Read Gidar Wəza net Masləŋɗe 27 Bible Online

Wəza net Masləŋɗe 27 - Gidar bible

Wəza net Masləŋɗe 27

¹Azaɓanənək wənnan məmbat gən a Italiya də bəlay, apanənək Pol dit mədaŋgayɗe meɓɓet ava Zuliyus daya net sozeɗ na Roma məs adawyaŋ na ngaɓa net sozeɗ na məlĩ na Roma.

²Məguluk adəv bəlay məs dəde sə Adaramittiya məs dədadan malaka kəla ma busgum net bəlayɗe naka dələv na Asiya. Məmbatka, Aristarkus ɗəf na Makedoniya dəde sə Tesalonika tay də mənamə.

³Vit pumpum nani, məgap a Sidon, Zuliyus bo tayula saha aka Pol apanək dəmbat gən anet bayneŋgiɗin da, vi dəpsənən gən zəga an natər sən wəraya.

⁴Yaŋ məsil sədaka, məkpaŋgək dəka mətuwəra na Kiprus kəla təki məza səmnya tay ɓa, vi təki maɓɓan na mənam tatəlma dit vemvilli.

⁵Məgarək ki məlpa na maŋgava Silikiya də Pamfiliya, məgappək a walaŋ gəla na Mira dələv na Lisiya.

⁶Adaki daya net sozeɗ arəh bəlay məs dəde sə Aleksandiriya, məzu mbat malaka a Italiya. Yaŋ aguloŋ annan kana.

⁷Wəvoŋ diiɗa məgəɗ də wəmbat teletele, saha saha məgap a Kinidus. Yas vemvil atak mən dawmbat abe, məkpaŋgək, kla Kereta kla təki məza vemvil tahəŋ ɓa, mətoŋguk kla təki məs adawyaŋ na Salmoni.

⁸Məkpaŋgək kla mabusgum də tattuwãha, məgap atəki məs adawyaŋ na təki naw ziw net bəlayɗe mogoni, tay faraɗa də walaŋ gəla na Laseya ɓa.

⁹Məvoŋguk adak ha wəzləra naviyan mambray toŋ akam adaka. Dəpas bo wəmbat də bəlay tattuwãhaɓɓa, vi wənnet barkataŋɗe tuwãhi diiɗa sawɓa, vini Pol anah na:

¹⁰Haaya malaka nan wasan tuwãhə bəlay də zəga pak warayə. Say ndəni kaaka ɓa, ko mənam bo məkoh na ɓa.

¹¹Amma daya net sozeɗ dətaf wənnan ɓa say wənna məŋkor bəlay də affən bəlay ataf dayki an məs Pol anahə.

¹²Vi təki naw ziw net bəlayɗe nan mogoni wəsuwa adak mawala ɓa. Ndəni kan ɗii vadaysa aŋglaŋ wəmbataŋ, a Fenika kasva adaka, va wagəɗə. Fenika təki naw ziw net bəlayɗe aka mətuwəra na Kereta haran seek dəka tapaslay na disiŋ na dohoŋ, də tapaslay na mba pay na moskoy na dohoŋ.

¹³Yaŋ barkataŋ atəŋgaŋ wəndaŋ sə dohoŋ, azet na arəhaŋgək məs aŋglaŋ, vini aptuwən zəga na kpa' bəlay, yaŋ apeŋgeŋ kla mabusgum na Kereta.

¹⁴Dəliɓa sam, barkataŋ məs adawyaŋ na barkataŋ na tapaslay na disiŋ namba pay nam pum adek səka gərəm na mətuwəra.

¹⁵Barkataŋ agəmənək bəlay, bəlay dəɓap wədan haran akan seek ɓa, məpetik barkataŋ tahəŋ wəkanən bəlay.

¹⁶Adan mətoŋ kla dohoŋ na mətuwəra məs adawyaŋ na Kawda, məfetik vi barkataŋ suɗike. Adaki minat bəlayək muzliyak də bonoy vi tədabəta kawza.

¹⁷Aslatənək bəlayək muzliyak nakə aynatənək a disiŋ aka an metiŋgin də helege. Geslne adeke vi adawgək ara hoyoŋko na ma busgum na Libiya. Vini apprik gənən gabaga məs dədawka belay vani, yaŋ apanən bəlay səmnya dəka gəni.

¹⁸Yas barkataŋ net adaɗɗaŋ vaska'ani, vit pumpum nani, atəŋgənək wəsgan zəga sədəv bəlay.

¹⁹Vit zaya nan əmpa ni, asganənək helege də gabaga məs dədawka bəlay dit wəleŋɗe na bəlay asgetinik dəvet aret iŋkile.

²⁰Wəvoŋ diiɗa mawla ngərzleɗ ɓa mawla pay ɓa, vi səmnya tay wəɓla, diiɗa azam na waməmti kana.

²¹Avunoŋguk sawɓa awzəmaŋ zəga ɓa, yaŋ Pol aziw abeti, apsit na: Haaya: Ɗəɗaah va kətafənək an məs nənah sukum na kədawsilyoŋ sə Kereta ɓaŋka. Va kəŋgereŋgək na kəta waməkoh səma zəga nadərwa dədaŋgla wəzaməŋka.

²²Amma kakaŋ nəkkamokumko məsok makrokum, ɗəf tay dədawza ko taka ɓa, say bəlay dədawray kaaka'ə.

²³Vi nadəfɗəŋ na, Ɗəfdaya Maŋgəlva məs nədawzuli sənəŋ aslənək maslay nan azawa.

²⁴Apsu na: Pol geslne adawduk ɓa, wakə ziw aba məlĩ na Roma gesiŋ, Maŋgəlva də mbəlembəle apsukuk zeŋgillet ɗii nadəv bəlay pak avoko.

²⁵Vini kana haaya kədaw geslne'eŋ ɓa, naw nəsənək Maŋgəlva nawa, wagəɗ va anah suwa.

²⁶Amma barkataŋ net wakəmən ha aza mətuwəra maɓɓani.

²⁷Wəvoŋ klaw kiyən poɗo barkataŋ adawkəmən adəv Pe'e na Mediterraniya. Tətaŋ dəfɗa, aza ɗəf məs dədaŋkoron na agapək aket iŋkile məza tahəŋ kpum ɓa.

²⁸Yaŋ aprik gənən helege məs mətok təbəs aman nawsla kpukpum net iŋkile. Yaŋ awlanən kpukpum net tay metər kaklaw hoku kiyən buhul. Yaŋ asganən abe suɗike əmpa, metər kaklaw sula kiyən dədopoɗo.

²⁹Ageslne'eŋke vi barkataŋ adawka bəlay aka milɓe ɓa, vini aprikgitin təbəsɗe naynan poɗo, dərɓaga bəlay, aɗɗanənka asoŋguk wəga təki wəddaŋga.

³⁰Məzəŋ koronən bəlay aŋglaŋ wəgilyoŋ sədəvən kawmbataŋ. Aprik gətənək bəlayək muzliyək aret iŋkile, aɗɗaŋgək va əprik git təbəsɗe meɓɓet poɗo, kampet aba bəlay.

³¹Amma Pol apsit sozeɗ dit dayeɗe net na: An məzəŋ koronən dəsoŋ adəvən ɓana wakəzaŋ.

³²Yaŋ sozeɗ atawən məs dərəmət bəlayək muzliyəkə, asgatənək aret iŋkile.

³³Adan təki go'oy aza wədaŋga, Pol akkemetike dəzəmaŋ gəni, apsit na: Kəsəŋgənək pay klaw kiyən poɗo kəzəmaŋ ko mi ɓa, munokum tatə ganənni.

³⁴Say məzəm suɗike, an kəŋglaŋgək wəkoho. Amma ko muhur kikum taka, azəna ɓa.

³⁵Səza anah vaska, agəmək waya aɗɗak soko sən Maŋgəlva karet ɗii pakə, awɗakanəka yaŋ atəŋgaŋ kawzəmaŋ.

³⁶Yas kan ndəɗaŋ pak maɗulet aziwke, azəmaŋka.

³⁷Wəŋɗa net ɗii nadəv bəlay van bo tahəŋ səkat sula də kaklaw buhul kiyit slire (276).

³⁸Adan abaŋ, asganənək hay alkəmari aret iŋkile vi adaw gakdakan bəlay ɓa.

³⁹Adan təki adaŋgə, məzəŋ koronən bəlay dəsənən təki məs asoŋ ɓa, amma awlanənək hoyoŋko abeti, atəki məs iŋkile ambataŋ aka mətuwəra. Yaŋ adaŋglaŋ wəka bəlay adaka dəgək gən adaka va wagəɗə.

⁴⁰Vini kan atawən helege na təbəsɗe na bəlay apanən aret iŋkile, yas ləŋ apələn helege məs dədaynet wəleŋɗe naŋ koroni, yaŋ asil gənən gabaga abani, vi səmnya dəka gən aka mətuwəra.

⁴¹Amma bəlay agapək atəki net iŋkile məs tahəŋ kpum ɓa, aziwik adaka, ma həŋkənən aguluk amba hoyoŋko, aɓla ɓa sam. Yaŋ vovolumɗe akkrapən koforən.

⁴²Sozeɗ aɗumoŋguk nawbay mədaŋgayɗe, vi adagaraŋ kanzuwaŋ ɓa.

⁴³Amma adan daya net sozeɗ aŋgəl Pol dəkoh gəni, atekike adaɗɗaŋ an məs aɗumoŋ ɓa. Apsitik tive sit ɗii məs dəsənaŋ guzlo dəzlahaŋ gən aret iŋkile dəgaraŋ gən dabəŋ ama busgum.

⁴⁴Ɗii məs dəppaŋ bo dərmanən gən vet azet wəleŋɗe məs dənzlaŋ na bəlay vani. Vaski mənam pak məgarə ha gap ama busgum zamə.