Read Gidar Wəza net Masləŋɗe 22 Bible Online

Wəza net Masləŋɗe 22 - Gidar bible

Wəza net Masləŋɗe 22

¹Yo ɗii gugiriɗe dit geleŋgiɗwa! Məpprəmma, nənah sukum əntat də mambray ɓa.

²Adan apprəmən wəpel də ma Aramiya asoŋguk sləɓək dayki laŋka. Yaŋ Pol anah na:

³Naw Yahudiyen nani, məwəw a Tarsus dələv na Silikiya. Amma a Zerusalem aŋki nəɓayə, Gamaliyelli dərban su ɗerewel, arban suwək ma henziŋ net migilim kotakə. Nəsbanək Maŋgəlva də sembe va kədasbanən kakaŋka.

⁴Nəzəm gitik saha net ɗii məzəsbanən tive na Ɗəfdaya ha ɗii meɓɓet amtaŋka dəka wən an məs nəgəɗ siti nərmek zel dit gil pak nəkek a daŋgay.

⁵Daya net məs dəlveŋge dit ɗii gugiriɗ net Yahudiyenɗe pakə, asənənək an nədawpele goŋgayi. Avayaŋgək ɗerewelɗe məs avereŋ sitin Yahudiyenɗe na Damas. Vi nədawmbat adaka, vi karme ɗii na Maŋgəlva kaɓrukti kamilyaw dənɗaŋ a Zerusalem. Ɗii gugiriɗ dətawən gən kita aketi.

⁶Adan nədadaw a Damas kana, gu'o nan aza wəgap adaka, tətaŋ payi, go'ləŋ təki babar adek sə disiŋ, akekeɓe wəka, asərət wəka.

⁷Nəsbərək afuŋ, nəpprəmək wəla ɗəf dawyuwa: Sol, Sol, vi mi kədaw kayan mamaw vaŋ di?

⁸Yaŋ nəssohoni: Nawa kənan di Ɗəfdaya? Apsu na: Əntə Zezu na Nazaret məs kədaw kayan mamani.

⁹Ɗii məs dədadoŋ də in awlanək təki babara, amma dəpprəmənən wəla ɗəf dawpel su ɓa.

¹⁰Nəssohonəka: Mi nədaɗɗa di Ɗəfdaya? Ɗəfdaya apsu na: Asil doko a Damas, adaki adawnah sukun an məs Maŋgəlva aŋgəl kəgəɗ gən pakə.

¹¹Təki babar nan atipik harawa, ndəni kan ɗii məs dədadoŋ də in akdəwəni akuwən a Damas.

¹²Ɗəf taya daka iya nan na Ananiyas, ɗəf məzuli sən Maŋgəlvayi, tayəsban ma henziŋ namə. Yahudiyenɗe na Damas pak tahəŋ wəsa'ən wənnan sawɓa.

¹³Adek azawa, aziwik amaŋga vawa, apsu na: Sol, məlmuwa akolu! Gu'ləŋ haraw akolko. Intatulani.

¹⁴Ananiyas apsu na: Maŋgəlva net dəhiŋgiɗmə awelkuko vi kəsən gən wəŋgla nani, akula gawla nan lewlewi, akəpprəm an gawlaŋ tay pele.

¹⁵Vi wakərbani, wakənah sit ɗii an məs kuwəl pakə də an məs kəpprəmə.

¹⁶Mi kədaw ga kakaŋ di? Asil ataf baptem də iya na Ɗəfdaya mambray nok dəskoɓ gəni.

¹⁷Nəmilik a Zerusalem. Adan nədawzuli adəv gəla metiŋ naw zuliya*, Maŋgəlva arban suwək sokene.

¹⁸Yaŋ Ɗəfdaya adawpel su vaska, agəm zuk gu'u, agil sə Zerusalem vi ɗiiyiŋ atafən na an məs kədarban aka wənnaw ɓa.

¹⁹Nəzlan sənək na: Ɗəfdaya nəsənək gesiŋ nəmbatək adəv gəla nawpel wənnet Yahudiyenɗe, nərmek ɗii noko, nərgeke.

²⁰Pay məbay Etiyen ɗəf məzərban wən noko, naw bo əntatadaka. Wən na əmta nan lewi azawa, əntə nəga lukutɗe net ɗii məs dədawbayəni.

²¹Ɗəfdaya apsu na: Doko, wanəslənuk faraɗa, azet ɗii məza Yahudiyenɗeŋ ɓa.

²²Ɗii aɓəsənək wəpel nani ha gap aza wənnet ɗii məza Yahudiyenɗeŋ ɓa. Amma adan apprəmən vaska, aɗɗaŋgək geŋgere, aɓɗaŋ na: Məgəma, məbaya! Kədapanən madaran ɓa.

²³Tahəŋ wəɗiyaŋ geŋgere, tahəŋ wəsgetin lukutɗe net a disiŋ, tahəŋ wəndolun hologudum.

²⁴Daya net Sozeɗ aɗi sitik wənnan sit ɗii nani dəkanən gən eŋgili, dəvərən gəni vi dəsənən gən wən məs Yahudiyenɗe aɗɗaŋ geŋgere vaŋkəŋ akanəŋka.

²⁵Amma adan aɓrukun ka vərən, Pol apsən daya net sozeɗ ana dak na: Tive tay kəvər gən ɗəf na Roma məza mətawi kita akan tagay ɓa sa?

²⁶Adan soze nak apprəm vaska, ambatək aza daya net naka, assohonəka: Mi kədaŋgəla wəɗɗaŋ di? Ɗəffəŋ ɗəf na Romayi!

²⁷Yaŋ daya net sozeɗ ambat aza Pol, assohoni: Anah suɗa, ɗəf na Roma kənan gesiŋ sa? Pol azlan sənəka: Vaski ɗəf na Roma nani.

²⁸Daya nak anah sənəka: Naw də deleɗ diiɗa nərah wəkpaŋ ɗəf na Roma. Pol azlan sənəka: Amma naw səza uwa naw məwəw ɗəf na Roma.

²⁹Gu'ləŋ sozeɗ məs dədaŋglaŋ wəvərən vi dəpel gən goŋga nek apanənka. Daya net bo ageslneke, vi asənək na Pol ɗəf na Romayi. Yas bo aɓrukuk dit ngiyamɗe.

³⁰Daya net sozeɗ manaka sənən kpak gesiŋ na Yahudiyenɗe awəliyən Pol na aka mi di. Vi wənnani, vit pumpum nani apəl ngiyamɗe səza Pol, anahsit ɗii gugiriɗ net məs dəlveŋge dit ɗii gugiriɗ net Yahudiyenɗe dəkkalaŋ genni, yas kan aki Pol aziw gən abeti.