Read Gidar Wəza net Masləŋɗe 17 Bible Online

Wəza net Masləŋɗe 17 - Gidar bible

Wəza net Masləŋɗe 17

¹Agəmənək tive na Amfipolis də Apolloniya, agapaŋgək a Tesalonika. Gəla nawpel wənnet Yahudiyenɗe tayadaka.

²Pol ambatək adəv gəla vani, va məs adaɗɗa ɗayɗay. Agəɗək vas ha gap pay naffet* hoku, tahəŋ wəbayaŋ ma aka wənna ɗerewel na Maŋgəlva.

³Tay boton sit də wərban sit na, say Messiya* dəzəm gən saha, dəsil gən sətəki əmta. Pol amna: Zezu məs nədawnah sukum wənnan kakaŋkəŋka, ndeni Messiya.

⁴Ɗii meɓɓet sə walaŋgit aŋgluwənək wənnani, asbanənək Pol də Silas. Daga ɗii diiɗa sə waleŋgit Grekɗe məzu zuliyaŋ sənən Maŋgəlva dit gil məs nadəv əlfa an gakdaka.

⁵Amma Yahudiyenɗe aɗɗaŋgək kotoroku, akkeletinik ɗii ɗəɗerɗe sə gəla lumo, yaŋ ɗii net asil gənən geŋgere awalaŋ gəla pakə. Yaŋ akaraŋ ki gəla na Zason, vi kaw keyet may Pol də Silas, vi kawgil git appaka.

⁶Amma adan də rihin ɓa, yaŋ akdəhən Zason dit milmiŋgiɗin meɓɓet abet ɗii gugiriɗ na walaŋ gəla nani, yaŋ aɗɗaŋ geŋgere aɓɗaŋ na: Ɗiiyiŋki, ndəɗaŋ dədaw sil gənən wən ko aŋga pakə! Kakaŋ bo azoŋguk awalaŋ gəla anamda.

⁷Zason bo atefik eŋgil ananda. Net misset ɗaah dədawka na məlĩ na Roma di, tahəŋ wənahaŋ na məlĩ maɓɓan tay, ndəni iya nan na Zezu.

⁸Də wənnəski asil gənən makret ɗiiyi, dit ɗii gugiriɗ na walaŋ gəla nan pakə.

⁹Ɗii gugiriɗ aɗɗaŋ sənənək dewle sən Zason dit ɗii meɓɓeti də faɗin gin deleɗ naw man kiyit sə vet pay kita adaɗɗa.

¹⁰Adan dəfəɗ agəɗə, milmiŋgiɗin aslənənək Pol də Silas a Bereya. Adan agapaŋ adaka, ambataŋgək adəv gəla nawpel wənnet Yahudiyenɗe.

¹¹Ɗii na Bereya aŋglaŋgək wəpprəm wən meleketeni, net tahəŋ va ɗii na Tesalonika ɓa. Tahəŋ wəsokən zit aza wəpprəm wənnani. Pay pak tahəŋ wəkayanən wənna ɗerewel na Maŋgəlva. Vi kawsən an məs Pol adawpel na gesiŋgi sa.

¹²Ɗii diiɗa atafənək wənnani, daga gil net Grekɗe məs əlfa gakdaka dit Grekɗe vet pak atafənək wənnani.

¹³Amma adan Yahudiyenɗe na Tesalonika apprəmən na, Pol tayərban wənna Maŋgəlva a Bereya, azoŋko atəŋgaŋgək wəsil gən makret ɗiiyi.

¹⁴Go'ləŋ milmiŋgiɗin alhanənək Pol kawmbat aba məlpa metiŋ, amma Silas də Timote asoŋguk a Bereya.

¹⁵Ɗii məzəlhanən Pol agapaŋgək a Ateena, yas amilyoŋ a Bereya, yaŋ Pol anah sit na, dənahsənən gən Silas də Timote dəzoŋ gən wərəhən go'u.

¹⁶Pol tay ga Silas də Timote a Ateena. Adan awla walaŋ gəla nan aknahək də matuya, gədəvən adək sawɓa.

¹⁷Vini adawbay ma dit Yahudiyenɗe, gəm dit ɗii məs Yahudiyenɗeŋ ɓa, məzu zuliyaŋ sənən Maŋgəlva, adəv gəla nawpel wənnet Yahudiyenɗe. Tay bay ma ko dit ɗiiyen məs arah a lumo.

¹⁸Ɗii məzərbaŋ zəga sit ɗii məs adawyaŋ na Epikuriyenɗe dit Sitoykoyenɗe bo, abayaŋgək ma dəndən. Ɗii meɓɓet aɓɗaŋ na: Mi məs wənnəŋ adaŋgla wənah di? Ɗii meɓɓet aɓɗaŋ na: Kuzuŋ matuya maɓɓan adaŋgla wərban soko. Adawnahaŋ vas na vi Pol adawnah wənna Zezu də wənna əsilyo net ɗii mimtiti.

¹⁹Vini akanən Pol abet ɗii məkkelit atəki məs adawyaŋ na Areyopagus, aɓɗaŋ na: Mamaka sən wən məs kədawpel meleketenəŋka.

²⁰Wən maɓɓan taya walaŋ wənnani məs məpprəm ɗaah ɓa, məŋgələk kaw sənən.

²¹Ɗii na Ateena dit melekeɗ məs dədasoŋ adak pakə, maɗulet pak say wəpprəm wən meleketeni, də wətawan wənnani.

²²Yaskan Pol aziw abet ɗii məkkelit a Areyopagus, apsit na: Haaya! Munokum ɗii na Ateena! Nulak na munokum tatə gayaŋ sənən wənna wəsban matuya nokum.

²³Daga nədabal awalaŋ gəla nokum, nulak təki nawtaw wəla zəga na matuya nokum də an məverin pakə: Maŋgəlva məza məsəni ɓa. Yo də məs kədawzuliyaŋ sənən məza kəsənən ɓa, ndəni kan məs nədawnah sukum wənnani.

²⁴Maŋgəlva məs dəzəməɗ dəlva fuŋ də zəga nadəvən pakə. Ndəni Ɗəfdaya na disiŋ də dəlva fuŋ, awsan adəv gəla mərkan də vet ɗii ɓa.

²⁵Nan dəŋgəl ɗii dəɗɗaŋ sənən gən zəga maɓɓan ɓa, vi ndəni dədapsən zeŋgille sən ko nawa pak də əmpəsa, də zəga pakə.

²⁶Səza ɗəf takayi azimiɗ ɗii pakə, aɗɗak dəsoŋ gən aka dələv pakə. Daga dəɓəl wəɗɗan tagay ɓa, aslak pay nani də meŋge nanziya net aka dələv pakə.

²⁷Aɗɗe na vi dəkayanən gəni. Kuzuŋ warəhən naw rəŋgən soko. Amma Maŋgəlva tay faraɗa də ko nawa səzan ɓa.

²⁸Vi anahək na: Mənam tat də zeŋgillemə, də wəɓla namə, də va mədaw samə, pak səzan ade. Va ɗii meɓɓet suweleŋgit məyaŋ gəlya nokum anahaŋ na: Nam bo kirtin mənani.

²⁹Adan məkpaŋgək kirtini, məda ɗum na Maŋgəlva agilik va fotoɗe məs ɗii adaɗɗaŋ də maɗulet də meleŋge də təbəs net deleɗ ɓa, walla də gərəm məkkahən ɓa.

³⁰Maŋgəlva aɓəsəka adan ɗii dəsənən wənnan an məs adaɗɗaŋ ɓa, amma kakaŋ na tay iye ɗii ko səŋga pakə, də tubiyoŋ gəni.

³¹Vi aɗiyək pay nawtaw kita aka dələv pak də goŋga, də ɗəf məs aweli. Arbanək wən də wəsil gən sətəki əmta.

³²Adan apprəmən Pol adawpel wənna əsilyo sətəki əmta, ɗii meɓɓet amasaŋgək akani, amma ɗii meɓɓet apsənən na: Mamaka kəpelsəm gən wənnan pay maɓɓan əmpa.

³³Yaŋ Pol agil suweleŋti.

³⁴Ɗii meɓɓet atafənka asbanənka, suweleŋgit bo, Diyonisiyus ɗəf na Areyopagus dət ɗak məs adawyaŋ na Damaris, dit ɗii meɓɓet tahəŋ.