Read Gidar Wəza net Masləŋɗe 3 Bible Online

Wəza net Masləŋɗe 3 - Gidar bible

Wəza net Masləŋɗe 3

¹Pay maɓɓani Piyer də Zaŋ tay toŋgoŋ adəv gəla metiŋ naw zuliya*, də moskoyo də təbəs hoku, pay naw zuliya.

²Gu'o də madamba məs adawyaŋ na madamba mogoni, ɗəf taya daka vədalli daga muwani. Də mompum pak ɗii nan tahəŋ wəslanəni, wəkiyən a madamba naka, vi dəŋgəl gən sazlaga avet ɗii məzu toŋgoŋ adəv gəla metiŋ naw zuliya.

³Yaŋ awle maay Piyer də Zaŋ adawtoŋgoŋ, aŋgələk sazlaga aveti.

⁴Piyer də Zaŋ aziyənək heret akani, Piyer apsən na: Awlum ɗa.

⁵Vədal awlek lewlewi, azanna wapsənən zəga.

⁶Piyer apsəna: Seede tahəŋ avam ɓa sam, amma wampsuk zəga ana vamə: Də sembe na Zezu Krestu məs na Nazaret, əntatə nah suko: Asili adawə.

⁷Yaŋ Piyer arma van dəzəŋ, adawsil gəni, go'ləŋ tələn arahək sembe.

⁸Azla gənək zəni, aziwke, atəŋgək wədawa, yaŋ atoŋ dənɗaŋ adəv gəla metiŋ naw zuliya, tay dawa, tay gakdakan Maŋgəlva.

⁹Ɗii pak awlanənka, tay dawa tay gakdakan Maŋgəlva.

¹⁰Net bo asənənək na vədal məzu san amadamba mogon na gəla metiŋ naw zuliya, məzəŋgla sazlaga naki, agətaŋka.

¹¹Yaŋ ɗəf nak dəŋgəm wəzar səza Piyer də Zaŋ ɓa, ɗii pak anzoŋko adoŋguk azeti amba genzek məs adawyaŋ na genzek na Salmoŋ, agətaŋgək sawɓa.

¹²Adan Piyer awle, apsit na: Munokum ɗii na Israyel, vimi kəda gətaŋ di? Vimi kədawləmən vakəmna mənam də sembe nami mədaw gəni di? Walla vi məsler də Maŋgəlvayi sa?

¹³Maŋgəlva na Abraham, na Isak, na Zakub, Maŋgəlva net migilmə apsənək gakdak sən gawla nan Zezu. Munokum sən kikum kəkanənək Zezu sit ɗii gugiriɗe, kə wəliyənək aba Pilatu, ko də Pilatu aŋgəl wəppan zlaŋ.

¹⁴Kəppanənək ɗəf məs salala məs təstəssə, yaŋ kəssohonən Pilatu dəppan sukum gən məbay gəbaya.

¹⁵Vaski kan kəbayən affən wəkoho. Amma Maŋgəlva asil gənək sətəki əmta. Nam bo saydawiɗ na wənnan mənani.

¹⁶Vədaləŋka arahək sembe də sembe na Zezu, an məs kulaŋ an məs kəsənaŋ, vi iya na Zezu də wətafa zəgas agəɗə, də wəɗi maɗulam aka Zezuwi ɗəffəŋ ambəl ama horokum pakə.

¹⁷Yo milmiŋgiɗwa, nəsənək an məs kəɗɗaŋ sənən Zezu, munokum dit ɗii gugiriɗ nokum, vi kəsənən ɓayi kəɗɗanən vaskəŋka.

¹⁸Daga far lahəŋki Maŋgəlva arban də met məs kleŋɗe, dewle Messiya* wazəm saha, an məs apel farəŋka, gesiŋgi kakaŋka.

¹⁹Mətubiyə məkpaŋgan makrokum aza Maŋgəlva, waviyan sukum mambray nokum.

²⁰Ɗəfdaya wapsukum sembe narma wənnani, waslən sukum Zezu ndəni bo Messiya məs awel sukum daga laŋka.

²¹Dewle Zezu wasan a disiŋ tagay, ha payan Maŋgəlva aɗi dəgrak gəni məs akpaŋgan zəga pak meleketeni. Va anah də met məs kleŋɗe en salala laŋka.

²²Vasna Moyis anahək na: Maŋgəlva Ɗəfdaya waslən sukum, aweleŋgit milmiŋgiɗkum məs kleŋ va aslənwa. Say kəpprəmən gən mani an məs adaw nah sukum pakə.

²³Ɗəffan məs dəpprəm man ɓa, kawgohni səzet ɗii na Maŋgəlva, wazə.

²⁴Məs kleŋɗe daga səza Samuyel ha dit məs dəzoŋ dərɓagan pakə, apelinək wənnani agəɗək də payan azam kakaŋka.

²⁵Wən məs Maŋgəlva aynan dit məs kleŋɗeŋ na, vikumi, kətoŋgoŋguk adəv wən məs minan sit migilkum. Va anahsən Abraham: Wanəɗɗa barka aket ɗii namba dələv pak vi wənna əlfa noko.

²⁶Vaski bo Maŋgəlva awel gawla nan vikum dabəŋ ki wəslən sukum, dəgəɗ sukum gən zəzay kəkpaŋgaŋ gəni də wəppan mambray nokum.