Read Gidar Wəza net Masləŋɗe 24 Bible Online

Wəza net Masləŋɗe 24 - Gidar bible

Wəza net Masləŋɗe 24

¹Wəvoŋ sle dərɓagan ləŋgə, Ananiyas daya net məs dəlveŋge agapək a Kaysariya, adek dit ɗii gugiriɗ meɓɓeti, gəm Tertullus məs dəsən kita na dawka net ɗii na Roma. Yaskan agapaŋ aba governer Felikus, awəliyən Pol.

²Adan ayanəni, Tertullus atəŋgək uwəliyən: Aw Felikus ɗəf metiŋ, vi wənna gakdak noki məsam zamə, dələv nam pak mogoni vi wəsən noko.

³As pak səzok mərəha, məgəɗ sukuk soko sawɓa.

⁴Nəgap nawpel suk kpotok kpotok ɓa, amma nəkomokuko də ula saha noko, əŋga apprəm səm wənnan suɗike ɗa.

⁵Mulak na ɗəffəŋ ɗəf mbrayni sawɓa, tay sil gən wənnaw ɓoŋgit ɗii aweleŋgit Yahudiyenɗe də mamba dələv pakə. Ndeni məlĩ net ɗii məɓoŋgit na Nazaret.

⁶Yas bo atəŋ kawray gən gəla metiŋ naw zuliya*, yaŋ kan mərma. [Məŋgəl kətana kawtaw kita akan va ma henziŋ namə.

⁷Amma yas Lisiyas daya net sozeɗ ade mohən səvam də sembe.

⁸Yas kan Lisiyas van apsit tive sit ɗii məs dəwəliyən dəzoŋ gən aboko.] An kəməsək wəssohon na, wakəsən na, an məs məwəliyən akan na gesiŋgi.

⁹Yahudiyenɗe pak aɓɗaŋ na: An məs Tertullus anahəs pak gesiŋgi.

¹⁰Governer apsənək tive sən Pol dəpel gəni. Yaŋ Pol amna: Nəsənka wəsva diiɗa istatə taw kita naka dəlvəŋka, ndəni zu annek narban wənnaw aboko.

¹¹Dədayiki wəvoŋ klaw kiyən sula nəmbat a Zerusalem vi kawzuli sən Maŋgəlva ɓa, an kəssohonək wənnan na wakərəh vaska.

¹²Ɗəf tay dərəhu ɗaah adəv gəla metiŋ na zuli wəbay ma ɓa, walla məzu ɓoŋgit ɗii adivit gəleɗe nawpel wənnet ɓa, walla awalaŋ gəla net ɓa.

¹³Ɗəf tay səmbet naw ɓap wəkpaŋgan wən məwəliyu akan ka goŋga ɓa.

¹⁴Amma apprəm an məs nədawnah sukkana: Intatə zuli sən Maŋgəlva net dəhiŋgiɗwa, də wəsban wənnan məs adawnahaŋ na: Wəɓoŋgit ɗiiyi. Amma naw bo əntatəsban ma henziŋ na Moyis də ɗerewel net məs kleŋɗe pakə.

¹⁵Naw bo nətafək gesiŋ Maŋgəlva wasil git ɗii mogeti dit ɗii mbreyit pak sətəki əmta, va net bo atafən wənnani.

¹⁶Ndəni naw bo nədawgay nəsaw gən təstəs aba Maŋgəlva də abet ɗii pakə.

¹⁷Dərɓaga wəbal naw a Zerusalem wəsva suɗike, nəmilik adaka dawke deleɗ na baah sit ɗii naw məs məbaahsiti, nəgəɗ gən sazlaga aba Maŋgəlva.

¹⁸Daga nədaɗɗani, arəh wənka adəv gəla metiŋ naw zuliya, arəh wənək bo dərɓaga nəgrak wənna wəskoɓ ki zuwa, ɗii tahəŋ ɓa, geŋgere bo tay ɓa.

¹⁹Amma Yahudiyenɗe meɓɓet daga səka dələv na Asiya tahəŋ adaka. Net bo wazoŋ aboko, an tahəŋ də wənna wəliwa.

²⁰Walla ɗii vetiŋ annəhənək mambray mi nəgəɗ gala akuwən abet ɗii gugiriɗ pay akkalaŋgəŋ kandi!

²¹Vi wən takayi məs nənah daga məku abeti, nənahək na: Kətawən kita akaw na vi nətaf wənna wəsilyo sətəki əmta sa?

²²Yaŋ Felikus bo asənək tive net kretiyenɗe, apsit na: An Lisiyas daya net sozeɗ adek na, wamətaw kita nani, yas kan anah na mətrayə.

²³Aɗiyək wənnan sən daya məs dədawga Pol də ga gən lewlewi, amma adawzəm gənən saha ɓa, dəppetin gin bayneŋgiɗin bo dəzoŋ gən azani də wəbaah səni.

²⁴Dərɓagan pay suɗike ləŋgə, Felikus adek dət ɗak nan Durusilla, nat Yahudiyenəktə. Ayak Pol vi kapprəm məs adawpel aka wənna wətaf Zezu Krestu.

²⁵Amma adan Pol atəŋ wəpel aka wəɗɗa mogoni də wərma zuk səza mambraya, də wənna kita pay wəgrak dəlva, geslne adak Felikus, amna: Kakaŋ na məkki kana. An nərahək va na wanəyuk əmpa.

²⁶Azana Pol wapsən deleɗi ndəni adawyan ɗayɗayə, kasga meŋ.

²⁷Səza wəsva sula atoŋgu, Porkiyus Festus adəɗək Felikus. Amma vi Felikus aŋgəl wənneken zit Yahudiyenɗe vini dəppan Pol sə daŋgay ɓa.