnabas də Pol adawpel sitin aka wənna sokeneɗ məs Maŋgəlva agəɗ dənɗaŋ aweleŋgit ɗii məza Yahudiyenɗeŋ ɓa.

¹³Adan agrakən wəpel neti, Zakuba asilke, amna: Məpak sləmokum ɗa milmiŋgiɗwa!

¹⁴Kakaŋ na kəpprəmənək va Simoŋ anah sukum, va Maŋgəlva atəŋ wəɗum aket ɗii məza Yahudiyenɗeŋ ɓa, yaŋ awel ɗii meɓɓet suweleŋgit dəsoŋ gən ɗii nani.

¹⁵Wəpel net məs kleŋɗe aslək də wənnəska, va məverin na:

¹⁶Ɗəfdaya amna: Dərɓagan na, wanəmili wanərka gəla na Davit məs dəɓəslə, wanəziw gəni.

¹⁷Vi ɗii meɓɓet dəkayanən gən Ɗəfdaya, vi ɗii pak məs nəyə dəsoŋ gən ɗii nawa.

¹⁸Vaski Ɗəfdaya anahə, məs dərban zəga pak daga far laŋka.

¹⁹Zakuba aməsək wənaha, amna: Naw nənah na, məzleɓet ɗii məs Yahudiyenɗeŋ ɓaŋ ɓa, dakpaŋ aza Maŋgəlva ɓa.

²⁰Ɗəɗaah məver səm sit na: Adawzəmaŋ slu mətaw wəlan ama tuya ɓa, adaɗɗaŋ mana'a ɓa, adawzəmaŋ zəga məs mərrəsl wəlan dərrəsl ɓa, adaw zəmaŋ mbel ɓa.

²¹Vi daga laŋka, ɗii tahəŋ wəŋɗanən ma henziŋ na Moyis adəv gəla nawpel wənnet Yahudiyenɗe taka taka pak pay naffete*, apelinik wənnan adəv ma henziŋ na Moyis sit ɗiiyi.

²²Yaskan masləŋɗe dit ɗii gugiriɗ net kretiyenɗe, aslereŋ aweleŋ ɗii sə waleŋti, vi kaw slinit a Antakiya də Pol gəm Barnabas. Awelinik Zuda məs adawyaŋ na Barsabas, gəm Silas. Ndəɗaŋ sula pak ɗii təstəssəŋ azet Kretiyenɗe.

²³Asliŋninik də ɗerewel nani: Mənam masləŋɗe dit ɗii gugiriɗ net kretiyenɗe, milmiŋgiɗkum, məslənək wəsɗa nam azet milmiŋgiɗəm məza Yahudiyenɗeŋ ɓa, məs dədasoŋ a Antakiya də Siriya gəm Silikiya.

²⁴Məpprəmək na, ɗii sə walaŋgəm aduwaŋgək anokumda, aɓlokumənka, afayokumənək də wəpel neti, ya amma mənamtə məsliŋ ɓa.

²⁵Vini məkkalə, məsler aka uwel ɗii na sləna, kaw slinit azokum, də mbataŋ gən də Barnabas gəm Pol ndəɗaŋgəŋ ɗii məs məŋgələ.

²⁶Ndəɗaŋgəŋ məs dəzaɓanən zit napan zeŋgillet vi iya na Ɗəfdaya nam Zezu Krestu.

²⁷Ndəni bo məsləŋ Zuda də Silas. Net bo wanah sukumən an məs məver sukum.

²⁸Əmpəs Salala, də mənam pak məɗumək na mədawɗi sukum zəga dayki wən məs mənah sukum əmpa ɓa.

²⁹Kədawzəmaŋ slu mətaw wəlan ama tuya ɓa, kədawzəmaŋ mbel ɓa, kədaw zəmaŋ zəga mərrəsl wəlan dərrəsl ɓa, kədaɗɗaŋ mana'a ɓa. An kəganənək zukum səza zəgas pak na, kəɗɗaŋgək mogoni. Məsoŋ zamə.

³⁰Asliŋninik masləŋɗe neki, masləŋɗe ambataŋgək a Antakiya. Adan agapaŋ adaka, akkeletinik ɗii na Maŋgəlva pakə, apsitinik ɗerewel naka.

³¹Yaŋ aŋɗanəni, adan apprəmən wənnan na, anekək makret diiɗa asɓetike.

³²Zuda də Silas anahsitinik labara diiɗa, vi kasɓeti dəsoŋ gən də sembe vi may Zuda sən kiyit bo məs kleŋɗeŋ.

³³Yas avunoŋ adak suɗike, yaŋ milmiŋgiɗit alhetini, amilyoŋ azet ɗii məs də slinini.

³⁴[Amma na Silas asanək adaka.]

³⁵Pol də Barnabas avunoŋguk a Antakiya sawɓa. Ndəɗaŋ dit ɗii meɓɓet diiɗa, tahəŋ wərbanən zəga sit ɗii də wəpel sit wənna Ɗəfdaya.

³⁶Adan avunoŋ suɗike kana, Pol apsən Barnabas na: Amndam səm ule milmiŋgiɗəm məs məpel sit labara na Ɗəfdaya neki, mule gən va asoŋ ɗa.

³⁷Yaŋ Barnabas adaŋgla wəka Zaŋ məs adawyaŋ na Markus dənɗaŋ.

³⁸Amma Pol dəŋgəm ɓa, vi Markus apetik aka tive a Pamfiliya, amilik dirɓe dəgrak wəza məs atəŋ ɓa.

³⁹Wən memeɗeŋ agəɗək awaleŋgti, ha awɗakaŋka. Barnabas agəmək Markus, atoŋgoŋguk adəv bəlay ambataŋgək a Kiprus.

⁴⁰Pol tamə, awelik Silas ambataŋka. Milmiŋgiɗit apan sitinik mbəlembəle na Maŋgəlva.

⁴¹Pol ambatək aka dələv na Siriya də Silikiya asɓetik Kretiyenɗe.