Read Gidar Wəza net Masləŋɗe 7 Bible Online

Wəza net Masləŋɗe 7 - Gidar bible

Wəza net Masləŋɗe 7

¹Daya net məs dəlveŋge assohonək Etiyen: An məs anahaŋ akokəŋ gesiŋgi sa?

²Etiyen azlanəka: Milmiŋgiɗu dit afiŋgiɗwa, məpak sləmokum ambra wəpel nawəŋ ɗa: Maŋgəlva məs də gakdaka, arbanək zən aza affəm Abraham daga adawsan a Mesopotamiya, dəpas dəɓəl wəsan a Haran tagay ɓa.

³Maŋgəlva apsən na: Agil səka dələv noko, apet hilfiŋgiɗko, doko aka dələv məs nədarban suko.

⁴Yaŋ apan dələv na Kaldiya ambat wəsan a Haran. Adan affən amtə, Maŋgəlva asil gənəka, adek wəsan aka dələvəŋka, an məs kəda soŋ akannəŋka.

⁵Depas na Maŋgəlva dəpsən dələv nan sən Abraham ko təl ɗəf ndap taka ɓa ka dələv nan dəsan gən kanan ɓa. Amma amna wapsən dələv vani, ndən dit kirtini dələv van wasan kanet pakə, Abraham tay də wətən dəpas tagay ɓa.

⁶Amma Maŋgəlva apsən na: Kirtuk wasoŋ va balemɗe də wəzəm saha aka dələv maɓɓani ha gap wəsva səkat poɗo.

⁷Amma Maŋgəlva amna wanətaw kita aket ɗii məs də kpaŋgetin balemɗe. Dərɓagan na wagilyoŋ səka dələv nani, wazuliyaŋ suwən atəkiyaŋka.

⁸Yaŋkan Maŋgəlva aynan wənnan də Abraham, də wəskələn awra, ndəni dərban wən məs minani. Adan Abraham awa Isak, askələk awra aka wəvoŋ dədopoɗo səza muwani, Isak bo askələk Zakubu, Zakub bo askilik kirtin klaw kiyit sula, məs dəkpaŋgaŋ dəhiŋgiɗmə.

⁹Net bo aɗɗaŋgək kotorok na Zozeffi, avələnka, akpaŋgək balam a Misra. Amma Maŋgəlva tay dəndən.

¹⁰Tay gan də wəzəm saha nani. Maŋgəlva apsənək wəsəna aba Firawna məlĩ na Misra. Firawna aɗiyək ka daya aka dələv na Misra də aka gəla nan pakə.

¹¹Dəpas bo maay agəɗək a Misra gəm a Kanana pakə. Azəm gitik saha net ɗii sawɓa, ha dəhiŋgiɗmə net dərəhaŋ zəga nawzəm ɓa.

¹²Adan Zakub apprəm na hay taya Misra, aslinik dəhiŋgiɗmə ambani, ndəni malaka an dabəŋ.

¹³Pay adadoŋ malaka ma sula'ən, Zozef arbanək zən azet milmiŋgiɗni. Vaski Firawna asən əlfa na Zozeffi.

¹⁴Yaŋ Zozef aslən wədaw gəm Zakub affən də gəla nan pakə. Wəŋɗa net ɗii nadəv gəla nan bo tahəŋ kaklaw buhul kiyit sle.

¹⁵Yaŋ Zakub kan asan a Misra. Adaki amtaŋ ndəɗaŋ dit dəhiŋgiɗmə pakə.

¹⁶Məketi a Sikem. Adak məndiket adəv magamas məs Abraham albah səvet kirtin Hamor.

¹⁷Pay na wən məs Maŋgəlva aynansən Abraham, asan gu'o aza wəzani, ɗii na Israyel diiɗahəŋ a Misra.

¹⁸Aɗiyaŋgək məlĩ maɓɓan a Misra, məs dəsən Zozef ɓa.

¹⁹Aɗɗaŋgək matakataka dit ɗii namə, azəm gitinik saha net dəhiŋgiɗmə neki, aɗɗaŋ sitinik dewle dəsgetin gin kirtit məzu waɗaŋ apoho dəmtaŋ gəni.

²⁰Pay nani muwa Moyis, Moyis mogoni sawɓa daga muwani, məɗamani təla hoku ana affən da.

²¹Yaŋ məgilgini məɗiyən ama poho, wətən məlĩ tərəhəka, təslanəka, təsgələk va wətəta.

²²Moyis asənək zəga net ɗii na misra pakə, ha asanək də sembe aza wəpel temtem pakə.

²³Adan Moyis agap wəsva kaklaw poɗo, aɗumuk wədawle milmiŋgiɗin Israyelɗe.

²⁴Yaŋ awla ɗəf na Misra adawvər ɗəf neti, yaŋ ambat wəbaahsən əlfəni. Abayək ɗəf na Misra naka.

²⁵Aza Moyis na ɗii nan wasənən na Maŋgəlva wagil git səka balam neti, də gurom nani, amma dəsənən ɓa.

²⁶Yaŋ vit pumpum nani, arihik Israyelɗe tahəŋ wəgayaŋ kaziti, yaŋ adawtreti, amna: Miyaŋ di h'aya, məlma kənanaŋ, vimi kədawgayaŋ di?

²⁷Amma məkay mama nak aslaŋganək Moyis, apsən na: Naway dəɗiyuk daya nawtaw kita akam di?

²⁸Kəŋgəl kawbayu va kəbay mə Misra nadəfɗaŋga nak sa?

²⁹Adan Moyis apprəm vaska, anzanəka, ambatək a Madiyan. Asanək adaka, awək kirin mazeŋgilleket sula.

³⁰Dərɓaga wəsva kaklaw poɗo, maslay na Maŋgəlva arbanək zən aza Moyis adəv offo məsɗan aka dezeze awra, amaŋgava gərəm na Sinay.

³¹An məs awələŋka, agətək akani, azarək aza dezeze vi kawlan lewlewi. Amma yaŋ apprəm wəla Ɗəfdaya dawnah na:

³²Əntə Maŋgəlva net dəhiŋgiɗko, Maŋgəlva na Abraham, Maŋgəlva na Isak, Maŋgəlva na Zakubu. Geslne adak Moyis, tayəkkere, ageslne'ək dawlani.

³³Ɗəfdaya apsən na: Agbuk hensek noko, vi təki məs kiziwiŋka salalayi.

³⁴Nulak wəzəm saha net ɗii naw a Misra, nəpprəmək wənɗəs neti, nəprikik vi kawkoh giti. Ade wanəslunuk a Misra.

³⁵Moyis əŋka, ndəni məs Israyelɗe dəŋgluwən ɓa. Apsənən na, naway dəɗiyuk məlĩ akam nawtaw kita akam di? Amma Maŋgəlva aslənək dəsan gən məlĩ neti, də wəkoh gitigəni, də wəbaah na maslay məs dərban zən aza Moyis adəv offo na dezeze naka.

³⁶Moyis agil gitik də wəɗɗa sokeneɗ aka dələv na Misra, akek aməlpana Maliya asanək daya net a muya wəsva kaklaw poɗo.

³⁷Moyis apsit ɗii na Israyel na: Va Maŋgəlva asləŋwa, vaski bo adawsləŋ məs kleŋ əlfukum.

³⁸Ndəni daya net dəhiŋgiɗmə də maslay məs dəpelsən aka gərəm na Sinay pay akkalaŋ a muya. Adakki arəh wəpel narəh zeŋgille dəndən ndəni apsəmə.

³⁹Amma dəhiŋgiɗmə dəpprəmən ma Moyis ɓa, aɓoŋgoŋko, aŋglaŋ wəmilyoŋ a Misra.

⁴⁰Vini anahsənən Aron na: Agəɗ səm maŋgəlva dəsan gən daya namə, vi məsən an dərəh Moyis məs dəgil gəm səka dələv na Misra ɓa.

⁴¹Aɗɗaŋgək maŋgəlva məzaɓan va wət wasliya, atawsənənək wəlla zəga aɗɗaŋgək wəzləra neneken zit na wəza neti.

⁴²Amma Maŋgəlva aktohuk gəɓan siti apetike, dəzuliyaŋ sitin gin ngərzleɗ na disiŋ, va məverin adəv ɗerewel net məs kleŋɗe: Munokum ɗii na Israyel suwi kətawaŋ wəlla zəga də wəvay zəga wəsva kaklaw poɗo a muya sa?

⁴³Awwo, kəslanənək gəla na gabaga sən maŋgəlva nokum Moloko, də foto na ngərzla na maŋgəlva nokum Refan, matuya aski kəɗɗaŋ na zuli səni. Vi wənnani wanəkukum kaw ndol kum bal sən Babilon.

⁴⁴Dəhŋgiɗəm tahəŋ wəganən gəla na gabaga nalma* sən Maŋgəlva a muya, arbanək na Maŋgəlva tay dənɗaŋ. Amanənək wənnan va arbansən Moyis, va foto arbansəni.

⁴⁵Dərɓagani dəhiŋgiɗmə aslanənək gəla nani ha gap alfiŋgiɗti, aslanənək pay malaka neti, Zosuwayi məzudaw abet pay agapaŋ aka dələv net ɗii meɓɓeti. Maŋgəlva arɓehetik ɗii net abeti. Gəla na gabaga nan asanək ha gap pay na Davitti.

⁴⁶Maŋgəlva ananək nek də Davit sawɓa, ndəni Davit akkaman dəpansən gən tive narka gəla sən Maŋgəlva na Zakubu.

⁴⁷Amma Salmoŋ dərka sən gəla.

⁴⁸Amma Maŋgəlva daya na disiŋ awsan adəv gəla mərkan də vet ɗii ɓa, va məs kleŋ anah na:

⁴⁹Ɗəfdaya amna: Disiŋgi mazaŋga na məlĩ nawa, dəlva fuŋ bo təki naw ɗi təlwa. Gəla mi kədarkaŋ suwən di? Təki mi naffet naw di?

⁵⁰Əntə nəɗɗe zigeɗ pak ɓa sa?

⁵¹Ki ɓəɓəl nokuməŋka, kəpprəmən wənnaw ɓa sa? Kəɓoŋgoŋguk dapprəm ma Əmpəs Salala vanet dəhiŋgiɗkum aɓoŋgoŋ dapprəm mani.

⁵²Məs kleŋ tay ko taka məs dəhiŋgiɗkum dəzəm gənən saha ɓa sa? Abayinik masləŋɗe na Maŋgəlva məs dəkiyən labara na gawla məs də goŋga. Yaŋ kə zəmən kiyən kəbayənni.

⁵³Kətafənək ma henziŋ na Maŋgəlva məs maslayɗe akiyaŋ, amma kəsbanən wənnan ɓa.

⁵⁴Adan məzu səɓaŋ net Yahudiyenɗe apprəmən wənnəska, gidivit adək aka Etiyen sawɓa ha wəmpəranən slayit akani.

⁵⁵Amma Etiyen ɗəf məs dəknah də Əmpəs Salalayi, aziyək haran a disiŋ, awlak gakdak na Maŋgəlva, awlak Zezu bo tay ziwwe aka va dəzəŋ na Maŋgəlva.

⁵⁶Etiyen amna: məpprəma, nulak disiŋ akolko, əntatula Wətən Ɗəf* tay ziwwe aka va dəzəŋ na Maŋgəlva.

⁵⁷Anzlaŋgək vamvəlla, asukunək sləmeti, ndəɗaŋ pak asapaŋka, akaraŋgək kini.

⁵⁸Agil gənənək ama poho na walaŋ gəla neti, kaskan dit kuneŋge. Məɗɗaŋ saydawa apanənək lukutɗe net aza ɗəf məs adawyaŋ na Sol.

⁵⁹Tahəŋ wəskanən Etiyen, nan bo tayəkkaman Maŋgəlva də wənah na: Ɗəfdaya naw Zezu ataf zeŋgillewa.

⁶⁰Akdukuk takprani, anahək də wəlan dayadaya amna: Ɗəfdaya aviyansit mambray neti, dərɓaga anah vaska, amtəka. Sol bo zən neki də wəbay Etiyen.