Read Gidar Wəza net Masləŋɗe 28 Bible Online

Wəza net Masləŋɗe 28 - Gidar bible

Wəza net Masləŋɗe 28

¹Yaŋ məgap aka mətuwəra zamə, məpprəmək iya na mətuwəra nan na Malta.

²Ɗii nadak bo, ataf mənək eŋgil anet da mogon sawɓa. Yaŋ buwən bo atəŋgək wəziya, səmnya bo tayda sawɓa, armanənək offo, aɗimən amani.

³Pol andek seseme kawziyit aka offo, yaŋ təki kakaah na offo agil gən doho sədəvət seseme neki, yaŋ ahar Pol.

⁴Adan ɗii diiɗa adawlanən doho aktəm aka va Pol, aɓɗaŋ na: Wəbay ma tay ɓa sam ɗəffəŋ məs garzlaw məbay ɗiiyi. Vi akoh sə məlpa zlaŋ maŋgəlvak nam məs adawyaŋ na təstəssə təppan dəsan gən madaran ɓa.

⁵Amma yaŋ Pol asgan doho aka offo. Dəssan ko suɗike ɓa.

⁶Azet na van wanslə walla wamtə gu'u. Amma adan anziyaŋ dulanən an məs dəgəɗ azan ɓa, aɗumoŋguk maɓɓan əmpa, aɓɗaŋ na: Mbarakana maŋgəlvaki!

⁷Guli na Publiyus ɗəf metiŋ na mətuwəra van tay faraɗa də təki nan ɓa. Azəm gəmək sawɓa, məsamək ananda wəvoŋ hoku.

⁸Affən Publiyus tay də gbəgba' na gamba gəm gədəviya, Pol ambatək azani azulika, aɗiyək van akani, ambəlka.

⁹Dərɓaga ambəl gən ɗəffəska, məs gbəgbaɗe na mətuwəra pak azoŋguk aza Pol, ambəlgitike.

¹⁰Aɗɗaŋ səmənək gakdak də tive temtem diiɗa. Adan mədawtoŋ adəv bəlay vi kawmbata, apsəmənək zəga məs wəray nam azan aka tive na malaka pakə.

¹¹Dərɓaga təla hoku agəɗə məmbatək də bəlay məs dəde sə Aleksandiriya, məs adawyaŋ na maŋgəlveɗ meseŋɗe. Ndəni məs dəzəv aka mətuwəra nani.

¹²Məgapək awalaŋ gəla na Sirakus, məsamək adak wəvoŋ hoku.

¹³Məsilik sədaka məgapək awalaŋ gəla na Regiyus. Vit pumpum nani, səmnya na dohoŋ atəŋgək wəɓla. Pay sula agəɗə, ndəni məgap atəki na prike net bəlayɗe a Potiyoli.

¹⁴Mərahək ɗii na Maŋgəlva adaka, assohomənək məgəɗ gən walaŋ lumo taka anetda. Vaski məgap a Roma.

¹⁵Adan milmiŋgiɗəm na Roma apprəmən labara nam na, azoŋguk a Lumo-na-Appiyus gəm Atəki-Naw-Ziw-Hoku. Vi kalmaŋ də mənamə. Adan Pol awle, agəɗək soko sən Maŋgəlva makran bo anneke.

¹⁶Adan məgap a Roma, apsənənək tive sən Pol dəsan gən adəv gəla nani, amma sozeɗ bo dəganən gəni.

¹⁷Yaŋ agəɗ pay hoku ni, Pol ayek ɗii gugiriɗ net Yahudiyenɗe na Roma, akkalaŋka, yaŋ apsit na: Milmiŋgiɗwa, nəgəɗ sit mbrayen sit ɗii nam ɓa, walla aka matuya net ɓa, amma arəmwənək sə Zerusalem, apsuwənək sit ɗii na Roma.

¹⁸Net bo assohowənka, mi nəgəɗ di, yaŋ aŋglaŋ wəppawəni vi awlanənək na nəgəɗ mbrayen ko suɗike gala nawbayu akan ɓa.

¹⁹Amma adan Yahudiyenɗe dəŋglaŋ dəppawən gən ɓa, yaŋ nula wənnan na dewleyi azaw nəŋgəl gən kita naw aza məlĩ na Roma. Vi ko əntat də wənna wəli ɗii naw ɓa.

²⁰Vini nəyukum, vi kawlukum, kawpel sukum bo. Aka wənna ɗəf məs Israyelɗe agaŋ, ndəni aynawən dit ngiyamɗe aka wənnani.

²¹Apsənən na: Mərah ɗerewel sə Zude aka wən nok ɓa, ɗəf nam tay dəde sədak aŋ nawnah səm məs dəgəɗ akok ɓa.

²²Amma mamaka wəpprəm an kədaɗum sən ɗa, vi ko aŋga pak tahəŋ wəzelenən wənnet ɗii məs kəsok aretiŋki.

²³Yaŋ aɗiyən pay məs adakkalaŋ əmpa. Yaŋ kan pay nan agapə, ɗii məs dəkkalaŋ atəki məs Pol asani, adayək ki laŋka də diiɗa net ɗiiyi. Pol asɓətək aka wəpprəman sit gabba wənnani, də wərban sit wənna məlĩ na Maŋgəlva. Agayək də wərban sit goŋga na wənna Zezu də wəpprəmansit wənna dəv ɗerewel na ma henziŋ də wənnet məs kleŋɗe.

²⁴Ɗii meɓɓet atafənək an Pol adawpele, amma ɗii meɓɓet dətafən wənnan ɓa.

²⁵Yaŋ daga ada tərayaŋ, tahəŋ wəbayaŋ ma awalaŋ ziti daga dəɓəlaŋ wətərayaŋ tagay ɓa. Yaŋ Pol anah sit wən taka: An məs Əmpəs Salala anah sit dəhiŋgiɗkum də ma məs kleŋ Ezay agəɗək gesiŋ kakaŋka.

²⁶Maŋgəlva amna: Doku nah sit ɗii naw na: Wakəpprəmən lewlewi amma kəsənən na gabban ɓa. Wakulanən lewlewi, amma kəsəŋgəna ɓa.

²⁷Ɗiiyiŋki kiyit ɓəlli, asukunək sləmeti, aɗəpunək hereti, va vas ɓana heret wawələ, sləmet wapprəmə, makret wasən gabbani wakpaŋgaŋ azawa, wanəmbəl giti vaski Maŋgəlva anahə.

²⁸Yaŋ Pol anah əmpa na: Say kəsənən gən na Maŋgəlva aslənək labara na koh nan azet ɗii məza Yahudiyenɗeŋ ɓa. Net na wapprəməni!

²⁹[Səza abay ma wəpel nani, Yahudiyenɗe ambataŋka, tahəŋ wəbayaŋ ma awalaŋ zit də sembe aka wənnani.]

³⁰Wəsva sula Pol asan adəv gəla nawfaɗ akani. Tay taf ɗiiyen dədazoŋ azan pakə.

³¹Arbanək wənna məlĩ na Maŋgəlva, arbanək wənna Zezu Ɗəfdaya, apelik də zən soksoku, ɗəf tay dədatakən ɓa.