Read Gidar Wəza net Masləŋɗe 19 Bible Online

Wəza net Masləŋɗe 19 - Gidar bible

Wəza net Masləŋɗe 19

¹Adan Apollos taya Korintus, Pol ambatək dəket massorgoɗe ha gap a Efesus. Adaki arih ɗii na Maŋgəlva meɓɓeti.

²Assohotike: Səza kətafaŋ na kərəhaŋgək Əmpəs Salala* sa? Azlanənka, məpprəm ɗaah wənna Əmpəs Salala ɓa.

³Pol assohetike: Ya baptem awani kərəhaŋ di? Aɓɗaŋ na baptem na Zaŋ mərahə.

⁴Pol apsit na, baptem na Zaŋ tay viyit məzu tubiyaŋ vi mambray neti. Zaŋ apsit ɗii na Israyel na say dətafən gən ɗəf məs dədazan dərɓagani, ndəni Zezu.

⁵Adan apprəmən vaska, atafənək baptem də iya na Zezu Ɗəfdaya namə.

⁶Pol aɗiyək van aketi, Əmpəs Salala adek aketi, apeleŋgək də ma maɓɓani, yaŋ arbanən wənna Maŋgəlva.

⁷Wəŋɗa net ɗii net wasan va klaw kiyit sula.

⁸Təla hoku Pol adambat adəv gəla nawpel wənnet Yahudiyenɗe, tay pel sit ɗii məza də geslne ɓa, tay bay ma dənɗaŋ. Tay gay wərban sit wənna məlĩ na Maŋgəlva.

⁹Amma ɗii meɓɓet kiyit ɓəlli, dəŋgereŋ wətaf wənnan ɓa, apeleŋgək mbrayen aka wənna tive na Ɗəfdaya amaret ɗii diiɗa. Vini Pol agil git ɗii na Maŋgəlva ambataŋ. Pay pak tayə bay ma dit ɗii a lekol na Tirannus.

¹⁰Asbanək wəɗɗan vaska ha gap wəsva sula, ha ɗii naka dələv na Asiya daga Yahudiyenɗe dit ɗii məza Yahudiyenɗeŋ ɓa pakə, apprəmənək wənna Ɗəfdaya.

¹¹Maŋgəlva agəɗək sokoneɗ diiɗa nagət aket də Pol.

¹²Akan sitinik kesekese net lukutɗe na Pol sit məs gbəgbaɗe, gbəgba' neti də witem net pak agilke.

¹³Yaŋ Yahudiyenɗe meɓɓet adoŋ atəki maɓɓani, wəgil git witemɗe, tahəŋ wənahaŋ na: Də iya na Zezu məs Pol adarban wənnani, ndəni mədaw nah sukum.

¹⁴Kirtin daya net məs dəlveŋge məs adawyaŋ na: Sikewas dədaɗanən wənnəska. Kirin vet buhuləŋ.

¹⁵Amma witem apsit na: Nəsənək Zezu, Pol bo nəsənək wənnani, ya nokum may nawa kənanaŋ kandi?

¹⁶Ɗəf mitemin nak azlahək aket də sembe, ha adayək kiti, agəɗsitik vamviya, angaretik lukutɗe neti, anzuwaŋgək siŋgil ananda zit mekeleŋ.

¹⁷Yahudiyenɗe dit ɗii məza Yahudiyenɗeŋ ɓa na Efesus pakə, apprəmənək wənnani. Makret azlaka, yaŋ ɗii diiɗa tahəŋ wəgakdakanən iya na Ɗəfdaya.

¹⁸Ɗii diiɗa sə waleŋgit ɗii dətafaŋ azoŋko atubiyaŋka də wərban wənnet abet ɗii pakə.

¹⁹Ɗii məɗɗaŋ sokeneɗ də wəska helik pak akiyənik ɗerewelɗe neti, azleninik keret ɗii pakə. Aŋɗanənək deleɗ məs məlbəh ɗerewelɗe veti, waɗɗaŋ deleɗ na təbəs gabal kaklaw sle (50,000).

²⁰Vaski wəpel na Ɗəfdaya atray də sembe, arbanək gakdak na Maŋgəlva.

²¹Dərɓaga wənnəska, Pol aŋgələk wətoŋ kla Makedoniya də Akaya vi kambat a Zerusalem. Amna: An nəmbatək adak na, wanəmbat a Roma'e.

²²Aslinik məza baahaŋ nan sula a Makedoniya, ndəɗaŋgəŋ Timote də Erastus, amma nan anziyək aka dələv na Asiya suɗike.

²³Dəpas bo wən metiŋgin asilik a Efesus aka wənna tive na Ɗəfdaya.

²⁴Ɗəf taya daka, iya nan na Demetriyus, dədawbay təbəs net deleɗ məs dəgil va gəla na maŋgəlva Artemis. Atərək wəray sit məɗɗaŋ wəza nan sawɓa.

²⁵Ayek pakə, akkeletik dit ɗii məɗɗaŋ wəza zemvin net pakə, apsit na: Haaya! Kəsəŋgənək wəza naməŋ tayə tər səm wəray sawɓa.

²⁶Munokum sən kikum munokum tatulanəni, munokum tatəpprəmən an məs Pol adaɗɗaŋka. Tay nah na maŋgəlva məɗɗan də vet ɗii na, nan maŋgəlvayi ɓa, ha ɗii na Efesus diiɗa dit ɗii naka dələv na Asiya vadaysa net atafənək wənnani.

²⁷Ya an ɗii məs dədasbanən azelenənək wəza namə, wəza nami kaaka' ɓa, ɗii wapanən wə gakdakan gəla nat Artemis maŋgəlvak nam matəŋgəta. Ɗii wapanən wəɗi kiyit maŋgəlvak məs ɗii na Asiya dit ɗii namba dələv pak adawzuliyaŋ sətəni, watəkpaŋ zəga ɗarə.

²⁸Adan ɗii pak apprəmən wənnan vaska, gidivit adək sawɓa, atəŋgaŋgək wəɗi geŋgere, aɓɗaŋ na: Artemis na Efesus matəŋgətə!

²⁹Wən nan atrayək awalaŋ gəla pakə, wənnan atapetik ɗii, armeninik may Gayus də Aristarkus ɗii məs dəzoŋ də Pol sula sə Makedoniya, anzuwaŋgək dənɗaŋ akeninik atəki nasmaya.

³⁰Pol bo manaka wəmbat azet ɗii veti, amma ɗii na Maŋgəlva atakənka.

³¹Ɗii gugiriɗ na dələv na Asiya dit bayneŋgiɗin, asləŋgaŋgək azani, akkamanənka adawtoŋ atəki nasmay ɓa.

³²Dəpas bo wəkkal nan attapək sawɓa. Ko naway pak tayənzla vamvəl də wənnan temme, vi ɗii vadaysa dəsənən wən məkkelet akan ɓa.

³³Ɗii suweleŋgit ɗii məs dəkkalaŋ neki, adoŋguk wənahsən Aleksandər, Yahudiyenɗe ayanənək dəziw gən abet ɗiiyi. Yaŋ Aleksandər aslan van a disiŋ karban wən məs ɗii akkalaŋ sənənni.

³⁴Amma adan asəŋgən na Yahudiyenni, atəŋgaŋgək wənzla vamvəl aka wən taka ha gap ler sula Artemis na Efesus də gakdaktə!

³⁵Saha saha məzu ver na walaŋ gəla nan aɓətgit ɗiiyi, apsit ɗii na: Haaya munokum ɗii na Efesus! Ko naway asənək gəla nat Artemis məs də gakdaka, də gərəm məs dəbət sə disiŋ pak taya Efesus.

³⁶Ɗəf tay nawzelen wənnan ɓa. Vini say məɓət ɗa, məzi zukum aza an məs kədaɗɗaŋ.

³⁷Ɗiiyiŋ məs kəkiyeŋ aŋkiŋ na, dəhalaŋ zəga sə dəv gəla salala ɓa, dəpeleŋ mbrayen akat maŋgəlvak nam ɓa.

³⁸An Demetriyus dit məɗɗaŋ wəza nan tahəŋ də wənna wəli aka ɗəffa, ɗəɗaah say də pay nawtaw kita azet ɗii gugiriɗ nokum. Adak na, waɓapən wətawən kita nani.

³⁹Amma an kəŋglaŋgək wənnan dayki aska, say məka wənnan aba wəkkal net ɗii pakə.

⁴⁰Amma an məs dəgəɗ dəpaŋkəŋka, kuzuŋ kaw hayyami akani, wanahaŋ na mənamtə məɓoŋmə, vi mənam tat də wən gala nakkal vaŋ akan ɓa.

⁴¹Adan agrak wəpel siti, atray gitike.