Read Gidar Wəza net Masləŋɗe 21 Bible Online

Wəza net Masləŋɗe 21 - Gidar bible

Wəza net Masləŋɗe 21

¹Dərɓagan kana yaŋ muɗak dənɗaŋ, məmbatək də bəlay a Kos. Vit pumpum nani məmbatək a Rodes. Sədaki məmbat a Patara.

²Adaki mərah bəlay nambat a Finikiya. Məpeŋke məmbatka.

³Məpeŋgək a Kiprus kəta, adan mədawlan vandaka, amma yaŋ mətoŋ kla dohoŋ nani, məmbatək a Siriya. Yaŋ məprikik a Tirus, vi dəprik gənən gən zəga səka bəlay tagay.

⁴Yaŋ mərih ɗii na Maŋgəlva adaka məsamək dənɗaŋ gap pay buhul. Də sembe na Əmpəs Salala anah sənən Pol adadan a Zerusalem ɓa.

⁵Amma adan wəvoŋ buhul nak atoŋgu, məsilik wəmbata. Ndəɗaŋ dit gil neti dit kirin pak alhamənka, ha ama poho na walaŋ gəla nani. Məkdukuk takpram ama busgum na məlpa metiŋgi, məzulika.

⁶Yas muɗak dənɗaŋ, mətoŋ adəv bəlay, net bo amilyoŋguk anetda.

⁷Adan məsil sə Tirus, məmbatək a Potolemayis. Adaki bo milmiŋgiɗəm ataf mənən anetda, məsɓətək dənɗaŋ.

⁸Vit pumpum nani, məsilik wəmbata, məgapək a Kaysariya, adak bo məmbatək ana Filip da məzərban wənna Maŋgəlva, mətehik ananda. Nan bo ɗəf na waleŋgit ɗii buhul məs məwelit a Zerusalem naki.

⁹Nan bo tay dit kirtin muguliŋgit poɗo, dəɓlaŋ wəmbat amba zil tagay ɓa, tahəŋ wəpelin wənna Maŋgəlva.

¹⁰Adan məsam adak wəvoŋ suɗike, məs kleŋ maɓɓan tay dəde sə Zude, iya nan na Agabus.

¹¹Adek azamə. Agəmək zəga naynan dadak Pol. Aynanək vani də tələn dəndəni, amna: Aŋki məs Əmpəs Salala anah suwa: Yahudiyenɗe na Zerusalem waynanən affən zəga naynan dadak ɗəffəŋka, wapanən avet ɗii məs dəsənən Maŋgəlva ɓa.

¹²Adan məpprəm vaska, mənam dit ɗii nadak pakə, məkkamanək Pol, adaw mbat a Zerusalem ɓa.

¹³Amma nan azlanək na: Vimi kədawhəmaŋ di? Mokum aka wəzla gən makraw sa? Naw na say məs adaynawəni a Zerusalem mi kaaka ɓa, amma əntatə zaɓan zu kamta vi wənna Zezu Ɗəfdaya namə.

¹⁴Məɓap wəkpaŋgan səka wənnan ɓa, yas məppani, mənah na: Ɗəfdaya dəɗɗa an məs aŋgəl pakə.

¹⁵Dərɓaga wəvoŋ suɗike adaka, məzaɓanək zəmə məmbatək a Zerusalem.

¹⁶Ɗii na Maŋgəlva sə Kaysariya ambataŋgək də mənamə. Akəmənək eŋgil ana Manason da məs dəde sə Kiprus, ɗəf na Maŋgəlvayi daga farə, azəm gəməka.

¹⁷Adan məgap a Zerusalem, milmiŋgiɗəm ataf mənək də makret taka.

¹⁸Vit pumpum nani, Pol ambatək dəmənam ana Zakuba da. Ɗii gugiriɗ net kretiyenɗe pak akkalaŋgək adaka.

¹⁹Pol asɗetike, anah sitik an məs va Maŋgəlva agəɗ dəndən pak aweleŋgit ɗii məs Yahudiyenɗeŋ ɓa.

²⁰Adan apprəmən vaska, agakdakanənək Maŋgəlva. Yaŋ anah sənən Pol na: Kulak va məs dəgəɗ aŋka məlmuwa. Ɗii uzineɗe akpaŋgaŋgək ɗii na Maŋgəlva suweleŋgit Yahudiyenɗe, amma ndəɗaŋ pak tahəŋ wəsbanən ma henziŋ na Moyis.

²¹Apprəmənək na istatərban sit Yahudiyenɗe məs aka dələv net ɗii məza Yahudiyenɗeŋ ɓa pakə, kənah sitik na məppan ma henziŋ na Moyis. Apprəmənək kənah sitik əmpa na, kədaskəlinin kirtukum awra ɓa, adasbanən matuya net Yahudiyenɗe ɓa.

²²Mbar mədaɗɗa di? Gesiŋ bo apprəmənək na kədeke.

²³Kəɗɗa gən an mədawnah suko. Mənam tat dit ɗii poɗo aŋka məs dinanən met aka zəga.

²⁴Dok dənɗaŋ, askoɓ ki zuk dənɗaŋ va matuya net anah naskoɓni. Afaɗinik deleɗ naskoɓ ki ziti, vi dəfaɗən gən kiti. An agəɗək vasna, ɗii pak dəsənən gən na an məs apprəmaŋ akokuŋ na gesiŋgi ɓa, amma is sən kiko, istatəsban ma henziŋ na Moyis.

²⁵Amma net kretiyenɗe məza Yahudiyenɗeŋ ɓa, məver sitik ɗerewel, mənah sitik an məs məsler akani: Adawzəmaŋ slu mətaw wəlan ama tuya ɓa, adawzəmaŋ mbel ɓa, adawzəmaŋ slu mərrəsl wəlan dərrəsl ɓa, adaɗɗaŋ mana'a ɓa'a.

²⁶Ndəni kan Pol ambat dit ɗii poɗo neki. Vit pumpum nani, akkalaŋgək wəɗɗa matuya naskoɓ ki zit naka. Yaŋ atoŋ adəv gəla metiŋ naw zuliya*, anah sitik məs dəlveŋge pay an dəpəl nagrak wəskoɓ nani. Afaɗək sazlaga vi naskoɓ net ɗii məs dinanən met na zega neki.

²⁷Adan wəvoŋ buhul go'oy aza wəgraka, Yahudiyenɗe meɓɓet səka dələv na Asiya awlanənək Pol adəv gəla metiŋ naw zuliya. Asil gənənək makret ɗii pakə, armanənka.

²⁸Aɗɗaŋgək geŋgere, aɓɗaŋ na: Haaya ɗii na Israyel məbaah səmə! Ɗəffəŋka, ndəni dədabal ko aŋga, yaŋ adawnah na: Ɗii na Israyel də ma henziŋ na Moyis də gəla metiŋ na zuli pak zəgayi də sləman kpeeh ɓa. Yaŋ kakaŋ bo, ka aki ɗii məs dəsənən Maŋgəlva ɓa adəv gəla metiŋ naw zuliya. Aray gənək təki salala.

²⁹Anahaŋ vasna, vi adawlanən Pol awalaŋ gəla də Torofimus ɗəf na Efesus, azet na atoŋ gənək adəv gəla metiŋ naw zuliya.

³⁰Wən nan atrayək awalaŋ gəla pakə, ha ɗii pak akkalaŋka, armanənək Pol, akdəhənək appaka sədəv gəla metiŋ naw zuliya. Go'ləŋ ampanənək madamba.

³¹Ɗii məkkelit nek aŋglaŋ wəbayən Pol, amma labara nan agapək aza daya net sozeɗ na Roma, apsənən na wən agəɗək a Zerusalem sawɓa.

³²Go'ləŋ daya net sozeɗ andek sozeɗ dit ɗii gugiriɗ neti, anzuwaŋgək azet ɗii məkkelit neki. Adan ɗii awlenin sozeɗi, apanənək wəvər Pol.

³³Yaŋ daya net sozeɗ ambat gu'o də Pol armaka, apsit na minan dit ngiyamɗe sula. Yaŋ assoheti: Naway di? Ma gəɗ di?

³⁴Ɗii suweleŋgit ɗii məkkelit anəhaŋ wən temtemi, azlaɓanənək wənnan sawɓa, ko dərəh wənnan mogon ɓa, vi gogoyo net ɗiiyi, aɗiyək wənnan sit ɗii dəkanən gən Pol annet sozeɗ da.

³⁵Adan agapaŋ ameŋgle, sozeɗ aslanənka, vi ɗii tahəŋ wəɗɗaŋ sənən daraw sawɓa.

³⁶Ɗii pak tahəŋ wəsbanənni, tahəŋ wəɗiyaŋ geŋgere: Məbaya.

³⁷Sozeɗ gu'oŋ aza wətoŋ gən Pol eŋgil kana, yaŋ apsən daya net na: Wanərah tive nawpel suk wən sa? Soze assohonəka: Kəsənək ma Grek sa?

³⁸Ayye əstə ɗəf na Misra məzuɓoŋgit ɗiiyiŋki kəke ɗii məɓoŋgit uzine poɗo də zəga naw gay awraŋ mbaraka ɓa sa?

³⁹Pol azlanəka: Naw Yahudiyen nani, məwəw a Tarsus dələv na Silikiya, wətən walaŋ gəla metiŋ nani. Nəkamokuko avay tive nawpel sit ɗii məkkeltiŋki.

⁴⁰Apsənək tive, yaŋ kan Pol apeŋ a disiŋ aslan van vi ɗii dəɓətaŋ gəni. Adan aɓətaŋ, atəŋgək wəpel sit ɗii də ma aramiya: