Read Gidar Wəza net Masləŋɗe 4 Bible Online

Wəza net Masləŋɗe 4 - Gidar bible

Wəza net Masləŋɗe 4

¹Piyer də Zaŋ apeleŋ sitinik ɗii əmpa, məs dəlveŋge dit ɗii gugiriɗ net məgaŋ gəla metiŋ naw zuliya*, dit Sadusiyenɗe pak azoŋguk azeti.

²Gədivit adəka, vi arbanənək sit ɗii na Maŋgəlva asil gənək Zezu sətəki əmta, vini ɗii mimtit pak wasilyoŋ də zeŋgilleti.

³Vini armenini asgetin a daŋgay, dətawən kita aket ɓa vi moskoy agəɗka.

⁴Amma ɗii diiɗa məs dəpprəmən wəpel net masləŋɗe, atafənək wəpel neti, ha ɗii na Maŋgəlva aɗɗaŋgək uzinere sle ɗii mazeŋgilleket kaaka'ə.

⁵Vit pumpum nani, məlĩyeŋge net Yahudiyenɗe dit ɗii gugiriɗ net məs dəlveŋge məsənaŋ na ma henziŋ na Maŋgəlva akkalaŋgək a Zerusalem.

⁶Məs dəkkalaŋ vet na daya net məs dəlveŋge məs adawyaŋ na Annas də Kayafas gəm Zaŋ gəm Aleksandər dit ɗii gugiriɗ na əlfa na Annas.

⁷Akiyənik masləŋɗe abeti. Assohotinke: Mbarmbari kəmbəl gənən vədaləŋ di? Səŋga kərəhən sembe nan di? Nawa dupsukum sembe nan di?

⁸Piyer aknahək də Əmpəs Salala amna: Aw məlyeŋge dit ɗii gugiriɗe,

⁹məwəliyəm abokum na vi wəza mogon an məs məgəɗsən vədal ambəlli.

¹⁰Munokum ɗii na Israyel pak say məsəna: Ɗəffəŋ adawsan abokum vaŋkəŋ na, vi iya na Zezu Krestu na Nazaretti. Ndəni məs kəkpa'aŋ aka wəlaŋga, amma Maŋgəlva asil gənək sətəki əmta.

¹¹Aka Zezu wəŋki ɗerewel na Maŋgəlva anahə amna: Gərməŋka mərkaŋ gəla asganənka, yaŋ akpaŋ gərəm na sləma.

¹²Dəndəni kaaka mədawrəh wəkoho, vi ɗəf maɓɓan tay a duniya ɓa sam, məs Maŋgəlva apsəm mərah gən wəkoh dəndən ɓa.

¹³Ɗii məzu slireŋ net Yahudiyenɗe agətaŋgək sawɓa, awlanən Piyer də Zaŋ də geslne'eŋ ɓa sam, maay sap kana ɗii məs də gakdakəŋ ɓa, də sənaŋ zəga ɓa. Adan asənən na ɗii məs dəsoŋ də Zezu wəŋ,

¹⁴amma dəɓapən wəpel wən maɓɓan ɓa, vi tahəŋ ulanən ɗəf məs dəsan vədal nak amaŋgevet maay Piyer də Zaŋ ambəlka.

¹⁵Apsitinik tive dəgulyoŋ gən sətəki nakkal neti, yaŋ atəŋgaŋ wəpeleŋ awalaŋ zit aka wənnani.

¹⁶Aɓɗaŋ na mbar mədawgəɗ sit ɗiiyiŋ di? Awaleŋgit ɗii na Zerusalem pak ɗii tahəŋ məza dəsənən wənna sokone məs aɗɗaŋ ɓaɓa, waməɓap kawzelen wənnan ɓa.

¹⁷Amma vi wənnan adanzləra abe, say mənah səm siti məbay səm meti adawpeleŋ sənən ɗəf ɗaah də iya na Zezu ɓa.

¹⁸Yaŋ ayenin əmpa, atekini, apsitin na: Kədarbanən wənna Zezu sit ɗii ɗaah ɓa, ko wəpel wənna iya nan sən ɗəffa kədawpeleŋ ɗaah ɓa.

¹⁹Amma Piyer də Zaŋ azlanənka: Mətaw kita nan sən kikum ɗa, mogoni aba Maŋgəlva məpprəm gən mokum dayki Maŋgəlva sa?

²⁰Amma məɓapna wəray gən wənnan ɓa walla wəppan dawpel an məs məwələ də an məs məpprəm ɓa.

²¹Məzu slireŋ apelsitinik də gagay əmpa adaɗɗaŋ vas ɓa. Yaŋ apetini. Vi dərəhaŋ mambray azet ko suɗike nawtaw kita aket ɓa, vi ɗii pak tahəŋ wəgakdakanən Maŋgəlva vi zəga məs dəgəɗə.

²²Ɗəf məs ambəl gənən də sokone van wəsva nan wadayki kaklaw poɗo.

²³Adan apanən Piyer də Zaŋ amilyoŋguk azet ɗii neti. Anahsitinik an ɗii gugiriɗ net məs dəlveŋge dit məzuslereŋ anahsitini.

²⁴Adan ɗii net apprəmən vaska, ndəɗaŋ pak akkamanənək Maŋgəlva də makret taka: Aw Ɗəfdaya əstə kəzəməɗ disiŋ də dəlva fuŋ, də məlpa də zigeɗ nadəvən pakə.

²⁵Əstə kəɗɗa dəhəm Davit məs dəsan gawla noko, məs kəpel də sembe na Əmpəs Salala də mani: Vimi ɗii məza Yahudiyenɗe həŋ ɓa adawsil gənən wən di? Vimi ɗii ada ɗumoŋ aka wən zevin mbrayen vaŋ di?

²⁶Məlĩyeŋge na duniya tahəŋ wəɗɗaŋ wən ɗarɗarə, ɗii gugiriɗ bo tahəŋ wəɗɗaŋ kuket aka Ɗəfdaya də aka Messiya* nani.

²⁷Vaski bo Herodə də Pontiyu Pilatu dit ɗii məza Yahudiyenɗe həŋ ɓa, dit ɗii na Israyel, ndəɗaŋ pak akkalaŋgək awalaŋ gəla metiŋ aka gawla nok məs təstəssə an məs kəweli dəsan gən Krestu.

²⁸An məs aɗɗaŋ pak adəv sembe nokki də wəŋgla noko an məs kəɗum akan laŋka.

²⁹Kakaŋ na aw Ɗəfdaya vaski kan wəza mbrayen neti. Apsit sembe sit ɗii nok nawpel wən nok də gabbani məza də geslne ɓa.

³⁰Arban sembe noko, naw mbəl git məs gbəgbaɗe, naɗɗa wəza də sokeneɗi məs nagət aketi, kaɗɗet də sembe na Zezu məgəɗ wəza nok an təstəssə.

³¹Adan agrakən wəzuli neti təki məs akkalaŋ aɓəlka. Ndəɗaŋ pak aknəhaŋgək də Əmpəs Salala, atəŋgaŋgək wəpel wənna Maŋgəlva məza də geslne ɓa.

³²Ɗii na Maŋgəlva akpaŋgaŋgək makret taka, maɗulet taka. Ɗəf tay dədawnah na aŋ arya nawi katər gən ɓa, amma asapanənək arya net pakə.

³³Də sembe diiɗayi masləŋɗe aɗɗaŋ saydawa aka wəsilyo na Ɗəfdaya Zezu sətəki əmta. Maŋgəlva aɗɗak zəzay aket pakə də zəzay nan diiɗa.

³⁴Ɗəf tay məs saha aweleŋgit ɓa. Ɗəf məs də guli nani walla də gəla nani avələka akkek deleɗ nan məs arah də zəga məs avələ.

³⁵Məzeɓeti avet masləŋɗe, net bo apsənənsən ko naway pak va aza wəray nani.

³⁶Yaŋ ɗəf maɓɓan tay zemvit may Lewi muwan a Kiprus, iya nan na Zozeffi, yaŋ masləŋɗe alvanən na Barnabas (va wənah na ɗəf məzu səɓ sit ɗiiyi).

³⁷Nan bo avələk guli nani, akiyik deleɗ nan azet masləŋɗe.