Read Gidar Wəza net Masləŋɗe 26 Bible Online

Wəza net Masləŋɗe 26 - Gidar bible

Wəza net Masləŋɗe 26

¹Agrippa apsən Pol na: An mokaka pel wənnok na apele. Pol aslanək van a disiŋ, atəŋgək wəpel ana makran tamə, amna:

²Aw məlĩ Agrippa zu anekək nawpel wənnaw abok dəpaŋka, aka wən məs Yahudiyenɗe awliwən pakə.

³Vi noko kəsənək matuya net Yahudiyenɗe də wən məs adawpeleŋ akan pakə. Vi ni nəkkomoko kəpprəm suwə gən an nədaŋgla wəpeliŋ ɗa.

⁴Yahudiyenɗe pak asənənək wənnaw daga səka muzliya nawa, asənənək va nəsaw aweleŋgit ɗii naw a Zerusalem.

⁵Asənənək wənnaw daga farə, waɗɗaŋ saydawa akaw an aŋglaŋka. Farisiyen nani, nəsbanək wənna Maŋgəlva an də tattuwãha.

⁶Kakaŋ bo aka kita nan nani, vi nədaw ga wən minan məs Maŋgəlva aynan sit dəhiŋgiɗmə.

⁷Ma əlfa nam klaw kiyən sula tay ga wən məs minanəŋka, vini adaw zuliyaŋ sənən Maŋgəlva dəfəɗ də kapaya. Vi wən məs adaw gaŋgəŋki Yahudiyenɗe awəliwəni.

⁸Munokum Yahudiyenɗe, vi mi kawtafən na Maŋgəlva wasil git ɗii mimtiti ɓa di?

⁹In sən kiyu bo nəgayək wəray gən wənna Zezu ɗəf na Nazaret də tive temtemi.

¹⁰As pak a Zerusalem nəɗɗa wənnani. Ɗii gugiriɗ net məs dəlveŋge apsuwənək tive nesget ɗii na Maŋgəlva diiɗa a daŋgay. Yaŋ atawən kita namta aketi, nətafək wənnani bo.

¹¹Ɗayɗay nədawzəm git saha adəv gəla na zuli pakə, nəgəɗsitik dewle dəppanən gən wən məs atafaŋgəŋka. Nədan sitik gidivit sawɓa, ha nəmbatək aka dələv maɓɓan nəzəm gitik saha adaka.

¹²Vi wənnani nəmbat a Damas, nərah tive nan səzet ɗii gugiriɗ net məs dəlveŋge, ndəɗaŋ dəslənwəni.

¹³Yas kan əntat aka tive tətaŋ paya, yas ləŋ nula təki babar daykiyən na paya, sə disiŋ ade, yaŋ akekeɓewa dit ɗii məs nədawmbat dənɗaŋ pakə.

¹⁴Mənam pak məsbərək afuŋ. Yaŋ nəpprəm wəlla ɗəf wəpel su də ma Yahudiyen: Sol, Sol, vimi kədaw kayan mamaw vaŋ di? Istatə bay zuk va wazli məzəslkər zleŋge na affəni.

¹⁵Nəssohonəka: Nawa kənan di Ɗəfdaya? Ɗəfdaya amna: Əntə Zezu məs kədaw kayan mawa.

¹⁶Amma asil ziwi. Nərban zu azok na nəwelkuk kəsok gən gawla nawa. Say kənah siti gin ɗii na kuluwək dəpaŋka, an məs nərban sukuŋ bo kənah siti gini.

¹⁷Wanəkoh guk səvet Israyelɗe dit ɗii məza Israyelɗeŋ ɓa, məs nəslənuk azeti.

¹⁸Vi kəkol sitigin hereti, kəgilgitigin səra guzliyo kəke gin ara təki babara, kəkohgitigin sədəv sembe na Satan, dətoŋgoŋ gən adəv sembe na Maŋgəlva, də wətaf neti, vi dərəhaŋ gən tive naviyan mambray neti, dətoŋgoŋ gən atəki neti aweleŋgit ɗii məs Maŋgəlva aweli də wətafwa.

¹⁹Vi vaski məlĩ Agrippa, nəɓap na kapan hənhən məs Maŋgəlva arban su daga sə disiŋgiŋ ɓa.

²⁰A Damas si nətəŋ wərban wən dabəŋ gəm a Zerusalem, səbəɓərən kana aka dələv net Yahudiyenɗe pakə, də azet ɗii məza Yahudiyenɗeŋ ɓa. Nərban sitik wənnani də wəssohet də tubiyaŋ gəni vi mambray neti, də kpaŋgaŋ gən aza Maŋgəlva, dəɗɗaŋ gən wəza məs narban na atubiyaŋka.

²¹Vini kan Yahudiyenɗe arməwən sədəv gəla metiŋ naw zuliya*, aŋglaŋ wəbay wəni.

²²Amma dəpaŋka, adan Maŋgəlva abaah suwəka, nəziwik karban goŋga abet ɗii pakə daga ɗii gugiriɗe ha gap azet kirni. Nənah wən maɓɓan ɓa, say an məs Moyis dit məs kleŋɗe anahaŋ na wagəɗə. Aɓɗaŋ na:

²³Messiya* wasə bonoy, ndəni dədaw silyan dabəŋ sətəki əmta, vi karban təki babar nawkoh sit Yahudiyenɗe dit ɗii məza Yahudiyenɗeŋ ɓa pakə.

²⁴Adan Pol adawpel wənna koh gən zəni, yaŋ Festus anah sən Pol də wəlan dayadaya na: Pol dərwa kənani, wəsən zəga nokuŋ diiɗaŋ azanək maɗuloko!

²⁵Pol azlan sənək na: Dərwa nan ɓa, məlĩya! Wən an gesiŋ nədawpele, gala nataf net ɗii məs nədawpel sit pakə.

²⁶Məlĩ Agrippa geslne aduwna dawpel suk ɓa, vi kəsənək wənnamə, wənnəs pak zəga tay dəɗam azok kpeeh ɓa. Vi wənnan tay də məɗama ɓa.

²⁷Məlĩ Agrippa kətafək wənnet məs kleŋɗe sa? Nəsənka kətafəka.

²⁸Agrippa amna: Pol gu'ləŋ kəɗiyu vas ləŋ ka kretiyen?

²⁹Pol azlanək na: Ko gu'ləŋgə, ko məza gu'ləŋ ɓa, əntatə kaman Maŋgəlva isi dit ɗii məzapprəmən pak kəsoŋ gən va ina, amma məza mə daŋgayɗe ɓa.

³⁰Yaŋ məlĩ Agrippa də governer Festus dət Bernike, dit ɗii məs dəsoŋ adak pak asilyoŋ.

³¹Yaŋ adadoŋ, yaŋ kan adawnahaŋ na: Ɗəf ndaka dəgəɗ mbrayen gala nawbayən walla nawtoŋ gən a daŋgay ɓa.

³²Yaŋ Agrippa anah sən Festus na: Vi aŋgəl kita nan dəgəɗ gən aba məlĩ na Roma ɓana waməppani.