Read Gidar Wəza net Masləŋɗe 18 Bible Online

Wəza net Masləŋɗe 18 - Gidar bible

Wəza net Masləŋɗe 18

¹Pol asilik sə Ateena, ambatək a Korintus.

²Adaki arəh Yahudiyen məs adawyaŋ na Akilas, sə Pontus ade, fari ade sə Italiya dət ɗak nan məs adawyaŋ na Piriskilla ɓa, vi məlĩ na Roma məs adawyaŋ na Kalawdiyus arɓehetik Yahudiyenɗe sə Roma pakə. Pol ambatək azeti.

³Asanək dənɗaŋ tayəɗɗaŋ wəza matakə vi wəza net məs takayi, ndəni wərmah gəla na gabaga.

⁴Də pay naffet* pakə, Pol tay bay ma dit Yahudiyenɗe gəm Grekɗe adəv gəla nawpel wənnet Yahudiyenɗe. Vi aŋgəl dətafən gən Zezu.

⁵Adan Silas də Timote azoŋ sə Makedoniya, Pol apanək wərmah gəla na gabaga, vi karban wənna Maŋgəlva pay pakə. Arban sitik Yahudiyenɗe na Zezuwi Messiya*.

⁶Yas dətafən wənnan ɓa. Say wəranəni, atu'uk hologodo səza lukut nan aketi, apel sitik də gəgay, apsit na: An kəzaŋka munokum kəsənəni. As wənnawi əmpa ɓa. Kakaŋ na naw wanəmbat azet ɗii məs Yahudiyenɗeŋ ɓa.

⁷Yas kan apeti ambat wəsan eŋgil ana Titus də Zustus da, ɗəf məzu zuli sən Maŋgəlvayi. Gəla nan amaŋgava gəla na zuliyi.

⁸Kirispus məlĩ na gəla vani atafək Ɗəfdaya də gəla nan pakə. Ɗii na Korintus apprəmənək wənnani, məgəɗ siti baptem.

⁹Dəfəɗ maɓɓani, Pol asilke, pay ada sine vanni, Ɗəfdaya apsən na: Kədaw geslne' ɓa, kədapan wəpel wənnəŋ ɓa, kədapan wəza nok ɓa.

¹⁰Intat də isi. Ɗəf tay naw rəŋguk ɓa, vi ɗii naw tahəŋ diiɗa awalaŋ gəlaŋka.

¹¹Pol asanək adak wəsva taka də mani, tayərban wənna Maŋgəlva sit ɗiiyi.

¹²Pay sən Galliyo asan ngomna aka dələv na Akaya, Yahudiyenɗe akkalaŋka, armanənək Pol, akanənək aka kita.

¹³Aɓɗaŋ na ɗəffəŋka, tay reket ɗii vi dəzuliyaŋ sənən gən Maŋgəlva, məza də tive na ma henziŋ nam ɓa!

¹⁴Pol aŋgəl kawpele, amma Galliyo apsit Yahudiyenɗe na: An mambray maɓɓani, walla zəga mbrayen temme agəɗə, wanətaf uwəli nani, munokum Yahudiyenɗe.

¹⁵Amma adan wənnan aka wəbay ma aka wəpele, də iya, gəm aka ma henziŋ nokum, say munokum sən kikum mətaw kita nani.

¹⁶Yaŋ arɓehet sətəki na kita.

¹⁷Ndəɗaŋ pak armanənək Sostenes məs dələv na gəla nawpel wənna, avərənək karet ɗii pak atəki na kita. Amma aza Galliyo wənnan dəssan ɓa.

¹⁸Dərɓaga as bo Pol avoŋguk a Korintus diiɗa dit milmiŋgiɗin, yaŋkan apeti, atoŋ adəv bəlay dət Piriskilla, gəm Akilas, ambataŋgək a Siriya. Amma, daga dəɓlaŋ wəmbataŋ tagay ɓa, afaɗək kiyən a Keŋkeriya, vi aɗɗak wənnan lahəŋ na afaɗna kiyən ɓa.

¹⁹Agapaŋgək awalaŋ gəla na Efesus. Adaki kan Pol awɗak dət Piriskilla gəm də Akilas. Nan ambatək adəv gəla nawpel wənnet Yahudiyenɗe. Abayək ma dənɗaŋ.

²⁰Akkamanənək dəvoŋ gən diiɗa anet da, amma dəŋgəm ɓa.

²¹Amma adan adadani, anah sitik na: An Maŋgəlva aŋgəmək na, wanimil anokum da. Yas atoŋ adəv bəlay, ambatə.

²²Adan agap a Kaysariya, ambatək a Zerusalem wədasɗet kretiyenɗe. Yas kan ambat a Antakiya.

²³Yas avoŋ adak suɗike, ambat kana. Abalək aka dələv na Galatiya də Firigiya, asɓetik ɗii na Maŋgəlva pakə.

²⁴Yahudiyen maɓɓan tay məs dəde sə Aleksandiriya, iya nan na Apollos, adek a Efesus. Ɗəf nan asənək wəpele də ɗerewel na Maŋgəlva pakə.

²⁵Asənək tive na Ɗəfdaya diiɗa, apelik wənnani, arbanək wənna Zezu də tive nani, amma say wənna baptem na Zaŋ kaaka asənə.

²⁶Atəŋgək wəpel məza də geslne ɓa, adəv gəla nawpel wənnet Yahudiyenɗe. Adan Piriskilla də Akilas apprəmən an məs adawpele, akinənək eŋgil anet da, arban sənənək tive na Ɗəfdaya an kotak nani.

²⁷Yaŋ Apollos aɗum nawmbat aka dələv na Akaya kretiyenɗe na Efesus abaahaŋ sənənka də wəver ɗerewel azet milmiŋgiɗin nadaka, vi dətafən gəni. Adan agap adaka, anah sitik kretiyenɗe mbəlembəle na Maŋgəlva məs apsəni.

²⁸Anah sitik Yahudiyenɗe karet ɗii pakə, ha dəɓapən wəbayən man ɓa. Arban sitik adəv ɗerewel na Maŋgəlva na, Zezu ndəni Messiya* gesiŋ.