Read Gidar Wəza net Masləŋɗe 23 Bible Online

Wəza net Masləŋɗe 23 - Gidar bible

Wəza net Masləŋɗe 23

¹Pol aziyək haran aket ɗii gugiriɗ neki, apsit na: Milmiŋgiɗwa naw əntatəpprəm ma Maŋgəlva məza də mambray ɓa daga wətəŋ nani ha dəpaŋka.

²Daya net məs dəlveŋge məs adawyaŋ na Ananiyas apsitik tive sit ɗii məs də ziweŋ amaŋgava Pol dəvərən gən aza mani.

³Pol apsən na: Gesiŋ Maŋgəlva wavərko is zlava na dələv məgəɗ sən ɗama! Istatə sok kawtaw kita akawa va ma henziŋ, amma adan kəpsit tive sit ɗii navərwa, as bo an ma henziŋ anahi ɓa.

⁴Ɗii na maŋgavan apsənən na: Yaŋ kədawran daya net məs dəlveŋge an məs Maŋgəlva aɗiyə.

⁵Pol azlanəka: Milmiŋgəɗwa naw nəsən na daya net məs dəlveŋgeyi ɓa. Vi ɗerewel na Maŋgəlva anahək na: Kədawpel mbrayen aka daya net ɗii nokum ɓa.

⁶Adan Pol asinik ɗii meɓɓet səmbet na Sadusiyenɗeŋ, Farisiyenɗeŋ, apel sitik ɗii gugiriɗ net də sembe: Milmiŋgiɗwa, naw bo Farisiyen nani, wətən Farisiyenni, məwəliyu aŋ na, vi nədawnah na ɗii mimtit wasilyoŋ sətəki əmta də zəŋgilleti.

⁷Adan anah vaska, Farisiyenɗe* dit Sadusiyenɗe atəŋgaŋgək wəbayaŋ ma awalaŋ ziti, awɗakaŋgək sula.

⁸Vi net Sadusiyenɗe tahəŋ wənahaŋ na wəsilyo tay sətəki əmta ɓa. Maslayɗe tahəŋ ɓa, əmpəs tay ɓa, tuya tay ɓa pakə. Amma Farisiyenɗe net tahəŋ wənəhaŋ na zəgas pak tay.

⁹Geŋgere adayək kiyən an laŋka, ɗii meɓɓet suweleŋgit məsənaŋ zəga na ma henziŋ ndəɗaŋgəŋ Farisiyenɗe, asilyoŋguk də gagay aɓɗaŋ na: Mərah mambray aza ɗəffəŋ ko taka ɓa, kuzuŋ gesiŋgi maslay walla Əmpəs apel sənəka.

¹⁰Wəbay ma nan asilik də sembe, ha daya net sozeɗ ageslneke azana wapuwenən Pol. Vini apsit tive sit sozeɗ nan dədoŋ gən aweleŋgit ɗii də mohən gən Pol dəgil gənən sə waleŋgit ɗiiyi, amoh nənka, akanənək eŋgil anet sozeɗ da.

¹¹Dəfəɗ nani, Ɗəfdaya arbanək zən aza Pol, apsən na: Kədaw geslne ɓa, kərbanək wənnaw aŋka a Zerusalem, say kərban gən wənnaw əmpa a Roma.

¹²Vit pumpum nani, Yahudiyenɗe meɓɓet akkalaŋka vi kawsler meti. Asuwayaŋka azəmaŋ na way ɓa, asaŋ na zəga ɓa, say an abayənək Pol.

¹³Ɗii məs dəkkalaŋ dəslereŋ vet bo, waɗɗaŋ ɗii dayki kaklaw poɗo.

¹⁴Adoŋguk azet ɗii gugiriɗ net məs dəlveŋge dit ɗii gugiriɗ net Yahudiyenɗe, apsitin na: Məsuwayka məzəm na zəga ɓa, say an məbayək Pol.

¹⁵Kakaŋ na, say munokum dit ɗii gugiriɗ net Yahudiyenɗe, say məsləŋ aza daya net sozeɗ kana, dəki gən Pol azokum, mənah na məŋgəl kapprəm wənna man əmpa. Amma nam kan waməbay daga dəɓəl wəgap azokum ɓa.

¹⁶Amma wətət məlmən Pol apprəmək wənna wəsuway neti, ambatək eŋgil anet sozeɗ da, anah sənək wənnan sən Pol.

¹⁷Yaŋ Pol aya ɗəf metiŋ taka səmbet ɗii gugiriɗ net sozeɗi, apsən na: Aka gawlaŋ aza daya nokum, wən tay adawnah səni.

¹⁸Akak aza daya neti, apsən na: Pol ɗəf na daŋgay dəyuwa, apsu na nəki gən gawlaŋ azoko, wən tay adaŋgla wənah suko.

¹⁹Daya nak armak vani, ambataŋgək eŋgil dəndən sula sula, assohonəka, mikədaŋgla wənah su di?

²⁰Azlan sənəka amna: Yahudiyenɗe aslerinik meti kassohokun pumpum, kəka gən Pol sit ɗii gugiriɗ net Yahudiyenɗe, wanəhaŋ na: Məŋgəl wəpprəm wənnan əmpa.

²¹Amma kədawtaf wənnet ɓa, vi ɗii tahəŋ dayki kaklaw poɗo, dəsuwayaŋ azəmaŋ na zəga ɓa, asaŋ na zəga ɓa, say an abayənək Pol, wavənaŋ sənən aka tive wəgani aɗumoŋguk kaɗɗan vaska. Tahəŋ wəganən an məs kədawzlan siti.

²²Daya net sozeɗ apsən na: Kədawnah sən ɗəf əmpa ɓa, wən məs kənah suwəŋ ɓa, yas alhani.

²³Yaŋ daya net sozeɗ ayə ɗii gugiriɗ meɓɓet sula, apsit na: Məyə sozeɗ səkat sula, məs də pəlseŋge kaklaw buhul, məs dit təlhoŋge bo səkat sula, də zaɓanən gən zit nambat a Kaysariya də təbəs vaytak na dəfɗa.

²⁴Məzaɓan pələs naw peŋ gən Pol, kəkan gən zam aza Felikus governer.

²⁵Yas kan aver ɗerewel vas kana:

²⁶Kalawdiyus Lisiyas aza Felikus governer ɗəf metiŋ, nəsɗokuko.

²⁷Ɗəffəŋka, Yahudiyenɗe dərmanəni, metaka bayəni. Adan nəpprəm na ɗəf na Romayi na, nəmbatək dit sozeɗi, nəkoh gənəka.

²⁸Nəŋgəl kawsən wənnan na vi mi awəlinən di, ndəni nəka abet ɗii gugiriɗ neti.

²⁹Nulak bo dəgəɗ mambray gala nawkan a daŋgay ɓa, walla nawbayən ɓa. Aka wənna ma henziŋ net kaaka awələyini.

³⁰Yaŋ nəpprəm wənnan na, Yahudiyenɗe asuwayaŋka say an abayənka, ndəni nəslən dəkanən gən azoko. Nənah sitik ɗii məs də wəliyən də wəliyən gən azoko.

³¹Yas sozeɗ agəmən Pol va daya net anahsiti, akkanənək ana Antipatris da dəfəɗ nani.

³²Vit pumpum nani, sozeɗ məs dəzoŋ də tilit amndoŋguk eŋgili, amma məs dəzoŋ də pəlseŋge pak tahəŋ wəkanən Pol abe.

³³Akkanənək a Kaysariya, apsənənək ɗerewel sən governer, apanənək Pol avani.

³⁴Governer aŋɗanək ɗerewel naka, assohonək Pol, aka dələv naŋga kənan di. Adan arəh wənnan na, ɗəf na Silikiyayi.

³⁵Amna: Wanəpprəm wən noko, an ɗii də wəlikun azoŋko. Yaŋ apsit tive sit sozeɗ dəganən gən Pol adəv gəla na məlĩ məs Herodə arkə.